“Ih fi werk haad, di du gud werk wid ih han dehn, soh dat ih ku ga sohnting fi shayr wid enibadi weh need help.”—IFEEZHANZ 4:28.

Wi Kriyayta waahn mek wi tink bowt werk eena wahn pazitiv way. Wai? Bikaaz wahn persn weh werk haad hapi dat ih ku provaid fi ihself ahn fi ih famili. Hihn ku eevn help sombadi weh need help. Ih baas wahn apreeshiayt ahn tu. Soh sohnbadi weh werk haad ku kip ih jab fi wahn lang taim. Di Baibl seh dat di rizolt a haad werk da wahn “gif fahn Gaad.”—Ecclesiastes 3:13.

“Wi chros dat wi ga wahn kleen kanshans, ahn wi waahn bee aanis eena evriting weh wi du.” —HEEBROOZ 13:18.

If wi aanis, dat meenz dat wi ga rispek fi wiself, wi ga wahn kleen kanshans, ahn wi sleep gud da nait. Pahn tap a dat, adaz wahn chros ahn rispek wi. Peepl weh noh aanis kyaahn injai dehnya tingz. Dehn kanshans mait bada dehn, ahn dehn aalwayz feel frayd dat adaz wahn fain owt weh dehn di du bikaaz dehn noh aanis.

“Unu noh fi lov moni, rada unu fi bee kantentid wid weh unu gat.”—HEEBROOZ 13:5.

Aala wi need moni fi bai food an ada impoatant tingz. Bot ih veri daynjaros wen wahn persn “lov moni.” Sohnbadi weh lov moni wahn yooz aala ih taim an enerji di werk haad fi mek moa moni. Ahn bikaaz ih spen soh moch taim di mek moa moni, ih marij ku sofa, ih noh wahn ga no taim fi spen wid ih chiljren, an ih ku eevn afek ih helt. (1 Timoti 6:9, 10) Moa dan dat, doh, wahn persn weh lov moni ku geh temtid fi du tingz weh noh aanis. Wahn waiz man mi seh: “Wahn faytful man wahn geh lata blesinz, bot di wan weh di hori fi geh rich noh wahn stay inosent.”—Proverbs 28:20.

“Protek praktikal wizdom an andastandin.”—PROVERBS 3:21.

Wahn gud ejukayshan help wi fi bee rispansabl peepl wen wi groa op. Bot da kaina ejukayshan noh pramis wi dat wi wahn aalwayz ga weh wi need fi bee hapi. Fi ga sokses eena evriting weh wi du, wi need di kaina ejukayshan weh kohn fahn Gaad. Di Skripchaz seh dat wen wahn persn lisn tu Gaad, “evriting weh ih du wahn ga sokses.”—Psalm 1:1-3.