Wen wahn baybi jos baan ih ku bee eksaitin fi wahn kopl, ahn sayhn taim feel laik da tu moch fi dehn. Ih mait sopraiz unu az nyoo payrents dat unu wahn yooz moas a unu taim ahn enerji pahn unu baybi. Unu rilayshanship mait staat feel laik ih deh anda presha bikaaz unu bayli sleep ahn unu feel taiyad er dipres. Unu wahn need fi mek sohn chaynj fi tek kayr a unu baybi ahn stil kip unu marij schrang. How di advais fahn di Baibl ku help unu deel wid dehnya chalenj?

WEH DI BAIBL SEH: “Wen yu lov ada peepl, unu wahn bayr payshens wid dehn. Unu wahn kain tu dehn ahn unu noh wahn jelos dehn. If unu lov peepl, unu noh wahn bee selfish ahn aalwayz waahn unu oan way aal di taim. Wen yu lov peepl yu noh wahn eezi fi geh beks.” (1 Korintyanz 13:4, 5) Az wahn nyoo ma, af koars yu waahn gi yu baybi aala yu atenshan. Bot memba dat yu hozban mait staat feel laik yu di ignoar ahn, soh noh faget dat hihn need yu atenshan tu. Wid payshens ahn kainis yu ku help ahn fi si dat yu reeli need ahn, ahn dat yu waahn ih help yu tek kayr a di baybi.

“Unu hozban fi aana unu waif.” (1 Peeta 3:7) Memba dat yu waif wahn spen moas a ih enerji pahn yu baybi. Shee mait feel schres owt, taiyad, er eevn dipres bikaaz ih ga wahn nyoo rispansabiliti. Sohntaim ih mait geh beks wid yu, bot chrai kip kaam sins di Baibl seh: “Noh hori fi geh beks.” (Jaymz 1:19) Shoa dat yu andastan yu waif ahn sopoat ahn.—Proverbs 14:29.

WEH YU KU DU:

• Fi di pa dehn: Help yu waif tek kayr a di baybi, eevn da nait. Spen les taim pahn ada tingz soh yu ku spen moa taim wid yu waif ahn yu baybi

• Fi di ma dehn: Wen yu hozban aafa fi help yu wid di baybi, aksep ih help. If ih noh du sohnting how yu waahn ih du it noh geh beks wid ahn, bot eena wahn nais way tel ahn how fi du it

WEH DI BAIBL SEH: “Di too a dehn wahn bee laik wan persn.” (Machyu 19:5) Eevn doa unu ga wahn baybi, memba dat yoo ahn yu marij paadna da stil “laik wan persn.” Soh du unu bes fi kip unu rilayshanship schrang.

Unu waif, shoa yu hozban humoch yu apreeshiayt aal di help ahn sopoat weh ih di gi yu. Wen yu du dis yu di inkorij yu hozban. (Proverbs 12:18) Unu hozban, tel yu waif dat ih preshos tu yu ahn dat yu lov ahn. Prayz ahn fi di way how ih tek kayr a di famili.—Proverbs 31:10, 28.

“Noh oanli tink bowt unu oanself, bot tink bowt weh gud fi ada peepl tu.” (1 Korintyanz 10:24) Aalwayz du weh bes fi yu marij paadna. Az wahn kopl, fain taim fi taak, fi lisn, ahn fi inkorij wan anada. Noh jos tink bowt yu oanself wen ih kohn tu seks eena unu rilayshanship. Tink bowt di needz a yu hozban er waif. Di Baibl seh: “Di man weh marid shuda satisfai ih waif. Sayhn way, di marid uman shuda satisfai ih hozban.” (1 Korintyanz 7:3, 4) Soh unu need fi taak bowt dis tapik eena wahn aanis way. Yu rilayshanship wahn geh schranga wen unu shoa payshens ahn andastandin wid wan anada.

WEH YU KU DU:

• Mek shoar di too a unu fain taim fi spen tugeda

• Du tingz weh wahn mek yu hozban er waif feel di lov weh yu ga far ahn, laik sen ahn wahn lee teks, gi ahn wahn lee hog, er gi ahn wahn lee gif

WEH DI BAIBL SEH: “Ahn yu mos memba how fahn wen yu mi smaal, yu mi noa dehn tingz weh mi rait dong eena di Hoali Skripcha. Da di Skripcha weh teech yu fi bee waiz soh dat yoo ku ga fayt eena Krais Jeezas fi bee sayv.” (2 Timoti 3:15) Plan owt weh yu wahn du fi teech yu baybi. Eevn bifoa yu baybi baan ih don ku laan wahn lata tingz. Wen ih stil deh eena yu oom, ih ku noa yu vais, ahn ih ku eevn noa if yu hapi, beks, er sad. Reed tu ahn wen ih da stil wahn lee baybi. Eevn if ih noh mait andastan weh yu di reed, dis ku help ahn fi laik reed wen ih geh oalda.

Ih noh mata how yong yu baybi, taak tu ahn bowt Gaad. Mek ih hyaa wen yu pray tu Jehoava. (Deuteronomy 11:19) Eevn wen yu play wid ahn, taak tu ahn bowt di ting dehn weh Gaad mek. (Psalm 78:3, 4) Az yu baybi groa op, ih wahn feel di lov weh yu ga fi Jehoava an ih wahn laan fi lov ahn di sayhn way tu.

WEH YU KU DU:

• Bee spesifik ahn pray fi di wizdom weh yu need fi chrayn yu baybi

• If yu waahn yu baybi laan sohnting fahn ih yong, seh it oava ahn oava tu ahn