“Wahn hozban fi lov ih waif jos laik how ih lov ih oan badi. Wahn man weh lov ih waif lov ihself. Kaaz no man eva hayt ih oan badi, bot ih feed it ahn cherish it.”—IFEEZHANZ 5:28, 29.

Di hozban da di hed a di famili. (Ifeezhanz 5:23) Bot wahn gud hozban noh rof op ih waif er ekspek ahn fi du tingz weh ih kyaahn du. Insted, hihn apreeshiayt ih waif an ih mek shoar dat ih tek kayr a fi shee mateeryal an imoashanal needz. Ih aalso chrai ih bes fi mek shee hapi, an ih noh aalwayz insis fi du tingz fi hihn way. (Filipiyanz 2:4) Hihn taak tu ahn, an ih tel ahn how hihn feel, an ih lisn wen shee di taak. Hihn noh “geh beks” wid ahn er hert ahn eena wahn fizikal way er seh tingz weh kruwil.—Koloashanz 3:19.

“Di waif fi ga lata rispek fi ih hozban.”—IFEEZHANZ 5:33.

Wen wahn waif rispek ih hozban ahn sopoat di disizhanz weh hihn mek, shee help di famili fi ga moa pees. If hihn mek wahn mistayk, shee noh wahn staat tel ahn aaf, bot shee wahn stay kaam ahn rispekful. (1 Peeta 3:4) Wen shee need fi taak tu hihn bowt wahn prablem, shee mek shoar ih pik wahn gud taim fi du dat an ih taak tu ahn eena wahn rispekful way.—Ecclesiastes 3:7.

“Wahn man wahn . . . marid tu ih waif. Dehn wahn jain tugeda, ahn di man an ih waif wahn bee wan.”—GENESIS 2:24.

Wen wahn man ahn wahn uman geh marid, dehn ga wahn kloas rilayshanship wid eech ada. Soh wahn kopl ku schrentn dehn marij if dehn mek di taim fi taak tu eech ada an if dehn du kain tingz fi wan anada. Dehn shuda aalso stay faytful tu eech ada ahn noh ga seks wid nobadi els. Da sohnting kruwil wen sombadi cheet pahn dehn marij mayt. Ih dischrai di chros weh dehn gat an ih brok op di famili.—Heebrooz 13:4.

“Chrayn wahn chail eena di way ih fi goh; eevn wen ih groa oal ih noh wahn schray fan it.”—PROVERBS 22:6.

Gaad gi payrents di rispansabiliti fi chrayn dehn chiljren. Dis meenz dat dehn wahn teech dehn how fi bihayv ahn dehn wahn set wahn gud egzampl fi dehn. (Deuteronomy 6:6, 7) If wahn chail bihayv bad, wahn waiz payrent noh gwehn aaf pan ahn. Insted, ih wahn “aalwayz bee redi fi lisn,” ih wahn “tek ih taim  bifoa ih taak,” an ih noh wahn “bee eezi fi geh beks.” (Jaymz 1:19) If di payrent si dat ih need fi karek ih chail, ih wahn du it eena wahn lovin way, ahn noh bikaaz ih beks.

“Chiljren, unu mos obay unu payrents . . . ‘Aana yu ma ahn yu pa.ʼ”—IFEEZHANZ 6:1, 2.

Chiljren shuda obay dehn payrents ahn chreet dehn wid lata rispek. Wen chiljren shoa aana tu dehn payrents, dat help di famili fi ga pees ahn jai. Wen chiljren ton adolts, dehn shoa dat dehn aana dehn payrents wen dehn mek shoar dat dehn ga evriting weh dehn need. Dis mait meen dat dehn wahn mek shoar dat dehn ga wahn gud plays fi liv eena er dehn wahn help dehn wid moni. —1 Timoti 5:3, 4.