Lata peepl tink dat Jehoava Witnisiz da wahn nyoo rilijan. Bot, Jehoava di kaal fi hihn chroo servant dehn fi hihn “witnisiz” fi oava 2,700 yaaz now. (Isaiah 43:10-12) Op til 1931, peepl mi noa wi az Baibl Styoodents. Wai wi mi staat yooz di naym Jehoava Witnisiz?

Ih shoa evribadi hoo da fi wee Gaad. Akaadn tu sohn oal skroal, Gaad naym, Jehoava, deh eena di Baibl towznz a taim. Bot, dehn tek owt Gaad naym fahn wahn lata chranslayshan ahn put een sohn taitl, laik Gaad er Laad. Gaad mi tel Moaziz dat fi hihn persnal naym da Jehoava. Ih mi seh: “Dis da mai naym fareva.”(Exodus 3:15) Eena dis way, hihn mi separayt ihself fahn di faals gaad dehn. Wi prowd fi yooz Gaad hoali naym.

Ih diskraib weh wi du. Di Baibl ga wahn lang lis a raichos peepl weh mi gi wahn witnis bowt dehn fayt eena Jehoava. Aybl da-mi di fos wan, den az di yaaz gaan bai, peepl laik Noawa, Aybraham, Sayra, Moaziz, Dayvid, an adaz mi jain dis ‘big krowd a witnis.’ (Heebrooz 11:4–12:1) Jos laik wen sohnbadi stan op da koat az wahn witnis fi wahn inosent persn, sayhn way, wi don mek op wi main fi tek wi stan fi tel ada peepl di chroot bowt fi wee Gaad.

Wi di kapi Jeezas egzampl. Di Baibl seh dat hihn da “di Wan wi ku chros fi chroo ahn weh di taak di chroot aal di taim bowt Gaad [“faytful ahn chroo witnis,” NW].” (Revilayshan 3:14) Jeezas ihself mi seh dat hihn teech adaz ‘bowt Gaad wandaful naym,’ ahn dat ih kip aan di ‘taak di chroot’ bowt Gaad. (Heebrooz 2:12; Jan 18:37) Soh Jeezas chroo falowaz need fi yooz Jehoava naym ahn tel adaz bowt it tu. Dis da wat wee az Jehoava Witnisiz di chrai wi bes fi du.

• Wai di Baibl Styoodents mi staat yooz di naym Jehoava Witnisiz?

• How lang now sins Jehoava ga witnisiz pahn di ert?

• Hoo da di graytis Witnis fi Jehoava?