Di United Nations waahn peepl bee wahn sitizn a di werl, noh jos wahn sitizn a dehn oan konchri. Dehn waahn evribadi ga di saym raits ahn mek di govament dehn werk tugeda ahn protek di planet. Wai? Bikaaz a prablemz laik chaynjiz eena di weda, kriminal aaganaizayshanz, paverti, waar, terorizm, dizeez, ahn soh, weh noh onli afek wan konchri bot afek di hoal werl.—Maher Nasser fahn di UN Chronicle.

Som peepl goh eevn ferda dan dat, dehn seh wi need fi ga onli wan govament weh rool oava di hoal werl. Sohn egzampl da di faymos Italian poawet ahn palitishan Dante (1265-1321) ahn di saiyentis Albert Einstein (1879-1955). Dante mi bileev dat hyoomanz kyaahn ga pees eena wahn werl weh divaid op intu lata difrent konchri. Hihn mi eevn koat Jeezas Krais ahn seh: “If di peepl dehn da wahn konchri di fait gens wan anada, dehn noh wahn mek it.”—Maak 3:24.

Afta Werl Waar II ahn di eksploazhan a di too atomik bomz, Albert Einstein mi rait wahn poblik leta tu di General Assembly a di United Nations. Hihn mi seh: “Di United Nations mos du sohnting soon if dehn waahn di werl bee wahn sayf plays. Dehn need fi mek wahn reel werl govament.”

Bot how wahn persn ku bee shoar dat di palitishan dehn eena wahn powaful govament laik dat noh wahn bee korop ahn kruwil? Yu tink dehn wuda bee jos az bad az di ada leeda dehn ahn giv een tu koropshan? Yu tink dehn wuda bee laik eni ada govament weh wi noa tudeh? Maybi yu memba weh di British raita ahn palitishan, Lord Acton, mi seh: “Powa korop ahn ful kanchroal korop wahn persn eensaid an owtsaid.”

Bot eevn soh, if wee fi injai chroo pees, wi haftu bee yoonaitid. Bot how wi ku reech da goal? Yu tink dat pasabl? Di Baibl seh yes. Ih kud an ih wahn hapm. How? Noh bai wahn werl govament weh ga loan korop palitishan een deh. Insted, ih wahn bee onli chroo Gaad govament. Dis govament wahn shoa wi dat da onli Gaad ga di rait fi rool oava di yoonivers an evriting els weh hihn kriyayt. Wat da da govament? Di Baibl kaal it di Kingdom a Gaad, er “Gaad Kingdom.”—Look 4:43.

Jeezas mi-di tink bowt Gaad Kingdom wen ih mi seh eena di Our Father Prayer: “Kohn kohn set op yu kingdom, ahn mek evribadi obay yu pahn ert.” (Machyu 6:9, 10) Soh di Kingdom a Gaad wahn mek shoar dat fi hihn wil tek plays pahn di ert, noh di wil a selfish hyoomanz hoo onli waahn powa.

Di Baibl aalso kaal Gaad Kingdom ‘di Kingdom a di hevn.ʼ (Machyu 5:3) Wai? Bikaaz dis Kingdom wahn rool fahn hevn oava di ert, ih noh wahn rool fahn di ert. Tink bowt weh dat wahn meen. Dis werl govament noh wahn need mateeryal er fainanshal sopoat fahn non a wi. Dat da sohnting weh aala wi di luk faawod tu. Hoo wudn waahn da kaina rileef deh?

Wen wi hyaa di werd “kingdom,” wi mait tink bowt sohnting weh raiyal. Wel, Gaad Kingdom da wahn raiyal govament ahn Jeezas Krais da di King. Hihn get aala ih atariti fahn Gaad. Noatis weh di Baibl seh bowt Jeezas:

•   “Di govament wahn bee pan ih shoalda . . . Ih govament wahn mek proagres an ekspan ahn pees wahn deh tu nohmoh nohmoh.”—Isaiah 9:6, 7, King James Version.

• “Ih mi geh roolaship, aana, ahn wahn kingdom, soh dat di peepl dehn, nayshan dehn, ahn langwij groop dehn shuda serv ahn. Ih roolaship . . . noh wahn en.” —Daniel 7:14.

• “Wi Laad ahn ih Krais, ih ga di powa fi rool now oava di werl.”—Revilayshan 11:15.

Di Kingdom a Gaad wahn mek shoar dat di wil a Gaad hapm pahn di ert. Anda da Kingdom, aala wi wahn laan how fi tek kayr a di planet soh dat ih wahn bee helti agen ahn ful a laif.

Bot moa dan eniting els, Gaad Kingdom wahn ejukayt aal hyoomanz. Evribadi wahn laan di saym standadz. Notn wahn divaid wi, wi wahn bee yoonaitid. Isaiah 11:9 seh: “Dehn noh wahn du no haam ner kaaz no kaina prablem . . . bikaa di ert wahn bee ful ful a di nalij a Jehoava jos laik how di waata ful op di see.”

Peepl aal oava di werl wahn bee yoonaitid ahn liv eena pees wid eech ada, dehn wahn bee sitizn a di werl fi chroo. Dis da sohnting weh di United Nations mi waahn du. Psalm 37:11 seh: “Ahn lata pees wahn deh, soh dehn wahn bee hapi hapi.” In taim, wi noh wahn noa werdz laik “kraim,” “paverti,” ahn “waar.” Bot da wen dis wahn hapm? Da wen di Kingdom a Gaad wahn tek ful kanchroal a dis ert? How ih wahn hapm? Ahn how yu ku benifit fahn dis Kingdom? Mek wi si.