HOW FI STAAT WAHN KANVASAYSHAN
LESN 5
Shoa Rispek
Prinsipl: “Aalwayz bee redi fi difen unu hoap fronta evribadi, . . . bot mek shoar fi bee jentl ahn shoa deep rispek.”—1 Peet. 3:15.
Weh Paal Mi Du
1. Wach di VEEDYO, er reed Aks 17:22, 23. Den aks yuself dehnya kweschanz:
-
How Paal mi feel wen ih si dat di peepl da Atenz mi-di wership faals gaadz?—Si Aks 17:16.
Weh Wi Laan Fahn Paal?
2. Peepl wahn moa lisn tu wi if wi tek di taim fi tink bowt weh wi seh, how wi seh it, ahn wen wi seh it.
Bee Laik Paal
3. Yooz di rait werdz. Fi egzampl, if yu di taak tu sohnbadi weh noh yooz di Baibl er noh bileev eena it, yu mait need fi chaynj di way yu wuda naamali inchrojoos di Baibl er how yu wuda taak bowt Jeezas soh dat dehn ku andastan weh yu di seh er yu noh ofen dehn.
4. Noh hori fi tel di persn dat weh ih bileev eena rang. Mek di persn taak ahn noh bot een. If ih seh sohnting weh di Baibl noh agree wid, noh aagyu wid ahn. (Jay. 1:19) Wen yu lisn tu ahn, yu wahn ku andastan weh ih bileev ahn wai ih bileev it.—Prov. 20:5.
5. Chrai fain sohnting yu ku agree wid ahn komen di persn. Di persn mait reeli tink dat weh ih bileev eena da di chroot. Soh taak bowt sohnting weh di too a unu ku agree pan, ahn den oava taim help ahn fi andastan weh di Baibl teech.
