Tu evribadi hoo lov Jehoava an ih Werd, di Baibl:

Jeezas mi seh: “Unu wahn noa di chroot bowt Gaad, ahn da sayhn chroot wahn mek unu free fi chroo.” (Jan 8:32) Tink bowt how yu mi feel wen yu mi fos laan di chroot fahn di Baibl! Ih mi eksaitin fi noa dat wi ku laan di chroot eevn doa di werl ful op a loan lai.—2 Timoti 3:1.

Jehoava Gaad waahn wi noa di chroot. Ahn bikaaz wi lov peepl, wi waahn tel dehn bowt it. Bot wi need fi du moa if wi waahn serv Gaad. Wi haftu chrai wi bes fi liv az Kristyanz bikaaz wi rispek di prinsiplz weh Jehoava gi wi. Jeezas mi eksplayn wahn impoatant way how wi ku proov tu Gaad dat wi lov Ahn. Ih mi seh: “If unu du evriting weh Ah tel unu fi du, den unu wahn di kip aan di liv eena mai lov, jos laik how Ai du evriting weh mai Faada tel mi fi du an Ai kip aan di liv eena fi hihn lov.”—Jan 15:10.

Jeezas reeli lov ih Faada, ahn hihn du evriting ih Faada aks ahn fi du. If wi fala Jeezas egzampl eena di way wi liv, Jehoava wahn lov wi ahn wi wahn bee hapi. Da laik weh Jeezas mi seh: “Unu noa dehnya ting, soh du dehn, ahn Gaad wahn bles unu.”—Jan 13:17.

Wi hoap dat dis poblikayshan wahn help yu laan fi liv bai di chroot fahn di Baibl ahn fi bee Gaad fren. Wi pray dat yu wahn lov Gaad moa ahn moa, ahn dat yu wahn ‘kip yuself eena di lov a Gaad soh dat yu ku geh laif weh wahn neva en.ʼ—Jood 21.