Jehoava da di bes Teecha eena di hoal yoonivers, an ih di invait wi fi teech adaz bowt hihn. Eena fi hihn Werd ih seh: ‘Unu fi teech ada peepl.ʼ (Heeb. 5:12) Wen wi geh wahn asainment fi teech di chroot, weda da eena wi famili, di kangrigayshan, er di minischri, wi fi seeʼt az wahn privilij ahn wahn big rispansabiliti. Soh, weh ku help wi fi reech di goal fi bee gud teechaz?

Wel, mek wi si weh di apasl Paal mi tel Timoti. Ih mi tel ahn: “Yu fi mek shoar fi reed Gaad Werd tu di peepl dehn, ahn fi eksplayn it tu dehn ahn teech dehn weh Gaad seh.” Den Paal tel ahn: “Yu noh fi stap du dehn tingz ya, bikaaz if yu kip aan di du dehn, yu wahn sayv dehn wan weh di lisn tu yu, ahn yuself tu.” (1 Tim. 4:13, 16) Di mesij weh wi ga fi shayr wid adaz ku sayv dehn laif. Soh ih impoatant fi mek yu aalwayz chrai fi du beta eena yu reedin ahn teechin. Dis broashoar wahn help yu fi du dat. Noatis how ih set op.

Jehoava da di “Graytis Teecha.” (Isa. 30:20) Di perpos a dis broashoar da fi help yu reed ahn teech beta. Bot neva faget dat wi mesij kohn fahn Jehoava ahn dat da hihn di jraa peepl. (Jan 6:44) Soh den, pray aal di taim fi hoali spirit. Aalwayz rifaa bak tu di Werd a Gaad. Jraa atenshan tu Jehoava, noh tu yuself. Ahn chrai fi help yu aadyans fi ga wahn deep lov fi Gaad.

Jehoava di invait yu fi teech di moas impoatant mesij eena dis werl rait now. Wi noa dat yu wahn ga sokses kaaz yu di pen pahn “di schrent weh Gaad gi yu.”—1 Peet. 4:11.

Yu felo teechaz,

Govanin Badi a Jehoava Witnisiz