Soon di Kingdom a Gaad, weh da wahn govament weh Gaad set op, wahn bring pees ahn yooniti tu evribadi pahn di ert. Noatis dis pramis da Psalm 72:7; ih seh: “Pees wahn deh evriway.” Bot da wen dis Kingdom wahn tek kanchroal? How ih wahn du it? Ahn how yu ku benifit fahn dis Kingdom?

Di Baibl mi prafesai dat waar, staavayshan, ertkwayk, ahn moa ahn moa wikidnis wahn hapm joorin di laas dayz. Bot wen wi si aala dehnya tingz di hapm at di saym taim, wi noa dat di Kingdom a Gaad soon kom.—Machyu 24:3, 7, 12; Look 21:11; Revilayshan 6:2-8.

Wahn nada prafesi seh: “Bot noa dis, dat eena di laas dayz, wi wahn di deel wid haad taimz. Bikaaz peepl wahn lov dehnself, lov moni, . . . dehn noh wahn lisn tu dehn payrents, dehn wahn bee angraytful, ahn dehn noh wahn bee laayal, yu wahn si peepl weh noh shoa lov, weh kyaahn gree wid nobadi, weh laik slanda adaz, weh noh ga self-kanchroal, weh vishos ahn goh aan laik wail animal, ahn weh hayt weh gud, . . . hai-maindid, ahn weh lov plezha insteda Gaad.” (2 Timoti 3:1-4, NW) Da chroo dat peepl mi aalwayz bihayv laik dis. Bot nowadayz, ih veri kaman fi si peepl di shoa dehnya kaina atichood.

Dehnya prafesi staat tu kohn chroo eena di yaa 1914. Wahn lata palitishan, peepl weh stodi hischri, ahn raitaz mi taak bowt how di werl chaynj afta da yaa. Fi egzampl, Peter Munch, weh stodi hischri, rait seh: “Di werl chaynj wen di waar staat eena 1914. Wi mi-di liv eena wahn taim a proagres; evriting mi luk gud, . . . bot den wi gaan intu wahn taim a dizaasta, haychrid, wikidnis, ahn fyaa.”

Pahn di pazitiv said doh, dehndeh kandishanz shoa dat Gaad Kingdom wahn soon tek oava roolaship oava di ert. In fak, Jeezas mi inklood wahn pazitiv sain joorin dehnya laas dayz; ih seh: “Di Gud Nyooz bowt di kingdom a hevn wahn geh preech oava di hoal werl soh dat aala di nayshan dehn ku yehr di chroot, ahn den di en wahn kohn.”—Machyu 24:14.

Da gud nyooz da di mayn teem a di mesij weh Jehoava Witnisiz preech bowt. In fak, wi mayn magazeen naym Di Wachtowa—Di Magazeen Weh Anonks di Kingdom a Jehoava. Ih taak bowt di wandaful tingz weh Gaad Kingdom wahn du fi aala wi ahn fi di ert.

Di ansa involv foa impoatant faks:

1. Di Kingdom noh wahn yooz eni a di politikal leedaz weh di rool dis werl.

2. Di politikal leedaz wahn rifyooz fi giv op dehn powa ahn dehn wahn fait gens Gaad Kingdom. Bot dis wahn bee wahn foolish ting fi du.—Psalm 2:2-9.

3. Gaad Kingdom wahn haftu dischrai aala di politikal kingdom weh waahn kantinyu fi rool oava hyoomanz. (Daniel 2:44; Revilayshan 19:17-21) Di Baibl kaal dis laas werl waar, Armagedon.—Revilayshan 16:14, 16.

4. Evribadi weh chooz fi obay Gaad Kingdom wahn servaiv Armagedon ahn liv eena wahn peesful nyoo werl. Dehn wahn bee paat a weh di Baibl kaal “di grayt krowd.” Di amonk a peepl weh servaiv wahn bee eena di milyanz.—Revilayshan 7:9, 10, 13, 14, NW.

Di fos ting wahn persn need fi du fi benifit fahn di Kingdom da fi laan bowt it. Jeezas mi seh eena wahn pryaa tu Gaad: “Di onli way fi geh evalastin laif da fi geh fi noa yoo, di onli chroo Gaad, ahn di wan hoo yu mi sen, Jeezas Krais.”—Jan 17:3, NW.

Wen peepl geh fi noa Jehoava Gaad az wahn Persn, dehn benifit eena wahn lata wayz. Kansida jos too wayz: Fos, dehn fayt eena hihn geh schranga. Dis fayt bays pahn evidens weh kanvins dehn dat Gaad Kingdom reel ahn dat ih wahn soon staat tu rool. (Heebrooz 11:1) Sekant, dehn ga moa lov fi Gaad ahn fi dehn nayba. Dehn lov fi Gaad moov dehn fi obay hihn wid wahn wilin haat. Ahn dehn lov fi dehn nayba moov dehn fi aplai Jeezas werdz weh wahn lata peepl kaal di Goalden Rool. Ih seh: “Yu fi chreet ada peepl di sayhn way how yoo waahn dehn chreet yoo.”—Look 6:31.

Jos laik wahn lovin pa, wi Kriyayta waahn di bes fi wi. Hihn waahn wi injai weh di Baibl kaal “di reel laif.” (1 Timoti 6:19, NW) Di laif weh wi noa tudeh da noh “di reel laif.” Milyanz a peepl feel laik dehn jos di egzis eena wahn daynjaros werl. Fi gi yu wahn lee tays a “di reel laif,” noatis som a di wandaful tingz weh Gaad Kingdom wahn du fi aala wi.