Wi Dyaa Bradaz ahn Sistaz:

Lov fi Gaad ahn fi peepl moov wi fi goh ahn teech peepl fahn aala di nayshan dehn fi bee Jeezas disaipl, ahn baptaiz dehn. (Mach. 28:​19, 20; Maak 12:​28-31) If wi ga dis kaina lov fi peepl, wi ku help dehn wan weh ga di “rait haat kandishan fi get evalastin laif.”—Aks 13:48.

Eena di paas wi mi foakos pahn di memoraiz wi prezentayshan dehn ahn di lef lichricha. Bot now wi need fi werk pahn di ga beta kanvasayshan wid peepl. Wi waahn shoa lov fi adaz wen wi taak bowt tapiks weh dehn inchrestid eena. Dat meenz wi wahn bee wilin fi chaynj ahn kansida weh eech persn inchrestid eena ahn di tink bowt. How dis broashoar wahn help wi du dat?

Dis broashoar ga 12 lesn weh teech wi bowt kwalitiz wi need soh wi ku shoa lov fi peepl ahn teech dehn fi fala Jeezas. Eech lesn bays pahn wahn Baibl akonk weh foakos pahn wahn kwaliti weh Jeezas er wahn fers-senchri Kristyan mi shoa eena di minischri. Wi goal da noh fi memoraiz weh wi wahn seh, bot fi luk fi wayz fi shoa lov fi peepl. Eevn doa wi need aala dehnya kwalitiz fi wi minischri, wi wahn foakos pahn how impoatant som a dehn wen wi di staat kanvasayshan, mek ritern vizits, er kandok Baibl stodiz.

Wail yu goh chroo eech lesn, tink bowt how yu ku shoa dehnya kwalitiz wen yu di taak tu peepl eena yu ayrya. Chrai mek yu lov fi Jehoava ahn fi peepl geh schranga. Moa dan eniting els, dis lov wahn help yu reech yu goal fi mek disaiplz.

Wi apreeshiayt di wandaful privilij wi ga fi werk shoalda tu shoalda wid yu. (Zeph. 3:9) Wi pray dat Jehoava bles yu wahn lat az yu kantinyu shoa lov fi peepl ahn teech dehn fi fala Jeezas!