FI MARID PEEPL
2:Werk Tugeda
WEH IH MEEN?
Wen wahn hozban ahn wahn waif werk tugeda eena dehn marij, dehn da laik wahn pailat ahn wahn koa-pailat weh di flai wahn playn. Eevn wen prablemz kom op, dehn noh tink bowt dehnself, dehn tink bowt eech ada.
BAIBL PRINSIPL: “Dehn noh wahn bee too nohmoh, bot wan persn.”—Machyu 19:6.
“Wahn hozban ahn waif haftu werk tugeda fi ga wahn hapi marij.”—Christopher.
WAI IH IMPOATANT FI WERK TUGEDA?
Wen prablemz kom op ahn wahn hozban ahn waif noh werk tugeda, dehn ku staat kwaaril wid wan anada insteda fiks di prablem weh dehn gat. Dat mek smaal prablemz ton tu biga prablemz.
“Ih impoatant fi mek wahn kopl werk tugeda az wahn teem. If mee ahn mi hozban noh werk az wahn teem, ih wuda bee laik if wi da too difrent peepl weh jos hapm fi liv eena di saym plays insteda too peepl weh marid ahn lov wan anada. Ahn dat ku bee wahn prablem wen da taim fi mek impoatant disizhanz.”—Alexandra.
WEH YOO KU DU?
AKS YUSELF
-
‘Di moni weh Ah werk fa da onli fi mee?’
-
‘Ai haftu deh faar fahn mi marij mayt fi mek Ah ku rilaks?’
-
‘Ai fain miself di kip weh fahn mi hozban er waif famili eevn doa ih kloas tu dehn?’
DISKOS DEHNYA KWESCHAN WID EECH ADA
-
Eena weh wayz wi werk gud tugeda az wahn teem?
-
Eena weh wayz wi ku du beta?
-
Weh wi ku du fi werk beta az wahn teem?
SOHN TINGZ WEH KU HELP UNU
-
Imajin di too a unu di play tenis, bot insted a di play tugeda unu di play gens eech ada. Weh yoo ku du fi jain yu marij paadna soh dat too a unu ku deh pahn di saym teem?
-
Insteda di tink, ‘How Ai ku win?ʼ tink bowt ‘How too a wee ku win?ʼ
“Noh di point finga pahn hoo ga di faalt, bikaaz dat noh impoatant. Weh impoatant da fi ga pees ahn yooniti eena yu marij.”—Ethan.
BAIBL PRINSIPL: “Unu mos kantinyu fi shoa kansaan fi ada peepl, noh jos fi unu oanself.”—Filipiyanz 2:3, 4.
