Schres da how yu badi rispan tu wahn tof sichuwayshan. Yu brayn sen wahn lata haarmoanz tu aal paats a yu badi. Dis kaaz yu haat fi beet faasa, yu blod presha fi goh op, yu mosl dehn fi geh tait, an ih eevn kaaz yu longz fi chaynj di amonk a ayaa weh ih ku tek een. Bifoa yu reeli noa weh di hapm, yu badi don redi fi akshan. Wen di sichuwayshan weh mi-di kaaz yu schres geh beta, yu badi goh bak tu naamal.

Schres da wahn nachral way how yu badi rispan fi help yu deel wid tof er daynjaros sichuwayshanz. Dis rispans staat eena yu brayn. Gud schres help yu soh dat yu ku rispan kwik. Wahn sertn amonk a schres ku aalso help yu fi reech yu goalz er fi du beta, maybi joorin wahn egzam, wahn jab intavyoo, er wen yu di play spoats.

Bot, schres weh laas fi wahn lang taim er schres weh noh goh weh, ku akchwali haam yu. Wen yu badi aalwayz anda schres, yu mait staat tu sofa fizikali, imoashanali, ahn mentali. Di way yu ak ahn di way yu chreet adaz mait chaynj. Schres weh noh goh weh ku aalso leed tu jrog abyoos ahn kaaz yu fi du ada tingz weh noh helti soh dat yu ku koap. Ih mait eevn kaaz yu fi geh dipres, geh taiyad, er mek yu tink fi kil yuself.

Eevn doa schres mait noh afek evribadi di saym way, ih ku kaaz wahn lata siknis. An ih ku afek nayli evri paat a yu badi.