“Kantinyu fi . . . fergiv wan anada wid aala unu haat, eevn if sombadi du sohnting fi hert unu.”—KOLOASHANZ 3:13.

Aala wi mek mistayk. Wi mait ofen adaz er adaz mait ofen wee. Dat meenz dat aala wi need fi fergiv adaz an aala wi need fi mek adaz fergiv wi. Wen wi fergiv, wi noh wahn ga no negitiv feelinz gens di persn weh ofen wi. Wi noh “pay bak bad fi bad,” ahn wi noh wahn di kip di rimain di persn bowt di mistayk dehn weh ih mek. (Roamanz 12:17) Bot wat if wi feelinz mi geh hert reeli bad ahn wi kyaahn stap tink bowt weh mi hapm? Di bes ting fi du da fi taak tu di persn bowt di prablem eena praivit. Wi goal shuda bee fi mek pees ahn noh fi proov dat wee rait er dat di ada persn rang.—Roamanz 12:18.

“Unu mos bee hombl ahn kansida ada peepl fi bee moa impoatant dan unu.”—FILIPIYANZ 2:3.

Peepl wahn lov fi deh rong wi if dehn si dat wi hombl ahn rispekful. Dehn wahn noa dat wi kain ahn kansidarayt ahn dat wi wahn neva du sohnting fi hert dehn feelinz. Bot if wi tink dat wee beta dan adaz er dat wi aalwayz waahn du tingz fi wee way, wi wahn di kaaz  prablemz. Peepl wahn stay weh fahn wi ahn wi mait nat eevn ga frenz.

“Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.”—AKS 10:34, 35.

Wi Kriyayta noh tink dat ada peepl beta bikaaz a weh dehn kohn fram, dehn langwij, di pozishan weh dehn gat eena sosaiyati, er dehn skin kala. Di Baibl seh: “Fahn wan man hihn mek aala di nayshan dehn fi liv aal oava di ert.” (Aks 17:26) Dis meenz dat aala wee da bradaz ahn sistaz. Wen wi chreet adaz eena wahn kain ahn rispekful way, wi mek dehn feel hapi, wee wiself feel hapiya, ahn dat mek wi Kriyayta feel hapi tu.

“Unu mos . . . kip pees wid wan anada.”—KOLOASHANZ 3:12.

Adaz wahn laik deh rong wi if dehn noa dat wi da wahn peesful persn. Dehn feel komfatabl fi kohn taak tu wi an eevn karek wi bikaaz dehn noa dat wi wahn stay kaam. Eevn wen sombadi beks wid wi, di way how wi ansa ku kaam dehn dong. Proverbs 15:1 seh: “Wahn jentl ansa ku ton weh anga, bot wahn hertful werd wahn ster op anga.”

“Wi feel moa hapinis wen wi giv tu adaz dan wen wi get tingz fahn ada peepl.” —AKS 20:35.

Lata peepl tudeh greedi ahn dehn onli tink bowt dehnself. Bot wi ku ga chroo hapinis if wi jenaros wid adaz. (Look 6:38) Wahn jenaros persn aalwayz hapi bikaaz ih lov peepl moa dan di ting dehn weh ih oan. Dis help ahn fi bee tankful ahn fi shoa apreeshiayshan wen sombadi du sohnting gud far ahn. (Koloashanz 3:15) Aks yuself, ‘Ai laik deh rong peepl weh stinji ahn noh shoa eni kaina apreeshiayshan? Er Ai rada deh rong peepl weh jenaros ahn tankful?ʼ Wai wi shuda aks wiself dehndeh kweschan? Bikaaz wi waahn bee di kaina persn weh wi waahn adaz fi bee.—Machyu 7:12.