CHAPTA 5
Noh Get Involv Eena di Tingz a Dis Werl
‘Unu noh fi stan laik dis werl.ʼ—JAN 15:19.
1. Weh Jeezas mi-di wori bowt pahn di nait bifoa ih ded?
PAHN di nait bifoa Jeezas mi ded, ih mi-di wori bowt weh mi wahn hapm tu ih disaipl dehn afta ih goh bak da hevn. Soh ih tel dehn seh: ‘Unu noh fi stan laik dis werl.ʼ (Jan 15:19) Layta, ih mi pray tu ih Faada bowt dehn. Ih seh: “Jos laik how Ai noh bilangz tu dis werl, dehn noh bilangz tu it needa.” (Jan 17:15, 16) Weh Jeezas mi meen wen ih seh dat?
2. Weh Jeezas mi meen wen ih yooz di werdz “dis werl”?
2 Weh Jeezas mi meen wen ih yooz di werdz “dis werl”? Ih mi-di rifaa tu di peepl hoo noh noa Gaad ahn weh deh anda Saytan kanchroal. (Jan 14:30; Ifeezhanz 2:2; Jaymz 4:4; 1 Jan 5:19) How wee ku shoa dat wi “noh bilangz tu dis werl”? Eena dis chapta, wi wahn taak bowt faiv way: (1) Wen wi stay laayal tu Gaad Kingdom ahn stay nyoochral tuwaadz di palitiks a dis werl. (2) Wen wi rijek di spirit a di werl. (3) Wen wi jres eena wahn deesent way ahn pay main tu how wi fiks op wiself. (4) Wen wi ga di rait atichood bowt moni. (5) Wen wi kip aan wi spirichwal aiyan soot weh Gaad gi wi.—Pleez goh da Noat 16 da di en a dis buk.
BEE LAAYAL TU GAAD KINGDOM
3. How Jeezas mi vyoo palitiks?
3 Wen Jeezas mi deh pahn di ert, hihn mi si dat peepl laif ful op a prablemz ahn dat tingz neva eezi fi dehn. Hihn mi reeli kay bowt dehn an ih mi waahn help dehn. Soh weh ih mi du? Yu tink ih mi get involv eena palitiks fi bee wahn leeda ahn help dehn? No, ih neva du dat! Jeezas mi noa dat da onli Gaad Kingdom ku help dehn. Dats wai ih mi foakos pahn preech bowt di Kingdom a Gaad, di govament weh hihn mi wahn rool az King. (Daniel 7:13, 14; Look 4:43; 17:20, 21) Jeezas mi aalwayz stay nyoochral. Dis meenz dat ih neva get involv eena di palitiks a dis werl. Wen Jeezas mi deh fronta Ponchos Pailat, di Roaman Govna, ih seh: “Ai noh rool laik dehn king weh rool pahn dis ert.” (Jan 18:36) Fi hihn disaipl dehn mi stay nyoochral tu. Di buk weh naym On the Road to Civilization seh dat bak den, Kristyanz “wuda neva ron fi palitiks.” Tudeh, chroo Kristyanz du di saym ting. Wi stay nyoochral ahn noh get involv eena palitiks. Wi onli sopoat Gaad Kingdom.—Machyu 24:14.
Yoo ku eksplayn wai yu sopoat Gaad Kingdom?
4. How chroo Kristyanz sopoat Gaad Kingdom?
4 Wahn ambasada da wahn persn weh reprizent ih govament eena wahn nada konchri, ahn bikaaz a dat, ih noh get involv eena di palitiks a di konchri weh ih werk. Di anointid, weh ga di hoap fi goh rool lang wid Krais da hevn, da jos laik da ambasada. Dats wai Paal tel di anointid Kristyanz: “Krais sen wee fi taak tu unu fi hihn [er, “ambasada fi Krais,” NW].” (2 Korintyanz 5:20) Soh bikaaz di anointid reprizent Gaad Kingdom, dehn noh get involv eena di palitiks a dis werl. (Filipiyanz 3:20) Insteda dat, di anointid di help milyanz a peepl fi laan bowt Gaad govament. Ahn di “ada sheep,” weh ga di hoap fi liv fareva pahn di ert, sopoat di anointid ahn stay nyoochral tu. (Jan 10:16 NW; Machyu 25:31-40) Soh den, no chroo Kristyan wuda eva get involv eena palitiks.—Reed Isaiah 2:2-4.
5. Wat da wan reezn wai Kristyanz noh goh da waar?
5 Aal oava di werl, chroo Kristyanz si dehn felo bileevaz az wan famili. Dehn yoonaitid noh mata weh konchri er bakgrong dehn kom fram. (1 Korintyanz 1:10) If wee wuda goh da waar, dat wuda bee laik wi di fait gens wi oan famili, wi oan bradaz, weh Jeezas mi koman wi fi lov. (Jan 13:34, 35; 1 Jan 3:10-12) Pahn tap a dat, Jeezas mi eevn tel ih disaipl dehn fi lov dehn enimi.—Machyu 5:44; 26:52.
6. Weh ih meen fi “gi Gaad weh bilangz tu Gaad”?
6 Az Kristyanz, wi haftu stay nyoochral. Saym taim doh, wi werk haad fi bee wahn gud sitizn eena di konchri weh wi liv. Fi egzampl, wi shoa rispek fi di govament wen wi pay wi taks an obay di laa dehn. Bot wi aalwayz mek shoar dat wi “gi Gaad weh bilangz tu Gaad!” (Maak 12:17; Roamanz 13:1-7; 1 Korintyanz 6:19, 20) Di tingz weh “bilangz tu Gaad” da wi lov fi hihn, wi wership, ahn wi obeedyans. Di Baibl eevn tel wi: “Weda wi liv er weda wi ded, wi bilangz tu di Laad.” Soh, wi wuda rada giv op wi laif dan fi disobay Jehoava.—Look 4:8; 10:27; reed Aks 5:29; Roamanz 14:8.
RIJEK DI SPIRIT A DI WERL
7, 8. Wat da di spirit a di werl, ahn how dat afek peepl?
7 Wahn nada way wi ku shoa dat wee da noh paat a Saytan werl da wen wi noh alow di spirit a di werl fi kanchroal wi. Di spirit a di werl di rifaa tu di atichood ahn wayz weh kohn fahn Saytan. Hihn waahn peepl tink an ak laik hihn, ahn wi si dis atichood eena di peepl weh noh di serv Jehoava. Bot Kristyanz rijek da atichood. Dats wai Paal mi tel di Kristyanz: ‘Wee noh tink an andastan tingz laik di peepl dehn eena dis werl, bikaaz Gaad gi wee fi hihn Hoali Spirit.ʼ—1 Korintyanz 2:12; Ifeezhanz 2:2, 3; pleez goh da Noat 17 da di en a dis buk.
8 Di spirit a di werl kaaz peepl fi bee selfish, prowd, ahn ribelyos. Ih mek dehn tink dat dehn noh need 1 Jan 2:16; 1 Timoti 6:9, 10) Di Devl di chrai haad fi chrik servants a Jehoava fi tink laik hihn.—Jan 8:44; Aks 13:10; 1 Jan 3:8.
fi obay Gaad. Saytan waahn peepl du wateva dehn waahn ahn noh tink bowt di bad rizolt aftawodz. Hihn waahn peepl bileev dat ‘di plezha weh di badi di los aafa, an aal di ting dehn weh peepl si ahn waahnʼ da di moas impoatant tingz eena laif. (9. How di spirit a di werl ku afek wi?
9 Laik di ayaa weh wi breed, di spirit a di werl deh aal rong wi. If wi noh deh pahn wi gyaad, da spirit ku afek wi. (Reed Proverbs 4:23.) Ih ku staat widowt wi eevn noatis. Fi egzampl, wi ku staat tu tink an ak laik peepl hoo noh wership Jehoava. (Proverbs 13:20; 1 Korintyanz 15:33) Er ih ku afek wi chroo poarnografi, kantak wid apastayts, er spoats weh peepl kompeet wid wan anada ahn shoa wahn bad atichood.—Pleez goh da Noat 18 da di en a dis buk.
10. How wi ku mek shoar dat di spirit a di werl noh kanchroal wi?
10 Soh den, how wi ku mek shoar dat di spirit a di werl noh kanchroal wi? Wi need fi stay kloas tu Jehoava an alow fi hihn wizdom fi gaid wi. Wi need fi kip aan di pray fi Gaad hoali spirit ahn stay bizi eena wi servis tu hihn. Fi shoar, az di moas powaful Persn eena di yoonivers, Jehoava ku help wi fi fait di spirit a di werl.—1 Jan 4:4.
AANA GAAD BAI DI WAY YU JRES
11. How di spirit a di werl afek di way peepl jres?
11 Wi shoa dat wi da noh paat a di werl bai di way wi jres ahn fiks op wiself. Di kaina kloaz weh wahn lata
peepl eena di werl wayr da jos fi jraa atenshan tu dehnself, fi mek adaz tink bad taats, fi shoa wahn ribelyos atichood, er jos fi shoa aaf humoch moni dehn gat. Pahn di ada han, ada peepl noh kay bowt how dehn luk, dehn chooz fi luk doti. Wi shudn mek di atichood a di werl afek di way wi jres ahn fiks op wiself.Ai aana Jehoava eena di way Ah jres?
12, 13. Wich Baibl prinsiplz ku help wi chooz deesent kloaz?
12 Az servants a Jehoava, wi aalwayz waahn yooz kloaz weh neet, kleen, deesent, ahn weh soot di okayzhan. Wi jres eena wahn “sensabl ahn deesent” 1 Timoti 2:9, 10; Jood 21.
way weh shoa dat wi “lov Gaad.”—13 Di way wi jres ku afek di way how adaz feel bowt Jehoava an ih peepl. Soh wi waahn “du evriting eena soch a way dat Gaad geh di gloari far it.” (1 Korintyanz 10:31) Wahn persn weh jres eena wahn sensabl ahn deesent way set wahn gud egzampl fi adaz. Soh bifoa wi chooz wi kloaz er disaid how fi fiks op wiself, wi need fi memba dat wi chois ku afek adaz.—1 Korintyanz 4:9; 2 Korintyanz 6:3, 4; 7:1.
14. Weh kweschanz wi need fi aks wiself bifoa wi chooz wi kloaz fi goh da wi meetin dehn er pahn feel servis?
14 Bifoa wi chooz wi kloaz fi goh da meetin er feel servis, wi need fi aks wiself dehnya kweschanz: ‘Di kaina kloaz weh Ah wayr jraa tu moch atenshan tu miself? Adaz feel shaym wen dehn si how Ah jres? Ai feel dat di way how Ah jres da nobadi els bizniz?ʼ (Filipiyanz 4:5; 1 Peeta 5:6) Af koars, ih onli nachral fi mek wi waahn luk gud, bot di tingz weh reeli mek wi luk gud da wi Kristyan kwalitiz. Dehnya kwalitiz da weh Jehoava noatis wen ih luk pahn wi. Dehn shoa da hoo wi pahn di eensaid; di Baibl seh: “Yu byooti fi kohn fahn eensaida yu. . . . Eena Gaad sait dat da di byooti weh preshos.”—1 Peeta 3:3, 4.
15. Wai Jehoava noh gi wi wahn lis a roolz weh tel wi how fi jres ahn fiks op wiself?
15 Jehoava noh gi wi wahn lis a roolz fi tel wi weh kaina kloaz fi wayr er how fi fiks op wiself. Insted, hihn gi wi Baibl prinsiplz fi help wi mek gud disizhanz. (Heebrooz 5:14) Ih waahn wi lov fi hihn ahn fi ada peepl bee di reezn wai wi mek wi disizhanz, noh kay if dehn big er smaal. (Reed Maak 12:30, 31.) Jehoava peepl aal oava di werl jres difrent dipendin pahn dehn kolcha er weh dehn laik, az lang az ih deesent. Ahn dis da wahn reeli byootiful ting fi si.
DI RAIT ATICHOOD BOWT MONI
16. Wat da di difrens bitween how di werl feel bowt moni ahn weh Jeezas teech bowt moni? Weh kweschanz wi ku aks wiself?
16 Saytan waahn peepl bileev dat moni ahn mateeryal tingz da weh wahn mek dehn hapi. Bot servants a Jehoava noa dat dis da wahn big lai. Rada, wi chros Jeezas werdz wen ih seh: “Noh bikaa yu oan wahn lata Look 12:15) Moni kyaahn gi wi chroo hapinis, chroo frenz, pees a main, er evalastin laif. Af koars, wi need sertn mateeryal tingz fi liv, ahn wi waahn injai laif. Bot Jeezas mi teech wi dat wi wahn bee hapi if wi mek wi rilayshanship wid Jehoava bee di moas impoatant ting eena wi laif. (Machyu 5:3; 6:22) Soh fi help wi ga di rait vyoo bowt moni, wi ku aks wiself dehnya kweschanz: ‘Mai atichood tuwaadz moni difrent fahn di peepl a dis werl? Ai aalwayz di tink er taak bowt moni?ʼ—Look 6:45; 21:34-36; 2 Jan 6.
tingz dat meen dat yu wahn liv wahn lang ahn hapi laif.” (17. How wi laif geh beta wen wi rijek di atichood weh di werl ga bowt moni?
17 Wen wi rijek di atichood weh di werl ga tuwaadz moni ahn foakos wi laif pahn serv Jehoava, wi laif wahn ga moa meenin. (Machyu 11:29, 30) Wi wahn feel satisfai ahn ga chroo pees eena wi haat ahn main. (Machyu 6:31, 32; Roamanz 15:13) Wi noh wahn di wori tu moch bowt moni. (Reed 1 Timoti 6:9, 10.) Ahn wi wahn injai di blesin weh kohn wen wi giv tu adaz. (Aks 20:35) Wen wi liv dis way, wi wahn ga moa taim fi spen wid di peepl wi lov, ahn wi mait eevn sleep beta.—Ecclesiastes 5:12.
DI SPIRICHWAL AIYAN SOOT
18. Weh Saytan di chrai du tu wi?
18 Wi haftu du evriting wi kud fi protek wi rilayshanship wid Jehoava, kaaz Saytan di chrai dischrai it. Di Baibl seh: “Wi di fait gens dehn powa weh wi kyaahn si, di eevl spirit dehn.” (Ifeezhanz 6:12) Saytan an ih deemonz noh waahn wi bee hapi ner liv fareva. (1 Peeta 5:8) Dehnya powaful enimi di fait gens wi, bot az lang az wi ga Jehoava help, wee ku win di fait!
19. How Ifeezhanz 6:14-18 diskraib di spirichwal aiyan soot weh Kristyanz wayr fi protek dehnself?
19 Eena Baibl taimz, di soalja dehn yoostu wayr wahn aiyan soot fi protek dehnself joorin waar. Jos laik dat, wi haftu wayr wi spirichwal aiyan soot weh Jehoava gi wi fi protek wiself. (Ifeezhanz 6:13) Da Ifeezhanz 6:14-18, ih tel wi moa bowt dis aiyan soot: ‘Soh den, fi stan op schrang gens di Devl, mek di chroot bee laik di belt weh unu faasn rong unu ways. Ahn mek di aiyan ves weh kova yu ches stan fi di rait way unu fi du tingz. Ahn unu fi bee redi fi preech di Gud Nyooz a pees weh Gaad gi, ahn mek dat bee laik di shooz weh unu fi put aan pahn unu fut. Den, mek unu fayt eena Jeezas Krais bee laik wahn sheel weh unu kehr. Wid dis sheel unu wahn kud blak aal di aro dehn wid faiya da en, weh di eevl wan di shoot aata unu. Unu fi mek di salvayshan weh Gaad gi protek unu laik wahn helmit weh unu di wayr pahn unu hed. Ahn mek di Werd a Gaad, weh di Hoali Spirit gi unu, bee laik wahn soad fi fait gens di enimi. Pray aal di taim an aks Gaad fi help yu. Aks Gaad Spirit fi help yu pray.ʼ
20. Weh wi haftu du soh dat dis spirichwal aiyan soot help wi?
20 If wahn soalja faget pees a ih soot ahn lef paat a ih badi widowt protekshan, dat wahn bee di saym spat wehpaat di enimi wahn atak. If wi waahn fi wee spirichwal aiyan soot protek wi, wi haftu put aan aala di difrent pees dehn. Wi need fi wayr it aal di taim ahn tek gud kayr a it tu. Wi fait wahn kantinyu Revilayshan 12:17; 20:1-3) Soh if wi di fait gens sohn rang feelinz er if wi di schrogl wid wahn weeknis, wi shudn giv op!—1 Korintyanz 9:27.
til Saytan ahn fi hihn deemonz geh dischrai. (21. How wi ku win wi fait?
21 Pahn wi oan, wi noh schranga dan di Devl. Bot wans wi ga Jehoava pahn wi said, wi ku win di fait. Fi stay faytful tu Jehoava, wi need fi pray tu ahn, stodi ih Werd, ahn kip kompni wid wi bradaz ahn sistaz. (Heebrooz 10:24, 25) Wans wi du dehndeh tingz, wi wahn ku stay laayal tu Gaad ahn bee redi fi stan op fi weh wi bileev.
BEE REDI FI STAN OP FI WEH YU BILEEV
22, 23. (a) Wat da sohn kweschanz wi ku aks wiself fi si if wi redi fi stan op fi wi bileef dehn? (b) Weh wi wahn taak bowt eena di neks chapta?
22 Wi need fi aalwayz bee redi fi stan op fi wi bileef dehn. (Jan 15:19) Pahn sertn ishu, Jehoava Witnisiz bileev sohnting difrent fahn moas peepl. Soh aks yuself: ‘Ai reeli andastan wai dis da mai bileef? Ai shoar dat weh di Baibl ahn di faytful ahn diskreet slayv seh karek? (Machyu 24:45; Jan 17:17) Ai prowd fi bee wan a Jehoava Witnisiz? (Psalm 34:2; Machyu 10:32, 33) Ai ku eksplayn weh Ai bileev tu ada peepl?ʼ—Reed 1 Peeta 3:15.
23 Eena wahn lata sichuwayshan, ih eezi fi si weh wi need fi du fi kip separayt fahn di werl. Bot sohntaim, ih noh soh eezi. Ahn Saytan chrai yooz lata difrent wayz fi chrap wi. Wan a di chrap weh hihn yooz da entataynment. Eena di neks chapta, wi wahn si how wee ku chooz di rait entataynment.