HOW FI DEEL WID SCHRES?
Wi Kud Liv Widowt Schres
Di wizdom fahn di Baibl ku help wi fi avoid wahn lata schres. Af koars, az hyoomanz, ih noh pasabl fi wi geh rid a aala di tingz weh di schres wi owt. Bot wi Kriyayta kud. Hihn eevn chooz sombadi fi help wi wen wi need it. Da persn da Jeezas Krais. Hihn wahn soon du eevn grayta tingz dan weh hihn mi du wen hihn mi deh pahn ert az wahn hyooman. Fi egzampl:
LAIK WEH JEEZAS MI SHOA, HIHN WAHN HEEL DI SIK.
“Dehn kehr peepl wid aal kaina siknis ahn dizeez tu ahn. . . . Bot Jeezas heel evri wan a dehn.”—MACHYU 4:24.
JEEZAS WAHN PROVAID HOWS AHN FOOD FI EVRIBADI.
“Ahn dehn [di wan dehn weh Jeezas wahn rool oava] wahn bil hows ahn dehn saym wan wahn liv een deh; ahn dehn wahn plaant aachad ahn eet fahn di froot weh ih giv. Dehn noh wahn bil hows jos fi mek sombadi els liv een deh; dehn noh wahn plaant ahn sombadi els get fi eet di froot.”—ISAIAH 65:21, 22.
JEEZAS ROOLASHIP WAHN BRING PEES AHN SIKYOARITI OAVA DI HOAL ERT.
“Joorin fi hihn dayz di raichos wahn praspa, ahn pees wahn deh evriway. Hihn wahn ga roolaship fahn see tu see ahn fahn di riva tu aal oava di ert. . . . Fi hihn enimi dehn wahn lik di dos.”—PSALM 72:7-9.
JEEZAS WAHN GEH RID A INJOSTIS.
“Hihn wahn gat piti pahn di hombl ahn di poa wan dehn, ahn hihn wan sayv di poa wan dehn. Hihn wahn reskyu dehn fahn injostis ahn vailens.”—PSALM 72:13, 14.
JEEZAS WAHN EEVN GEH RID A SOFARIN AHN DET.
“Dehn noh wahn ded nohmoh ner sofa, ner krai ner feel payn nohmoh.”—REVILAYSHAN 21:4.
