1, 2. (a) Weh wahn man ahn wahn uman hoap fa wen dehn jos geh marid? (b) Wat da sohn kweschanz weh wi wahn diskos eena dis chapta?

IMAJIN wahn hapi braid ahn groom pahn dehn wedn day. Dehn soh eksaitid bowt dehn fyoocha, ahn dehn hoap fi du wahn lata wandaful tingz tugeda. Ahn dehn hoap fi ga wahn lang ahn hapi marij.

² Bot, wahn lata marij weh staat aaf gud noh stay da way. Fi mek wahn kopl ga wahn lang ahn hapi marij, dehn need gaidans fahn Gaad. Soh mek wi taak bowt how di Baibl ansa dehnya kweschan: Wat da som a di benifits a marij? Weh ku help yu fi mek wahn waiz disizhan bowt hoo fi marid? How yu ku bee wahn gud hozban er waif? Ahn weh ku help yu fi ga wahn lang ahn hapi marij?—Reed Proverbs 3:5, 6.

3. Yoo tink wahn persn need fi geh marid fi bee hapi? Pleez eksplayn yu ansa.

³ Som peepl feel dat di onli way fi bee reeli hapi da fi geh marid. Bot dis da noh chroo. Jeezas mi seh dat if wahn persn stay singl, dat ku bee wahn gif. (Machyu  19:11, 12) Ahn di apasl Paal mi seh dat singl peepl ga sertn advantij. (1 Korintyanz 7:32-38) Ih op tu yoo if yu waahn geh marid er nat. Noh mek yu frenz, famili, er kolcha presha yu fi geh marid.

4. Wat da som a di benifits a wahn gud marij?

⁴ Di Baibl seh dat marij da wahn gif fahn Gaad ahn dat ih ga benifits. Jehoava mi seh dis bowt di fos man, Adam: “Ih noh gud fi mek di man kantinyu fi liv bai ihself. Ah wahn mek wahn helpa far ahn, wahn persn weh wahn kompleet ahn.” (Genesis 2:18) Jehoava mi kriyayt Eev fi bee Adam waif, ahn dehn da-mi di fos hyooman famili. If wahn kopl ga chiljren, dehn marij fi bee wahn sayf plays weh dehn ku rayz dehn chiljren. Bot chiljren da noh di onli reezn fi geh marid.—Psalm 127:3; Ifeezhanz 6:1-4.

5, 6. How wahn marij ku bee laik “wahn roap wid chree schraan weh plat tugeda”?

⁵ King Salaman mi rait seh: “Too beta dan wan kaaz dehn ku ga wahn gud riwaad fi dehn haad werk. Kaaz if wan a dehn faal dong, di ada wan ku pik ahn op. Bot weh wahn hapm tu di persn weh faal dong ahn nobadi dehdeh fi help ahn get bak op? . . . Ahn wahn roap wid chree schraan weh plat tugeda kyaahn bos soh eezi.”—Ecclesiastes 4:9-12.

⁶ Wahn gud marij da wan a di kloasis frenship weh too peepl kuda eva gat. Dehn ku help, komfert, ahn protek wan anada. Lov ku mek wahn marij schrang, bot di marij wahn get eevn schranga if di hozban ahn waif wership Jehoava. Den dehn marij ku bee laik da roap. Wahn roap laik dis faar schranga dan wahn  roap weh onli ga too schraan. Wahn marij wahn bee schranga if Jehoava da paat a it.

7, 8. Weh advais Paal mi gi bowt marij?

⁷ Afta wahn kopl geh marid, dehn ku satisfai eech ada nachral sekshwal dizaiya. (Proverbs 5:18) Bot if wahn persn geh marid onli fi satisfai dehndeh dizaiya, ih noh mait mek wahn gud disizhan bowt hoo fi marid. Dats wai di Baibl seh dat wahn persn fi geh marid afta ih paas di taim eena ih laif wen sekshwal dizaiyaz schrang. (1 Korintyanz 7:36) Ih beta dat wahn persn wayt fi geh marid til afta dehndeh feelinz kaam dong. Den ih ku tink beta ahn mek wahn gud disizhan.—1 Korintyanz 7:9; Jaymz 1:15.

⁸ If yu di tink bowt geh marid, ih gud fi bee aanis ahn riyalaiz dat evri marij wahn ga prablemz. Di apasl Paal mi seh dat marid peepl wahn ga prablemz eena dehn marij. (1 Korintyanz 7:28) Eevn di bes marij wahn ga prablemz. Soh if yu disaid fi geh marid, mek shoar yu tek yu taim ahn mek wahn waiz disizhan.

9, 10. Weh wahn hapm if wi marid sombadi hoo noh wership Jehoava?

⁹ Di Baibl ga wahn impoatant prinsipl weh wi need fi memba wen wi di chooz wahn hozban er wahn waif. Ih seh: “Unu noh fi jain op wid nobadi weh noh bileev eena Jeezas.” (2 Korintyanz 6:14) Wi ku kompyaa marij tu wahn yoak. Dis da wahn pees a wud weh dehn put kraas too animal fi mek dehn werk tugeda. If dehndeh too animal ga difrent saiz er  schrent, wahn faama noh wahn yoak dehn tugeda fi mek dehn werk. Dat wudn bee kain tu di animal dehn kaaz di too a dehn wuda sofa. Jos laik dat, wahn marij bitween sombadi hoo wership Jehoava ahn sombadi hoo noh serv ahn ku en op wid lata prablemz. Soh di Baibl gi wi di waiz advais fi marid ‘sombadi weh bilangz tu di Laad.ʼ—1 Korintyanz 7:39.

¹⁰ Sohntaim, som Kristyanz feel dat dehn wuda rada marid sombadi hoo noh di wership Jehoava dan fi deh bai dehnself. Bot if wi noh lisn tu Baibl kongsl, wi ku kaaz wiself lata payn ahn wi noh wahn bee hapi. Bikaaz wi wership Jehoava, wi servis tu hihn da di moas impoatant ting eena wi laif. How yu wuda feel if yu kudn shayr da impoatant paat a yu laif wid yu mayt? Wahn lata bradaz ahn sistaz disaid fi stay singl insteda marid sombadi hoo noh lov ahn serv Jehoava.—Reed Psalm 32:8.

11. Weh ku help wi fi chooz wahn gud marij paadna?

¹¹ Dis noh meen dat enibadi weh di serv Jehoava wuda bee wahn gud hozban er waif fi yoo. If yu di tink bowt geh marid, luk fi sombadi weh yu reeli laik ahn hoo yu get lang wid. Wayt til yu fain sombadi hoo waahn du di saym tingz eena laif laik yoo ahn hoo put dehn servis tu Jehoava fos. Tek di taim fi reed ahn tink bowt aala di gud advais bowt marij weh di faytful slayv provaid eena di poblikayshan dehn.—Reed Psalm 119:105.

12. Weh wi ku laan fahn di Baibl akonk bowt wen Aybraham mi chooz wahn waif fi ih son?

¹² Eena som kolcha, ih kaman fi payrents chooz  wahn marij mayt fi dehn son er daata. Dehn feel dat payrents noa hoo wahn bee di bes paadna fi dehn chiljren. Dis da-mi wahn kaman kostom eena Baibl taimz tu. Soh if yu famili chooz fi fala wahn kostom laik dat, di Baibl ku help payrents noa weh fi luk fa. Fi egzampl, wen Aybraham mi-di chooz wahn waif fi ih son Aizak, hihn neva mi-di wori bowt di gyal bakgrong er if di famili mi ga moni er nat. Aybraham mi waahn Aizak waif fi bee sombadi hoo lov Jehoava; dis da-mi fi hihn mayn kansaan.—Genesis 24:3, 67; pleez goh da Noat 25 da di en a dis buk.

13-15. (a) How wahn man ku pripyaa fi bee wahn gud hozban? (b) How wahn uman ku pripyaa fi bee wahn gud waif?

¹³ If yu di tink bowt geh marid, mek shoar dat yu redi. Yu mait tink dat yu redi, bot mek wi taak bowt weh ih reeli meen fi bee redi fi marij. Di ansa mait sopraiz yu.

¹⁴ Di Baibl shoa dat wahn hozban ahn wahn waif ga difrent roal eena di famili. Soh ih mek sens dat wahn man er wahn uman wahn ga difrent tingz weh dehn need fi du if dehn waahn geh redi fi marij. If wahn man di tink bowt geh marid, ih need fi aks ihself if ih redi fi bee di hed a wahn famili. Jehoava ekspek wahn hozban fi luk afta ih waif ahn chiljren eena wahn mateeryal an imoashanal way. Ih need fi tek di leed eena dehn wership tu Gaad. Dis da di moas impoatant ting eena di famili. Di Baibl seh dat wahn man hoo noh tek kayr a ih famili “wosa dan sohnbadi weh noh bileev eena Krais.” (1 Timoti 5:8) Soh if yoo da wahn man weh di tink bowt geh marid, tink bowt how dis Baibl prinsipl ku help yu: “Pripyaa yu werk owtsaid, ahn get evriting eena di feel redi; den bil yu hows.” In ada werdz, bifoa yu geh marid, mek shoar dat yu ku bee di kaina hozban Jehoava ekspek yu fi bee.—Proverbs 24:27.

¹⁵ Wahn uman weh di tink bowt geh marid need fi aks ihself if shee redi fi tek aan di rispansabiliti a wahn waif ahn maybi eevn wahn ma. Di Baibl taak bowt wahn lata wayz how wahn gud waif ku tek kayr a ih hozban ahn chiljren. (Proverbs 31:10-31) Tudeh,  wahn lata man ahn uman onli tink bowt weh wahn marij mayt kuda du fi dehn. Bot Jehoava waahn wi tink bowt weh wee ku du fi wi mayt.

16, 17. Weh yu need fi tink bowt fos if yu waahn geh marid?

¹⁶ Bifoa yu geh marid, tink bowt weh Jehoava seh bowt wahn hozban ahn wahn waif. Eevn doa di hozban da di hed a di famili, ih noh fi bee wahn buli; in ada werdz, ih noh fi chaans op ih famili eena wahn fizikal er imoashanal way. Wahn gud famili hed fala Jeezas egzampl, hoo mi aalwayz lovin ahn kain tu di peepl weh hihn mi-di tek kayr a. (Ifeezhanz 5:23) Pahn di ada han, di uman need fi tink bowt how shee ku sopoat ih hozban ahn werk lang wid ahn. (Roamanz 7:2) Shee need fi aks ihself if ih ku bee hapi fi lisn ahn goh lang wid wahn man weh noh perfek, eevn if shee noh agree wid fi hihn disizhan dehn. If shee noh tink dat ih kud, den shee mait disaid dat ih beta fi mek ih stay singl fi rait now.

¹⁷ Di hozban ahn waif need fi tink moa bowt weh wahn mek eech ada hapi insteda di tink bowt dehnself. (Reed Filipiyanz 2:4.) Paal mi seh: “Evri hozban fi lov ih waif jos laik how ih lov ihself, ahn evri waif fi rispek ih hozban.” (Ifeezhanz 5:21-33) Di man ahn di uman need fi feel di lov ahn rispek fahn eech ada. Bot fi mek wahn marij werk gud, di man espeshali need fi noa dat ih waif rispek hihn, ahn di uman espeshali need fi feel dat ih hozban lov ahn.

18. Wai wahn kopl weh di geh fi noa wan anada need fi bee kyaaful a how dehn bihayv wid wan anada?

¹⁸ Wen too peepl di geh fi noa wan anada, da wahn  hapi taim fi di too a dehn. Da aalso wahn taim fi mek dehn bee reel an aanis soh dat dehn ku disaid if dehn reeli waahn spen di res a dehn laif tugeda. Joorin dis taim, wahn man ahn wahn uman laan fi lisn ahn taak tu wan anada ahn chrai fi fain owt weh deh eena di ada persn haat. Di schranga dehn rilayshanship get, di moa dehn wahn feel wahn fizikal achrakshan tu wan anada, ahn dis nachral. Bot dehn need fi kanchroal how dehn shoa dehndeh feelinz bifoa dehn geh marid soh dat dehn noh du sohnting imoaral.  Chroo lov wahn help dehn fi ga self-kanchroal ahn noh fi du sohnting weh ku damij dehn rilayshanship wid eech ada ahn wid Jehoava.—1 Tesaloanyanz 4:6.

19, 20. How Kristyanz feel bowt marij?

¹⁹ Wahn lata buk ahn moovi en wid wahn big, hapi wedn. Bot eena reel laif, di wedn day da onli di biginin. Jehoava waahn di rilayshanship bitween wahn hozban an ih waif fi laas az lang az dehn liv.—Genesis 2:24.

²⁰ Wahn lata peepl tudeh noh seeʼt da way, kaaz ih eezi fi geh marid an ih eezi fi geh divoas. Som peepl feel dat wen prablemz staat, da taim fi lef dehn mayt an en di marij. Bot memba di egzampl a di schrang roap wid chree schraan. Wahn roap weh plat tugeda laik dis noh wahn bos eevn wen ih deh anda lata presha. Jos laik dat, wi ku ga wahn lang ahn hapi marij if wi luk tu Jehoava fi help. Jeezas mi seh: “Noh mek nobadi separayt weh Gaad don jain tugeda.”—Machyu 19:6.

21. Weh wahn help wahn hozban ahn waif fi lov wan anada?

²¹ Aala wi ga tingz weh wi gud pan, an aala wi ga wi tingz weh wi need fi werk pan tu. Ih eezi fi foakos pahn weh ada peepl need fi werk pan, espeshali weh wi hozban er waif need fi werk pan. Bot if wi du dis, wi noh wahn bee hapi ataal. Pahn di ada han, if wi foakos pahn di gud eena wi mayt, wi ku ga wahn hapi marij. Yu tink ih reeli pasabl fi foakos pahn di  gud eena wi mayt? Yes, ih pasabl! Jehoava noa dat wi noh perfek, yet hihn foakos pahn di gud eena wee. Imajin if hihn onli mi-di foakos pahn di bad! Di saamis mi seh: “Oa Jah, if wi mistayk dehn da di onli ting yu wach, Oa Jehoava, hoo kuda eva stan op fronta yu.” (Psalm 130:3) Wahn hozban ahn waif ku fala Jehoava egzampl ahn luk fi di gud eena dehn mayt ahn bee kwik fi fagiv.—Reed Koloashanz 3:13.

22, 23. How Aybraham ahn Sayra mi set wahn gud egzampl fi marid peepl?

 ²² Az di yaaz goh bai, wahn marij ku geh schranga. Fi egzampl, Aybraham ahn Sayra mi ga wahn lang ahn hapi marij. Wen Jehoava mi tel Aybraham fi lef dehn hoam eena di siti a Er, ih pasabl dat Sayra mi moa dan 60 yaaz oal. Dat mi veri haad fi shee kaaz ih mi haftu lef ih nais ahn komfatabl hoam fi liv eena tent. Bot Sayra da-mi wahn gud fren ahn paadna tu ih hozban, ahn shee mi reeli rispek ahn. Soh shee sopoat Aybraham disizhan dehn ahn werk lang wid ahn soh dat dehn kuda mi ga sokses.—Genesis 18:12; 1 Peeta 3:6.

²³ Af koars, dis noh meen dat wahn hozban ahn waif wahn aalwayz agree pahn evriting. Wahn taim, Aybraham neva agree wid Sayra pahn sohnting, ahn Jehoava tel Aybraham: “Lisn tu ahn.” Soh ih lisn, ahn tingz mi gaan gud fi dehn. (Genesis 21:9-13) Soh if sohntaim yoo ahn yu mayt noh agree bowt sohnting, noh geh diskorij. Di impoatant ting da fi stil chreet wan anada wid lov ahn rispek eevn wen unu noh agree bowt sohnting.

24. How wi marij ku bring aana tu Jehoava?

²⁴ Towznz a hapi marid kopl deh monks Jehoava peepl tudeh. If yoo waahn geh marid, memba dat di disizhan fi chooz yu mayt wahn bee wan a di moas impoatant disizhan yu wahn eva mek. Ih wahn afek di res a yu laif, soh luk tu Jehoava fi gaidans. Den yu wahn ku chooz wahn gud mayt, pripyaa gud fi marij, ahn werk fi ga wahn schrang ahn lovin rilayshanship wid yu mayt weh wahn bring aana tu Jehoava.