Laan Bowt Gaad ahn Bee Ih Fren
Wi Kriyayta da noh jos sombadi weh powaful. Hihn ga sohn wandaful kwalitiz. An ih waahn mek wi laan bowt ahn soh dat wi ku bee ih fren. (Jan 17:3; Jaymz 4:8) Dat da wai hihn tel wi wahn lat bowt ihself eena di Baibl.
Wi Kriyayta Ga Wahn Persnal Naym
“Ahn mek peepl noa dat fi yoo naym da Jehoava; onli yoo da di Moas Hai oava aal di ert.”—PSALM 83:18.
Di Baibl teech wi dat Jehoava da di onli chroo Gaad. Hihn kriyayt di yoonivers an evri livin ting. Soh da onli hihn wi fi wership.—Revilayshan 4:11.
Jehoava Da Wahn Lovin Gaad
“Gaad da lov.”—1 JAN 4:8.
Wi ku laan wahn lat bowt Jehoava chroo di Baibl ahn chroo di tingz weh hihn kriyayt. Lov da Jehoava moas impoatant kwaliti. Evriting weh hihn du da bikaaz a lov. Di moa wi laan bowt Jehoava, di moa wi wahn lov ahn.
Jehoava Wilin fi Fergiv
“Yoo da wahn Gaad weh redi fi fergiv.”—NEHEMIAH 9:17.
Jehoava noa dat wee noh perfek. Soh hihn “redi fi fergiv” wi. Wen wi aks fi fergivnis ahn wi chrai haad fi stap du tingz weh hihn noh laik, hihn wahn fergiv wi an ih noh wahn ponish wi bikaaz a di mistayk dehn weh wi mek eena di paas.—Psalm 103:12, 13.
Jehoava Lisn tu Wi Pryaaz
“Jehoava noh deh far fahn di wan dehn weh di kaal pahn hihn . . . Hihn hyaa wen dehn krai fi help.”—PSALM 145:18, 19.
Wi noh need wahn speshal serimoni er yooz wahn imij er ada tingz fi wership Jehoava. Hihn wahn lisn tu wi pryaaz jos laik how wahn lovin payrent wuda lisn tu ih pikni.
Yu Mait Aalso Laik
ANSAZ TU KWESCHANZ BOWT DI BAIBL
Hoo Da Jehoava?
Yu tink Jehoava da di chroo Gaad tu onli sertn peepl, laik di Izrelait dehn?
