Imajin dis: Dayvid di jraiv chroo wahn ayrya weh notn noh luk fameelya. Wen ih reed di schreet sain dehn, ih noa ih neva deh wehpaa ih shuda mi deh. Dayvid kanshos dat ih laas. Ih mosi mi gaahn dong di rang road.

If yoo da-mi Dayvid, weh yoo wuda du?

Yu ga moa dahn wan opshan:

1. Yu ku aks fi dairekshanz.

2. Yu ku chek wahn map, er yooz wahn GPS.

3. Yu ku kip aan di jraiv, ahn hoap dat yu fain yu way owt.

Ih eezi fi si dat Opshan C noh reeli mek sens.

Opshan B lee beta dahn Opshan A. Aftaraal, yu wahn aalwayz ga di map er di GPS wid yu fi di hoal chrip.

Di Baibl ku help yu jos laik dat!

Di Baibl ku:

• gaid yu fi get chroo prablemz eena laif

• help yu laan bowt yuself ahn bee wahn beta persn

• shoa yu how fi liv di bes laif eva

 Fahn di taim wi staat taak, wi aks wahn lata kweschan.

• Wai di skai soh bloo?

• Weh di staarz dehn mek owta?

Laytaraan eena laif, wi staat aks kweschanz bowt weh di hapm eena di werl rong wi.

• Wai bad tingz hafu hapm?

• Wai peepl hafu ded?

Sopoaz di ansa dehn mi deh eena di Baibl aal di wail?

Wahn lata peepl seh di Baibl da loan lai ahn stoari, dat ih oal-fashan, er dat ih jos tu haad fi andastan. Bot, da di Baibl da di prablem, er da weh peepl tink dehn noa bowt di Baibl da di prablem? Ih pasabl dat dehn ga di rang infamayshan?

Fi egzampl, peepl tink dat di Baibl seh dat da Gaad di kanchroal dis werl. Yoo tink dat mek sens? Dis werl deh owta kanchroal! Ih ful a payn ahn sofarin, siknis ahn det, haad taim ahn dizaasta. Bot Gaad lovin, soh da how hihn kuda bee di wan fi blaym?

Yoo wuda waahn noa di ansa? Yu mait bee sopraiz fi noa weh di Baibl seh bowt hoo kanchroal dis werl!

Yu mosi don noatis dat aala di advais eena disya broashoar da schrayt fahn di Baibl. Jehoava Witnisiz shoar shoar dat wi ku pen pahn gaidans fahn owta di Baibl. Dat da bikaaz “da Gaad mek peepl rait dong aal weh dehn don rait eena ih Skripcha. Ahn aal dehn ting weh deh eena ih Skripcha, dehn gud fi mek wi teech di chroot, ahn fi mek wi noa dehn ting weh rang eena wi laif. Ih gud fi skoal wi wen wi need it, ahn fi teech wi how fi liv rait.” (2 Timoti 3:16, 17) Eevn doa di Baibl oal, ih stil op-tu-dayt. Yu need fi tek di taim fi stodi it!