FI WEE PLANET KU SERVAIV?
Di Ayaa
WI NEED ayaa, bot noh jos fi mek wi breed. Ayaa protek wi planet fahn moas a di daynjaros rayz weh kohn fahn di son. Widowt ayaa, di tempricha rong di werl wuda geh soh loa dat wi wuda freez.
Tingz Weh Ku Poloot Wi Ayaa
Ayaa polooshan ku dischrai laif pahn ert. Akaadn tu di World Health Organization, onli wan persent a peepl weh liv pahn di ert di breed een kleen ayaa.
Ayaa polooshan kaaz long dizeez, long kyansa, ahn haat dizeez. Sayka ayaa polooshan, bowt 7,000,000 peepl ded bifoa dehn taim eech yaa.
Wi Planet Mek fi Servaiv
Wi planet ga di abiliti fi provaid inof kleen ayaa fi evri livin ting weh breed. Bot di ert ku du dis onli wen peepl main humoch dehn di poloot di envaiyament. Mek wi luk pahn sohn egzampl:
-
Lata peepl noa dat di faris ku tek een karbon daiyoksaid fahn di ayaa. Bot di mangroav dehn weh groa eena swamp kloas tu di see ku du dat eevn beta. Di mangroav plaant dehn ku geh rid a faiv taimz moa karbon daiyoksaid fahn di ayaa dan weh wahn chrapikal faris ku du.
-
Sohn reesent stodiz shoa dat kelp, wahn taip a seeweed, noh onli tek een karbon daiyoksaid fahn di ayaa, bot dehn aalso beri it. Di kelp leef dehn ga sohn sak weh ful op a ayaa weh help dehn fi float faar. Wen di kelp leef deh faar fahn di seeshoar, di ayaa sak bos, ahn di kelp weh mi ful op a karbon daiyoksaid sink tu di batam a di oashan, ahn dehn geh berid deh fi honjridz a yaaz.
-
Joorin di COVID-19 lak dong, di ayaa mi shoa ih amayzin abiliti fi kleen ihself fahn sohn daynjaros levl a polooshan. Eena 2020, wen di fakchri ahn veekl dehn stap poloot di ayaa, kwik taim wi mi ga beta ayaa kwaliti. Akaadn tu di “2020 World Air Quality Report,” moa dan 80 persent a di konchri dehn weh dehn mi stodi mi ripoat dat di ayaa mi moch kleena noh tu lang afta di lak dong mi staat.
Weh Hyoomanz Di Du fi Chrai Solv di Prablem?
Wen peepl raid dehn baik, dis ku help loawa ayaa polooshan
Di govament dehn kantinyu fi tel di bizniz dehn fi loawa ayaa polooshan. Pahn tap a dat, wahn lata saiyentis kip di fain nyoo wayz fi fiks di damij weh polooshan kaaz. Fi egzampl, dehn yooz bakteerya fi ton tingz weh poloot wi ayaa intu tingz weh noh kaaz damij. Aalso, sohn ekspert inkorij peepl fi raid dehn baik er waak insteda jraiv, ahn dehn aalso inkorij peepl fi fain wayz fi yooz les enerji eena dehn hows.
Sohn govament di gi peepl di kaina stoav weh wi naamali yooz tudeh fi help loawa ayaa polooshan. Bot eena wahn lata konchri dehn stil kyaahn get da kaina stoav
Bot akaadn tu wahn 2022 ripoat fahn sohn intanashanal aaganaizayshan inkloodin di World Health Organization ahn di World Bank, wi need fi du moa dan dat.
Di ripoat seh dat eena 2020, bowt 33 persent a di werl papyulayshan mi yooz tingz weh poloot di ayaa wen dehn kuk. Da lata plays, onli lee bit a peepl kud afoad wahn nyoo stoav er ku kuk wid difrent kaina gyas.
Wai Wi Ku Ga Hoap—Weh di Baibl Seh
“Dis da weh di chroo Gaad, Jehoava, seh, di wan weh mek hevn ahn . . . di wan weh spred owt di ert ahn di tingz weh di ert projoos, di wan weh mek di peepl pahn ert breed.”—Isaiah 42:5.
Gaad mi mek di ayaa weh wi breed, an ih mi mek di nachral saikl dehn weh kip di ayaa kleen. Hihn powaful an ih lov wi wahn lat. Soh wi ga evri reezn fi bileev dat hihn wahn geh rid a ayaa polooshan. Si di aatikl weh naym “Gaad Pramis Wi Dat Wi Planet Wahn Servaiv.”
