1, 2. Yu tink wahn marij oava if ih ga prablemz? Pleez eksplayn yu ansa.

MARIJ da wahn gif fahn Jehoava. Ih ku mek wahn persn laif hapiya. Stilyet, evri marij wahn ga ih oan prablemz. Ih mait eevn luk laik di prablemz wahn neva en, ahn wahn hozban ahn waif mait noh feel di saym kloasnis az bifoa.

² Wi shudn bee sopraiz if wi marij ga prablemz fahn taim tu taim. Bot wi marij noh oava jos bikaaz wi ga prablemz. Eevn koplz weh ga sohn seeryos prablem fain wayz fi fiks dehn rilayshanship ahn mek dehn marij schranga. Weh mi help dehn?

3, 4. Weh ku hapm sohntaimz eena wahn marij?

³ Wahn marij da bitween too peepl weh difrent fahn wan anada. Dehn ga dehn oan tingz weh dehn laik ahn noh laik, dehn oan aidyaaz, ahn dehn oan wayz fi du tingz. Ahn di hozban ahn waif mait kohn fahn difrent bakgrong er kolcha. Ih tek taim ahn haad werk fi mek wahn kopl geh fi noa an andastan wan anada gud.

 ⁴ Az taim paas, wahn hozban ahn waif ku geh soh bizi wid dehn oan persnal kansaan dat dehn jraa weh fahn wan anada. Eevn doa dehn di liv eena di saym hows, ih pasabl dat di too a dehn di du dehn oan ting. Weh ku help dehn fi geh kloasa?

5. (a) Weh ku help wahn Kristyan jraa kloasa tu ih mayt? (b) Akaadn tu Heebrooz 13:4, how wi shuda feel bowt marij?

⁵ Jehoava gi wi di bes advais weh ku help wi fi jraa kloasa tu hihn ahn tu wi mayt. (Psalm 25:4; Isaiah 48:17, 18) Hihn tel wi: “Unu mos ga big rispek fi marij.” (Heebrooz 13:4) If wahn persn rispek ih marij, ih wahn du evriting fi protek it an ih noh wahn tek it fi grantid. Dat da how Jehoava waahn wi feel bowt marij.

6. How Jehoava feel bowt marij akaadn tu Machyu 19:4-6?

⁶ Jehoava mi marid di fos man ahn uman. Ih Son, Jeezas, mi seh: “Ah shoar unu reed eena di Skripcha how ‘Gaad mi mek man ahn umanʼ fahn di biginin wen ih mi mek di werl, ahn ih mi seh, ‘Dat da wai wahn man fi lef ih ma ahn ih pa ahn jain op wid ih waif, ahn di too a dehn wahn bee laik wan persn.ʼ Soh dehn noh wahn bee too nohmoh, bot wan. Soh noh mek nobadi separayt weh Gaad don jain tugeda.” (Machyu 19:4-6) Fahn di biginin, Jehoava mi waahn marij laas fareva. Ih mi waahn evri famili bee kloas ahn hapi ahn fi injai laif tugeda.

7. Weh ku help wahn hozban ahn waif fi schrentn dehn marij?

⁷ Tudeh, marid peepl fays way moa schres ahn presha dan eva bifoa. Sohntaim da soh moch schres dat wahn lata dehn staat tu tink dat dehn kyaahn sayv dehn marij, ahn dehn giv op. Bot wi ku geh help if wi andastan how Jehoava feel bowt marij.—1 Jan 5:3.

8, 9. (a) Wen wi shuda fala Jehoava gaidans bowt marij? (b) How wi ku shoa dat wi marij preshos tu wee?

⁸ Di gaidans fahn Jehoava da aalwayz fi wi oan gud. Wi don laan weh hihn ekspek fahn wi; ih mi seh: “Ga big rispek fi marij.” (Heebrooz 13:4; Ecclesiastes 5:4) If wi fala Jehoava advais eevn wen ih haad, wee wahn benifit fi shoar.—1 Tesaloanyanz 1:3; Heebrooz 6:10.

⁹ If wi marij preshos tu wi, wi noh wahn du er seh  eniting weh ku damij it. Insted, wi wahn werk haada fi mek wi rilayshanship wid wi marij paadna schranga. How wi ku du dat?

10, 11. (a) Weh seeryos prablem deh eena som marij? (b) Wai wi haftu bee kyaaful bowt di way wi taak tu wi hozban er waif?

¹⁰ Wahn persn ku hert ih mayt eena difrent wayz. Wi noa dat Kristyanz noh fi beet dehn mayt er du eniting fi hert dehn fizikali. Bot, wi mait hert wan anada wid wi werdz. Weh wi seh ku bee laik wahn wepan. Wahn uman mi seh: “Mi hozban atak mi wid ih werdz. Yu mait kyaahn si mi brooz dehn, bot di tingz weh ih tel mi brooz mi haat ahn lef mi wid wahn skaar. Ih wuda seh tingz laik, ‘Yoo da wahn berdn!ʼ ahn ‘Yu wotlis!ʼ” Wahn hozban seh dat ih waif aalwayz di put ahn dong wid fi shee werdz ahn kaal ahn naymz. Ih seh: “Ah kyaahn eevn tel yu di tingz shee tel mi. Dats wai Ai kyaahn taak tu ahn, an dats wai Ah stay da werk soh layt. Ah feel way sayfa deh dan hoam.” Tudeh, ih soh kaman fi mek peepl insolt op wan anada ahn seh tingz weh meen tu eech ada.

¹¹ Wen wahn hozban ahn waif taak laik dis tu wan anada, ih kaaz imoashanal payn weh tek wahn lang taim fi heel. Dat da noh how Jehoava waahn wahn hozban ahn waif fi chreet wan anada. Bot ih pasabl fi hert yu mayt widowt yu eevn noa it. Yoo mait feel dat yu kain tu ahn, bot how yu mayt feel?  If sohnting yu mi seh hert ahn, bee wilin fi chaynj.—Galayshanz 5:15; reed Ifeezhanz 4:31.

12. Weh ku afek wahn marid persn rilayshanship wid Jehoava?

¹² Jehoava kay bowt how yu taak tu yu mayt, weda da eena poblik er wen nobadi els deh rong. (Reed 1 Peeta 3:7.) Jaymz 1:26 tel wi: ‘If unu tink dat unu da Gaad peepl ahn stil kyaahn hoal unu tong, unu di fool unuself ahn unu wership noh gud fi notn.ʼ

13. Wat da wahn nada way weh sombadi ku hert ih marij mayt?

¹³ Dehn ga ada wayz how wahn kopl ku shoa dat dehn andastan eech ada feelinz. Fi egzampl, how  yu wuda feel if yu mayt staat spen lata taim wid sombadi els? Ih mait bee fi wahn inosent reezn, laik fi werk eena di minischri tugeda er fi help da persn wid wahn prablem. Bot how yu mayt mait feel? Wan sista seh dis bowt ih hozban: “Ih reeli hert mi wen Ah si how mi hozban gi soh moch taim an atenshan tu wahn nada sista eena di kangrigayshan. Ih mek Ah feel laik Ah noh az impoatant tu hihn.”

14. (a) Wat da wahn baysik chroot weh wi laan da Genesis 2:24? (b) Weh wi fi aks wiself?

¹⁴ Az Kristyanz, wi ga difrent rispansabiliti tuwaadz wi payrents ahn wi bradaz ahn sistaz eena wi kangrigayshan. Bot wen wi marid, wi mayn rispansabiliti da tu wi hozban er waif. Jehoava seh dat wahn hozban fi “jain op wid ih waif.” (Genesis 2:24) Wi hozban er waif feelinz shuda bee impoatant tu wi. Aks yuself: ‘Ai di gi mi mayt di taim, atenshan, ahn lov weh ih need ahn dizerv?ʼ

15. Wai marid Kristyanz noh fi geh tu kloas tu sombadi hoo da noh dehn hozban er waif?

¹⁵ If wi geh tu kloas tu sombadi hoo da noh wi hozban er waif, ih ku kaaz wahn lata prablemz eena wi marij. Di kloasa wi geh tu da persn, wi ku en op fi bee moa dan jos frenz, ahn den staat tu ga romantik feelinz far ahn. (Machyu 5:28) Dehndeh feelinz ku geh schranga ahn kaaz wi fi du sohnting weh wahn disrispek wi marij.

16. Weh koman di Baibl gi wi bowt marij?

¹⁶ Afta di Baibl seh: “Ga big rispek fi marij,” ih  seh: “Stay faytful tu unu hozban er waif, kaa Gaad wahn joj enibadi weh di sleep rong er weh di cheet pahn dehn hozban er dehn waif.” (Heebrooz 13:4; Proverbs 5:18) How wi ku shoa rispek fi di marij rilayshanship ahn noh dischrai it?

17. (a) How wahn lata peepl tudeh feel bowt adolchri? (b) How Kristyanz fi vyoo adolchri?

¹⁷ Nowadayz, wahn lata peepl noh stay faytful tu dehn marij paadna, ahn dehn noh tink notn rang wid dat. Wi kyaahn ga datdeh kaina atichood. Jehoava seh playn ahn schrayt dat hihn hayt sekshwal imoraliti an adolchri. (Reed Roamanz 12:9; Heebrooz 10:31; 12:29) If wi wuda ga seks wid sombadi hoo da noh wi hozban er waif, wi wuda di disrispek wi marij. Wi wuda di shoa dat wi noh rispek Jehoava standadz, ahn wi wuda damij wi rilayshanship wid hihn. Soh wi need fi avoid eevn di fos step weh ku kaaz wi fi komit adolchri. Dis inklood doti tinkin bowt wahn nada persn.—Job 31:1.

18. (a) Wai adolchri da laik di wership a faals gaad? (b) How Jehoava feel bowt adolchri?

¹⁸ Bak eena di dayz a di Izrelait dehn, adolchri da-mi wahn veri seeryos sin. Ih mi az seeryos az sombadi di wership faals gaad. Di ponishment fi dehnya too sin da-mi det. (Leviticus 20:2, 10) How adolchri da laik di wership a faals gaad? If wahn Izrelait mi wership wahn faals gaad, ih mi-di brok ih pramis fi bee faytful tu Jehoava. An if ih mi komit adolchri, ih mi-di brok ih pramis fi bee faytful tu ih mayt. (Exodus 19:5, 6; Deuteronomy 5:9; reed Malachi 2:14.)  Soh, ih klayr fi si dat tu Jehoava, adolchri da wahn seeryos sin.

19. Weh ku help wi fi mek op wi main fi noh komit adolchri?

¹⁹ How bowt tudeh? Wel, wi noh di liv bai di Laa a Moaziz, bot Jehoava stil feel di saym way bowt adolchri. Jos laik how wi fi stay laayal tu Jehoava ahn noh wership wahn faals gaad, da di saym way wi fi stay laayal tu wi marij paadna ahn noh cheet pan ahn. (Psalm 51:1, 4; Koloashanz 3:5) If wi noh stay faytful tu wi marij paadna, wi noh di rispek wi Gaad, Jehoava, ner wi marij.—Pleez goh da Noat 26 da di en a dis buk.

20. How wizdom ku benifit wahn marij?

²⁰ How yu ku mek yu marij schranga? Di Baibl seh: “Wizdom bil op wahn hows, ahn wid andastandin, yu ku sikyoar it.” (Proverbs 24:3) Wahn hows ku bee koal an emti er waam, komfatabl, ahn sikyoar. Da jos laik dat wid wahn marij. Wahn waiz persn wahn mek shoar dat ih marij sikyoar, plezant, ahn hapi.

21. How nalij ku mek wi marij beta?

²¹ Afta Proverbs 24:3 taak bowt how wizdom bil op wahn hows, vers 4 seh: “Wid nalij, yu ku ful op di room dehn wid aal kaina preshos ahn plezant tingz.” (Proverbs 24:4) Yu nalij, er weh yu noa fahn di Werd a Gaad, ku chaynj yu marij fi di beta. (Roamanz 12:2; Filipiyanz 1:9) Wen yu reed di Baibl lang  wid wi ada poblikayshan dehn az wahn kopl, diskos how unu ku yooz weh unu laan. Luk fi wayz how yoo ahn yu mayt ku shoa lov, rispek, ahn kainis tu wan anada, ahn wayz fi shoa dat unu di tink bowt wan anada. Aks Jehoava fi help yu ga di kwalitiz weh wahn schrentn yu marij ahn weh wahn mek it eeziya fi yu mayt lov yu.—Proverbs 15:16, 17; 1 Peeta 1:7.

22. Wai wi fi shoa lov, rispek, an aana tu wi marij mayt?

²² Wi need fi du evriting wi kud fi chreet wi hozban er waif wid lov, rispek, an aana. Den wi marij wahn bee moa lovin ahn schranga. Ahn di moas impoatant ting, wi wahn mek Jehoava hapi.—Psalm 147:11; Roamanz 12:10.