Di prablemz eena dis werl ku mek peepl feel angshos, ahn dat ku afek dehn eena wahn fizikal an imoashanal way. Di peepl weh di goh chroo dehndeh prablemz feel laik di sichuwayshan wahn neva geh beta. How dehn deel wid it?

• Som a dehn noh eevn waahn tink bowt tumaaro.

• Adaz yooz alkohol er jrogz soh dat dehn noh haftu tink bowt dehn prablemz.

• Som eevn tink dat ih beta fi ded dan fi kantinyu liv, soh dehn tink bowt kil dehnself.

• Som a di prablemz weh yu di goh chroo mait laas onli fi wahn lee wail ahn wen yu lees ekspek it, tingz ku geh beta.

• Eevn if yu sichuwayshan noh chaynj, dehn ga tingz weh yu kud du weh ku help yu deel wid it.

• Di Baibl pramis wi dat fi shoar aala wi prablemz wahn geh fiks eena di fyoocha.

Di Baibl seh: “Noh wori bowt di neks day, kaaz di neks day wahn gat ih oan woriz. Di chroblz weh yu gat fi tudeh, inof fi tudeh.”—Machyu 6:34.

Tek it wan day at a taim. Noh wori soh moch bowt weh wahn hapm tumaaro dat yu kyaahn du di tingz weh yu need fi du tudeh.

If yu wori bowt tingz weh mait hapm, ih onli wahn schres yu owt ahn mek yu hoap fi di fyoocha geh week.

Wahn saamis mi seh eena pryaa tu Gaad: “Yu werd da wahn lamp fi mi fut, ahn wahn lait fi mi road.” (Psalm 119:105) Noatis how Gaad Werd, di Baibl, da wahn lamp fi wi fut ahn wahn lait fi wi road.

Da nait wen ih daak, wahn lamp help wi fi si wehpaat wi ku waak. Sayhn way soh, di wizdom weh kohn fahn di Baibl ku gaid wi wen wi need fi mek impoatant disizhanz.

Wahn lait ku lait op di road soh dat wi ku si weh deh heda wi. Sayhn way soh, di Baibl shoa wi dat wi ga wahn hoap fi wahn beta fyoocha.