Wen Jehoava mi staat di famili araynjment, ih mi put di payrent dehn fi bee rispansabl fi dehn pikni. (Koloashanz 3:20) Soh da yoo ga di rispansabiliti fi chrayn yu pikni fi lov Jehoava ahn fi bee sohnbadi weh adaz ku pen pan. (2 Timoti 1:5; 3:15) Ahn yu need fi laan weh yu son er daata reeli di feel eena ih haat. Af koars, yu egzampl impoatant tu. Wan a di bes way fi teech yu pikni bowt Jehoava da fi put fi hihn Werdz eena yu haat fos.—Psalm 40:8.

WEH DI BAIBL SEH: “Eech wan a unu shuda hori fi lisn. Tek yu taim bifoa yu taak.” (Jaymz 1:19) Yu waahn yu chiljren feel dat dehn ku taak tu yu enitaim. Ahn dehn need fi noa dat yu wilin fi lisn tu weh dehn ga fi seh. (Jaymz 3:18) Dehn mait hoal bak fahn tel yu egzakli how dehn feel if dehn tink dat yu wahn rof dehn op er joj dehn. Soh ga payshens wid dehn, an aalwayz mek dehn noa dat yu lov dehn.—Machyu 3:17; 1 Korintyanz 8:1.

WEH YU KU DU:

• Dehdeh fi yu chiljren wen dehn need sohnbadi fi taak tu

• Aalwayz taak tu yu chiljren, noh jos wen prablemz kom op

WEH DI BAIBL SEH: “Di wan weh shoa andastandin eena wahn mata wahn ga sokses.” (Proverbs 16:20) Sohntaim yu wahn hafu stap ahn tink bowt weh yu chiljren di seh soh yu ku andastan weh dehn reeli meen. Ih kaman fi yong peepl egzajarayt ahn seh tingz weh dehn noh meen. “Da wahn foolish ting wen sohnbadi ansa bak tu wahn mata bifoa ih hyaa di faks.”(Proverbs 18:13) Soh, noh hori fi geh beks.—Proverbs 19:11.

WEH YU KU DU:

• Disaid heda taim fi stay kaam ahn noh fi intarop yu son er daata noh mata weh ih seh

• Chrai fi memba how yoo mi feel wen yu da-mi da sayhn ayj ahn weh mi moa impoatant tu yu bak den

WEH DI BAIBL SEH: “Unu weh da faada, noh fi seh ahn du tingz tu unu pikni weh wahn mek dehn beks wid unu. Insteda dat, unu fi teech dehn ahn chrayn dehn eena di Laad way.” (Ifeezhanz 6:4) Jehoava gi di ma ahn di pa atariti oava dehn pikni. Unu need fi teech dehn fi obay unu ahn fi ga rispek fi unu. (Ifeezhanz 6:1-3) Unu pikni dehn ku sens wen unu noh di “bee wan eena di way unu tink.” (1 Korintyanz 1:10) If unu noh gree pahn sohnting, noh aagyu fronta di pikni dehn bikaaz dis ku mek dehn looz rispek fi unu.

WEH YU KU DU:

• Unu taak ahn gree heda taim pahn how unu wahn disiplin unu pikni dehn

• If yoo ahn yu marij paadna ga wahn difrent way fi chrayn unu pikni dehn, chrai fain wahn way fi werk tugeda

WEH DI BAIBL SEH: “Chrayn wahn lee bwai eena di way ih fi goh.” (Proverbs 22:6) Fi teech yu pikni dehn di karek way noh wahn hapm rait soh. Yu need fi plan how yu wahn chrayn ahn disiplin dehn. (Psalm 127:4; Proverbs 29:17) Wen yu disiplin yu pikni dehn ih noh meen dat yu wahn jos ponish dehn, bot dat yu wahn help dehn fi andastan di reezn wai yu ga roolz fi dehn. (Proverbs 28:7) Teech dehn fi lov di Baibl, ahn help dehn fi andastan di prinsiplz weh deh een deh. (Psalm 1:2) Dis wahn help dehn fi ga wahn gud kanshans.—Heebrooz 5:14.

WEH YU KU DU:

• Help dehn fi si Jehoava az wahn Fren weh dehn ku chros

• Help dehn fi laan bowt tingz weh ku damij dehn repyutayshan soh dat dehn ku stay weh fahn dehndeh tingz, laik sertn tingz weh deh pahn di Intanet ahn soashal meedya. Teech dehn how fi stay weh fahn peepl weh ku abyooz dehn sekshwali