“Noh wori bowt tumaaro; mek tumaaro wori bowt ihself.”—MACHYU 6:34.

Weh ih meen? Woriz da paat a laif. Bot noh schres owt yuself moa di wori bowt tingz weh noh eevn hapm yet. Tek wan day at a taim.

• Schres ku mek yu wori. Soh chrai du dis: Fos, aksep dat dehn ga sohn schres weh yu kyaahn ron weh fram. If yu wori tu moch bowt tingz weh yu kyaahn avoid, yu wahn feel eevn moa schres. Sekant, andastan dat sohntaim di tingz weh wi di wori bowt noh eevn hapm, soh wai schres eena di fos plays?

“Di wizdom weh kohn fahn Gaad . . . kansidarayt.”—JAYMZ 3:17.

Weh ih meen? Bee kansidarayt. Noh ekspek tu moch a yuself er adaz.

• Wen yu reeznabl ahn noh ekspek tu moch a yuself er adaz, yu wahn ga les schres ahn yu wahn ga eevn beta rizolts. Aalso, chrai noh fi bee tu seeryos. Wen yu laaf, eevn wen sohnting goh rang, ih help yu fi noh foakos pahn yu prablem ahn yu en op di ga les schres ahn yu feel hapiya insted.

“Wahn man weh ga andastandin wahn kip kaam.”—PROVERBS 17:27.

Weh ih meen? Negitiv feelinz ku mek yu noh tink klyaa, soh chrai yu bes fi stay kaam.

• Fain owt weh di schres yu owt, ahn si how ih afek yu. Fi egzampl, wen yu feel schres owt, rait dong how yu feel, weh yu di tink, ahn how yu bihayv. If yu noa how yu bihayv wen yu anda schres, den yu wahn noa how fi deel wid it. Aalso, tink bowt how yu ku geh rid a tingz weh kaaz yu schres. If dat noh pasabl, luk fi wayz soh dat ih noh afek yu az moch. Maybi yu ku luk fi beta wayz fi du tingz er how fi yooz yu taim eena wahn waiz way.

• Chrai chaynj di way yu si tingz. Weh mek yoo feel schres owt mait noh schres owt sombadi els. Ih aal pen pahn how yu si tingz. Kansida dehnya chree sojeshan:

  1. Noh bee kwik fi tink di wers a peepl. Maybi yu deh da shap ahn sombadi jos baaj eena lain fronta yu. If yu tink dat di persn rood, yu mait en op di geh beks. Insted, wai noh tink dat di persn mi ga gud reezn fi du weh ih mi du? Yu mait bee rait!

  2. Si di pazitiv said a di sichuwayshan. Wen yu di wayt fi goh si dakta er yu deh da wahn ayaapoat, yu wahn feel les schres if yu yooz di taim wail yu di wayt fi du sohnting els. Maybi yu ku yooz di taim fi reed sohnting er kech op pahn werk er chek yu eemayl.

  3. Kip yu foakos. Aks yuself: ‘Dis prablem wahn bee wahn biga ishu tumaaro er neks week?ʼ Noa wich prablemz yu need fi deel wid rait away ahn wich wanz yu ku deel wid layta.

“Jos mek shoar unu du evriting eena aada, ahn eena wahn deesent way.”—1 KORINTYANZ 14:40.

Weh ih meen? Chrai kip yu laif aaganaiz.

• Wee laik wen wi laif eena aada. Bot wan ting weh ku mek it haad fi wi du dat ahn kaaz wi schres da if wi kip di put aaf tingz weh wi sopoas tu du fi layta. Dis mait kaaz wi fi en op wid wahn lata tingz fi du. Chrai dehnya too sojeshan.

  1. Mek wahn gud skejul, ahn stik tu it.

  2. Fain owt weh mek yu kip di put aaf tingz fi wahn nada taim. Ahn wen yu fain owt wat da di prablem, fiks it.

“Ih beta fi get inof res dan fi werk ekschra haad ahn di chays afta loan breez.”—ECCLESIASTES 4:6.

Weh ih meen? Peepl weh lov werk moa dan eniting ku looz owt pahn di benifits a aal dehn haad werk. Dehn mait en op wid no taim an enerji fi injai weh dehn mi werk fa.

• Bee balans wid di way yu vyoo moni. Moa moni noh meenz dat yu wahn hapiya er dat yu wahn ga les schres. In fak, ih ku bee di ada way rong. Ecclesiastes 5:12 seh: “Di rich persn ga plenti an ih noh di mek ih sleep.” Soh, noh spen moa moni dan weh yu ga.

• Mek taim fi rilaks. Da chroo, yu feel les schres owt wen yu du tingz weh yu injai. Bot entataynment weh noh kip yu aktiv, laik wach TV, mait noh help.

• Put op yu ilekchranik divais. Noh di chek yu eemayl, yu teks mesij, er yu soashal meedya evri minit. Anles yu haftu, noh chek eniting weh ga fi du wid yu werk.

“If sohnbadi di chrayn ih badi, dat help.”—1 TIMOTI 4:8.

Weh ih meen? Wen yu eksasaiz regyula, ih ku mek yu feel beta.

• Werk pahn ga helti habits. Eksasaiz ku mek yu feel beta ahn help yu badi fi rispan beta wen yu di deel wid schres. Eet helti food ahn chrai fi noh skip wahn meel. Mek shoar yu geh inof res.

• Memba dat jrogz an alkahol abyooz noh geh rid a yu schres, ih onli mek yu ferget it fi wahn lee wail. Pahn di langa ron, ih ku damij yu helt ahn lef yu brok, dis wahn gi yu eevn moa schres.

• If yu schres da tu moch fi yu handl, goh si yu dakta. Noh frayd fi eksplayn yu sichuwayshan tu yu dakta an aks ahn fi help.

“Mek shoar a di moa impoatant tingz.”—FILIPIYANZ 1:10, NW.

Weh ih meen? Tek yu taim fi tink bowt weh moa impoatant.

• Mek wahn lis a di tingz weh yu need fi du ahn mek shoar yu put di moas impoatant tingz fos. Wen yu du dis, ih wahn help yu fi si weh yu need fi du rait away, weh yu ku du layta, ahn weh yu mait noh need fi du non ataal.

• Fi wan week, kip chrak a how yu yooz yu taim. Den fain wayz how yu ku yooz yu taim beta. Di moa kanchroal yu gat oava di tingz weh yu need fi du, di les presha yu wahn feel fi get dehn don.

• Skejul sohn taim fi res ahn rilaks. Eevn wahn shaat lee brayk ku help yu fi geh bak yu enerji, an ih ku aalso help yu fi ga les schres.

“Woriz eena wahn man haat way ahn dong, bot wahn gud werd mek ih feel hapi.”—PROVERBS 12:25.

Weh ih meen? Wen adaz taak tu yu eena wahn kain way ahn shoa dat dehn kay bowt yu, ih ku mek yu feel beta.

• Taak tu sombadi weh ku andastan yu sichuwayshan. Wahn kloas fren ku help yu fi si tingz difrent. Sohntaimz aal yu need da sombadi fi taak tu.

• Aks fi help. Yu tink yu ku aks sombadi fi help yu du som a di werk?

• If sombadi yu werk wid di schres yu owt, luk fi wayz fi fiks di sichuwayshan. Fi egzampl, eena wahn kain way, tel di persn how ih mek yu feel. (Proverbs 17:27) If dat noh werk, yu mait need fi chrai spen les taim wid da persn.

“Gaad bles dehn wan weh noa seh dehn need hihn.”—MACHYU 5:3.

Weh ih meen? Az hyoomanz, wee need moa dan jos food, kloaz, ahn wahn plays fi stay. Wi baan wid di dizaiya fi ga wahn rilayshanship wid Gaad. Fi bee hapi, wi need fi bee kanshos a da need ahn tek kayr a it.

• Pryaa ku bee wahn big help. Gaad invait yoo fi ‘chroa aala yu woriz ahn kyaa pahn hihn, bikaaz hihn kay bowt yoo.ʼ (1 Peeta 5:7) Wen yu pray ahn tink bowt tingz weh mek yu hapi, yu ku ga pees.—Filipiyanz 4:6, 7.

• Reed tingz weh wahn mek yu geh kloasa tu Gaad. Di prinsipl dehn weh wi diskos eena dis magazeen kohn fahn di Baibl, weh mi geh rait soh dat wi ku ga wahn kloas rilayshanship wid Gaad. Dehnya Baibl prinsiplz mek wi ga “wizdom an andastandin.” (Proverbs 3:21) Wahn gud goal wuda bee fi reed di Baibl. Di buk a Proverbs wuda bee wahn gud plays fi staat.