Di perpos a di Lisn tu Gaad broashoar da fi yooz sohn picha fi teech baysik Baibl chroot tu peepl weh kyaahn reed soh gud. Di picha dehn fi eech lesn deh spred owt pahn too payj. Yooz di aro dehn az wahn gaid soh yu ku noa wich picha fi diskos neks.

Di Lisn tu Gaad ahn Liv Fareva ahn di Lisn tu Gaad broashoar gat een di sayhn picha dehn. Bot sins di Lisn tu Gaad ahn Liv Fareva gat een moa werdz, di Baibl styoodent dehn weh ku reed lee bit ku yooz dis wan if dehn waahn. Moas a di taim di poblisha dehn prifaa fi yooz dis wan fi kandok di stodi, wail di Baibl styoodent di yooz di Lisn tu Gaad wan. Lata di payj dehn ga wahn baks wid ekschra infamayshan weh yu ku diskos wid di styoodent bays pahn humoch ih ku andastan.

Yu ku aafa eeda wan a di broashoar dehn enitaim yu waahn, eevn if da noh di aafa fi di mont. Wen yu di kandok wahn Baibl stodi, yooz di picha dehn fi eksplayn Baibl chroot. Aks di styoodent sohn kweschan fi mek shoar dat ih andastan di infamayshan. Reed ahn diskos di skripcha dehn da di batam a di payj. Wen yu don stodi di hoal broashoar, stodi What Does the Bible Really Teach? er What Can the Bible Teach Us? fi help yu styoodent mek proagres fi geh baptaiz.