Imajin dis: Karen da wahn yong gyal weh noh 18 yet. Shee mi deh da wahn paati fi bowt 10 minits wen sombadi weh ih noa gud kom op fahn bihain ahn an seh:

Karen ton rong ahn si ih fren Jesika di hoal too batl eena ih han. Shee noa seh dat dehn gat een lika. Jesika hoal wan a di batl rait fronta Karen fays ahn seh, “Gyal, noh tel mi yu tu yong fi tek wahn lee jrink!”

Karen noh waahn tek di jrink, bot Jesika da ih bes fren. Ahn Karen noh waahn ih fren tink dat shee boarin. Pahn tap a dat, Jesika da wan a di gud gyal dehn. Ahn soh if shee di jrink, den maybi ih noh soh bad. ‘Da jos wahn lee jrink,’ Karen tel ihself. ‘Da noh laik if Ah di tek jrogz.’

If yoo da-mi Karen, weh yoo wuda du?

Fi mek wahn waiz disizhan eena dehnya kaina sichuwayshan, yu need fi ga wahn aidentiti. Wahn aidentiti da sohnting weh tel yu da hoo yoo ahn weh yu stan fa. Wen yu noa dat, yu ga di powa fi kanchroal yu laif insteda mek ada peepl kanchroal it fi yu.—1 Korintyanz 9:26, 27.

How yu ku geh da kaina schrent? Wahn gud staat da fi geh di ansa tu dehnya kweschan.

Wen yu noa weh yu gud pan ahn weh peepl wuda laik bowt yu, yu wahn ga moa kanfidens.

BAIBL EGZAMPL: Di apasl Paal mi rait seh: “Ah mait kyaahn taak az gud az dehn, bot Ah noa az moch az dehn.” (2 Korintyanz 11:6) Sayka weh hihn mi andastan di Skripchaz gud, Paal kuda mi stay schrang wen ada peepl chalenj ahn. Hihn neva mek di negitiv tingz weh dehn mi-di seh bowt ahn bring dong fi hihn kanfidens.—2 Korintyanz 10:10; 11:5.

EGZAMIN YUSELF: Rait dong wahn talent er wahn skil weh yu ga.

Now diskraib weh peepl wuda laik bowt yu di moas. (Fi egzampl, if yu kay bowt adaz, if yu noh stinji, if peepl ku pen pahn yu, if yu aalwayz deh pahn taim.)

If wahn chayn ga wahn week link, den di hoal chayn wahn week. Sayhn way, yu hoal aidentiti ku chaynj fi di wers if yu mek yu weeknis kanchroal yu laif.

BAIBL EGZAMPL: Paal mi noa wat da fi hihn weeknis. Ih mi rait seh: “Eena mi haat Ah hapi wid di Laa weh kohn fahn Gaad. Bot Ah si seh dat mi badi di fala wahn difrent laa; ih di fait gens di laa eena mi main. Dat mek Ah bee laik wahn prizna tu di laa weh mi badi di fala, weh di mek Ah sin.”—Roamanz 7:22, 23.

EGZAMIN YUSELF: Naym di weeknis weh yoo need fi laan fi kanchroal.

Yoo wuda get eena wahn taksi ahn tel di jraiva fi jos jraiv rong ahn rong til di kaar ron owta gyas? Dat wuda bee schupid—ahn ekspensiv, noh chroo?

Wat da di lesn? If yu noh ga goalz, den da laik if yu laif di goh rong ahn rong eena serkl. Bot if yu ga gud goalz, den yu don noa weh yu gwehn ahn how yu wahn get deh.

BAIBL EGZAMPL: Paal mi seh: “Dat da wai Ai ron schrayt fi di finishin lain.” (1 Korintyanz 9:26) Insteda jos float chroo laif ahn tek tingz az dehn kohn, Paal set goalz fi ihself ahn stik tu dehn. —Filipiyanz 3:12-14.

EGZAMIN YUSELF: Rait dong 3 goalz weh yu wuda waahn reech eena di neks yaa.

If yu noh ga schrang bileef, yu wahn kyaahn mek op yu main bowt eniting. Yu wahn chaynj jos fi blen een wid hoo yu deh rong, jos laik wahn lizad weh chaynj ih kala. Dis da wahn sain dat yu noh ga yu oan aidentiti.

Bot, wen yu akshanz bays pahn weh yu bileev, yu wahn kip yu oan aidentiti—noh mata weh ada peepl du.

BAIBL EGZAMPL: Wen di prafit Danyel da-mi praabli stil wahn teenayja, hihn mi “disaid eena ih haat” dat ih mi wahn obay Gaad laa dehn, eevn doa ih neva di liv wid ih famili. (Daniel 1:8) Bikaaz a dat, hihn mi stay chroo tu ihself. Danyel mi liv akaadn tu weh ih mi bileev.

EGZAMIN YUSELF: Weh yoo bileev? Fi egzampl: Yoo bileev eena Gaad? If yu ansa da ‘yes,’ den wai? Weh kanvins yoo dat hihn egzis?

Yoo bileev dat di standad dehn weh Gaad set bowt moaralz da fi yu oan gud? If yu ansa da ‘yes,’ den wai?

At di en a di day, wich wan yu wuda prifaa fi bee laik—wahn jrai leef weh eni lee breez ku bloa rong er wahn chree weh ku stan op gens wahn powaful staam? Schrentn yu aidentiti, ahn yu wahn bee laik da chree. Ahn dat wahn help yu fi ansa di kweschan, Da hoo mee?