Wai Peepl Noh Ga Rispek fi Laif Nohmoh?

PLAY

WAI IH IMPOATANT FI RISPEK LAIF?

Yu shoa dat yu noh rispek yu laif er di laif a adaz wen yu du tingz weh bad fi yu helt er weh put adaz eena daynja.

Wahn persn weh smoak sigaret ga wahn hai chaans fi geh kyansa an ih mek it haad fi ih badi fait di kyansa. Moas peepl ded fahn longz kyansa, eeda bikaaz dehn yoostu smoak sigaret er bikaaz dehn yoostu deh rong peepl weh smoak sigaret.
Evri yaa, lata peepl sofa eena wahn imoashanal way bikaaz dehn ga peepl weh goh rong di shoot ahn kil lata peepl. Wahn risaach mi shoa dat peepl weh servaiv wahn skool shootin stil sofa eena wahn imoashanal ahn mental way yaaz layta.
Peepl weh jrink alkohol er tek jrogz ahn jraiv mek it daynjaros fi ada jraivaz ahn fi peepl weh di waak pahn di said a di road. Wen peepl shoa dat dehn noh valyu laif, inosent peepl sofa.

HOW YU KU SHOA DAT YU RISPEK LAIF?

Protek yu helt. If yu laik smoak, vayp, jrink tu moch, er tek jrogz laik kokayn er weed, ih noh tu layt fi giv op dehndeh bad habit. Dehndeh habit damij yu helt an ih noh shoa rispek fi ada peepl laif, inkloodin yu famili membaz.

“Mek wi kip wiself kleen fahn eniting weh ku mek wi badi . . . doti.”—2 Korintyanz 7:1.

Tink bowt how yu ku kip yuself an adaz sayf. If yu kip yu hows an evriting eena it eena gud kandishan, yu ku avoid wahn aksident. Jraiv eena wahn sayf way, ahn gi yu veekl prapa mantaynans soh dat ih ku bee sayf fi jraiv. Noh mek adaz presha yu fi du sohnting daynjaros, bikaaz yu ku geh hert er ded.

“If yu bil wahn nyoo hows, ahn yu put wahn varanda pahn di roof, yu mos put wahn loa waal rong it, bikaaz if sombadi jrap aaf fan it ahn ded, yu wahn bee blodgilti.”—Deuteronomy 22:8. a

Bee kain tu adaz. Wen wi rispek laif, ih meenz dat wi kain tu evribadi, noh mata weh dehn kohn fram, dehn rays, kolcha, weda dehn rich er poa, er if dehn ejukaytid er nat. Aftaraal, prejudis ahn hayt da som a di mayn reezn wai lata vailens ahn waar deh eena di werl.

“Unu fi geh rid a eni kaina haytful bitanis, anga, ahn raat. Unu noh fi hala op aata wan anada, insolt wan anada, ner du eni kaina wikidnis. Bot unu fi bee kain tu wan anada.”—Ifeezhanz 4:31, 32.

HOW JEHOAVA WITNISIZ SHOA DAT DEHN RISPEK LAIF?

Jehoava Witnisiz liv wahn helti laifstail an inkorij adaz fi du di saym. Wi Baibl stodi proagram ahn wi meetin dehn help peepl get oava dehn adikshanz ahn bad habits.

Wi fala schrik sayfti standadz eena wi kanschrokshan proajek dehn. Enibadi weh valantyaa geh chrayn fi avoid wahn aksident wen dehn di bil di plays dehn wehpaat wi wership Gaad an ada bildinz weh wi yooz fi sopoat wi Baibl ejukayshan werk. Wi bildinz goh chroo regyula inspekshan soh dat dehn fala di loakal laaz bowt sayfti.

Wi help peepl weh gaahn chroo wahn dizaasta. Eena 2022, wi mi help eena bowt 200 seeryos dizaasta aal rong di werl. Wi mi spen aalmoas 12 milyan dalaz fahn doanayshanz fi help dehn wan weh mi geh afektid.

Wen Ebola mi staat tu spred da West Africa eena 2014 ahn di Democratic Republic of Congo eena 2018, wi mi help peepl laan how fi stap di dizeez fahn spred. Wi mi sen peepl rong dehndeh ayrya fi taak bowt how “Obeedyans Sayv Peepl Laif.” Wi mi help dehn fi si how impoatant ih impoatant fi wash dehn han ahn wi eksplayn weh ada tingz dehn ku du fi stap di dizeez fahn spred. Wi aalso set op sohn plays wehpaat dehn ku wash dehn han da di enchrans a di plays dehn wehpaat wi goh wership Gaad.

Da Sierra Leone, wahn rayjo stayshan mi komen Jehoava Witnisiz fi help Witnisiz ahn peepl weh da noh Witnis eena di ayrya fi avoid di Ebola vairos.

Wahn plays wehpaat dehn ku wash dehn han fronta di Kingdom Haal joorin di taim wen di Ebola vairos mi-di spred da Liberia eena 2014

a Eena di aynshent Midl Ees, di hows dehn roof mi flat ahn dehn mi yooz it wahn lat joorin di day. Dis waiz koman mi shoa dat dehn fi rispek di laif a dehn famili an adaz.

AWAYK!