Eevn if yu ga wahn hapi famili laif ahn wahn hapi marij, tingz weh yu neva ekspek ku kom op ahn mek it haada fi yu stay hapi. (Jaymz 4:14) Bikaaz Jehoava lov wi soh moch, ih provaid help fi wi wen wi di goh chroo chraiyalz. If yu aplai di prinsipl dehn fahn di Baibl, yoo ahn yu famili wahn ku deel wid eni sichuwayshan noh mata how bad ih get.

WEH DI BAIBL SEH: “Chroa aala yu woriz ahn kyaa pahn Gaad, bikaaz hihn kyaa bowt yoo.” (1 Peeta 5:7) Aalwayz memba dat Jehoava da noh di wan fi blaym wen yu di fays wahn chraiyal. (Jaymz 1:13) Az yu jraa kloasa tu Jehoava, hihn wahn help yu eena di bes pasabl way. (Heebrooz 13:6) “Poar owt unu haat fronta hihn.”—Psalm 62:8.

Wen yu reed ahn stodi di Baibl evri day yu wahn geh lata komfert. Dis wahn help yu fi si how Gaad “gi wi aal di komfert weh wi need.” (2 Korintyanz 1:3, 4; Roamanz 15:4) Hihn pramis fi gi yu “wahn kaina pees weh nobadi kyaahn andastan.”—Filipiyanz 4:6, 7.

WEH YU KU DU:

• Pray tu Jehoava fi help yu fi stay kaam, ahn fi tink schrayt

• Goh oava aal di opshan weh yu ga ahn pik di wan weh wahn werk bes fi unu

WEH DI BAIBL SEH: “Di haat a di andastandin wan geh nalij, ahn di ayz a di wan weh waiz chrai fain nalij.” (Proverbs 18:15) Geh aala di faks. Fain owt weh eech persn eena yu famili need. Taak wid dehn, ahn lisn tu dehn.—Proverbs 20:5.

Sopoaz sohnbadi weh yu lov ded? Noh hoal bak fahn shoa how yu reeli feel. Memba dat eevn ‘Jeezas mi krai.’ (Jan 11:35; Ecclesiastes 3:4) Ih impoatant dat yu geh nof sleep ahn res tu. (Maak 6:31) Dis wahn help yu fi deel wid eni chraiyal.

WEH YU KU DU:

• Bifoa wahn chraiyal kom op, mek it wahn habit fi aalwayz taak wid yu famili. Soh wen prablemz kom op, dehn wahn feel komfatabl fi taak wid yu

• Taak tu adaz weh don gaan chroo di sayhn ting laik weh yoo di goh chroo

WEH DI BAIBL SEH: “Wahn chroo chroo fren shoa lov aala di taim, ih da wahn brada weh baan fi wen taimz haad.” (Proverbs 17:17) Yu fren dehn waahn help yu, bot  dehn mait noh noa weh fi du. Noh frayd fi tel dehn weh yu reeli need. (Proverbs 12:25) Chrai geh help fahn sohnbadi weh wahn yooz di Baibl fi help yu bikaaz di gaidans weh deh een deh wahn benifit yu.—Jaymz 5:14.

If yu aalwayz deh rong peepl weh ga schrang fayt eena Jehoava ahn weh chros eena fi hihn pramis dehn, yu wahn geh di sopoat weh yu need. Yu wahn geh lata inkorijment wen yu tek di taim fi inkorij adaz tu. Tel dehn bowt Jehoava ahn fi hihn pramis dehn. Kip yuself bizi di help adaz, ahn noh stay weh fahn dehn wan weh lov yu ahn weh kay bowt yu.—Proverbs 18:1; 1 Korintyanz 15:58.

WEH YU KU DU:

• Taak tu wahn kloas fren an alow ahn fi help yu

• Bee spesifik an aanis bowt di ting dehn weh yu need