Teechinz Fahn Wi Kriyayta Gi Wi Hoap
Gaad pramis wi wahn wandaful fyoocha. Hihn pramis fi en sofarin ahn fi mek hyoomanz injai wahn hapi laif pahn ert. (Psalm 37:11) Wai wi ku bee shoar dat dis wahn kohn chroo? Bikaaz “Gaad kyaahn tel lai.” (Numbers 23:19) Mek wi luk pahn som a di gud tingz weh wi Kriyayta wahn du.
Gaad Wahn Dischrai Wikid Peepl
“Wen di wikid sprowt laik graas an aala dehn wan weh du rang praspa, da den dehn wahn geh dischrai fareva.”—PSALM 92:7.
Laik weh wi laan eena di laas aatikl, tingz wahn kip di geh wers. Dat noh sopraiz wi bikaaz di Baibl mi prafesai da 2 Timoti 3:1-5 dat joorin di “laas dayz” peepl wahn di bihayv bad. Weh di Baibl meen wen ih seh “di laas dayz”? Ih meen di laas dayz fi dehn wan hoo rifyooz fi obay Gaad rait now. Soon, Gaad wahn dischrai aala dehn wan weh noh waahn chaynj dehn bad wayz. Den, onli dehn wan weh obay Gaad wahn liv pahn dis ert. “Di raichos wan dehn wahn inherit di ert, ahn dehn wahn liv fareva pan it.”—Psalm 37:29.
Gaad Wahn Dischrai Saytan
“Di Gaad weh gi pees wahn krosh Saytan.”—ROAMANZ 16:20.
Wi wahn injai pees aal oava di ert wen Saytan, ih deemonz, an aal di wikid peepl geh dischrai. Wi Kriyayta pramis wi dat: “Nobadi wahn mek [wi] feel frayd.”—Micah 4:4.
Gaad Wahn Geh Rid a Siknis ahn Det
“Di tent a Gaad wahn deh wid di peepl . . . Ahn hihn wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.”—REVILAYSHAN 21:3, 4.
Peepl noh wahn sofa ner geh sik nohmoh. Gaad wahn put wahn en tu evriting weh mek wi sofa bikaaz a Saytan, Adam ahn Eev, ahn wi oan imperfekshan. Bikaaz a dat, “nobadi noh wahn ded nohmoh.” Onli dehn wan weh lov an obay di Kriyayta wahn liv fareva. Bot wehpaat dehn wahn liv?
Wi Kriyayta Wahn Mek di Ert Wahn Paradais
“Di wildanes ahn di jrai lan wahn rijais, ahn di dezert wahn bee ful a jai an ih wahn blaasam laik di safron.”—ISAIAH 35:1.
Wen Gaad dischrai aal wikidnis, di ert wahn ton intu wahn byootiful paradais! Ih wahn ga wahn lata byootiful paak ahn gyaadn, ahn di ert wahn projoos lata food. (Psalm 72:16) Di oashan, di layk, ahn di riva dehn wahn kleen ahn ful a laif. Peepl noh wahn memba how doti di ert mi doti! Peepl wahn bil ahn liv eena dehn oan hows. Ahn nobadi wahn bee poa er hongri agen.—Isaiah 65:21, 22.
Gaad Wahn Rezorek di Ded Bak tu Laif
“Gaad wahn rayz op bak . . . di ded.” —AKS 24:15.
Yu wuda laik fi si agen yu famili ahn frenz weh ded? Di almaiti Gaad pramis fi rezorek dehn eena Paradais rait ya pahn ert. Yoo wahn memba dehn ahn dehn wahn memba yoo. Jos imajin how hapi unu wahn feel! Wai wi ku bee shoar dat dis wahn hapm? Bikaaz di Baibl taak bowt sohn peepl weh mi geh rezorek bak tu laif fi deh tugeda wid dehn famili. Pahn tap a dat, lata peepl mi aalso si wen Jeezas mi rezorek adaz.—Look 8:49-56; Jan 11:11-14, 38-44.
Yu Mait Aalso Laik
AWAYK!
Wahn Werl Weh Ful Op a Prablemz—Kip Yu Hoap Schrang
Di Baibl help wi fi deel wid di prablemz weh wi di goh chroo an ih gi wi wahn wandaful hoap fi di fyoocha.
ESSENTIAL BIBLE TEACHINGS
Wat Da di Kandishan a di Ded?
Di Baibl pramis dat Gaad wahn rezorek lata peepl fahn di ded, jos laik how ih mi rayz op bak Lazaros.
