Wahn persn weh aanis ahn weh adaz ku pen pan wahn aalwayz fala di roolz, kip dehn pramis, ahn tel di chroot. Wahn persn laik dat ku win oava di chros a dehn payrents, frenz, ahn dehn baas.

Moas a di taim, di amonk a freedom weh yu geh dipen pahn humoch adaz chros yu.

“Di bes way fi mek yu payrents chros yu da fi bee wahn machoar ahn rispansabl persn, noh onli wen dehn deh rong bot eevn wen yu deh bai yuself.”—Sarahi.

BAIBL PRINSIPL: “Unu fi kip di proov tu unuself weh kaina peepl unu.”—2 Korintyanz 13:5.

Dehnya da sohn tingz weh yu ku du if yu waahn mek yu payrents chros yu moa, er if yu waahn mek dehn chros yu agen.

Bee wahn aanis persn. Wen yu laik tel lai, peepl stap chros yu. Pahn di ada han, wen yu aanis ahn yu admit yu mistayk dehn, yu wahn ku win oava dehn chros.

“Ih eezi fi bee aanis wen tingz di goh gud. Bot wen yu aanis eevn bowt tingz weh ku mek yu luk bad, peepl wahn ku chros yu moa.”—Caiman.

BAIBL PRINSIPL: “Wi waahn bee aanis eena evriting weh wi du.”—Heebrooz 13:18.

Bee wahn rispansabl persn. Eena wahn servay weh dehn mi du wid sohn bizniz peepl da di U.S., 78 persent a dehn mi seh dat wan a di moas impoatant skil weh wahn kompani luk fa wen dehn di haiya werkaz da fi mek di persn bee sombadi weh adaz ku pen pahn. If yu laan fi bee wahn rispansabl persn fahn now, yu wahn geh fi benifit laytaraan.

“Mai payrents noatis wen Ai rispansabl bikaaz Ai du di werk weh dehn aks mi fi du rong di hows widowt dehn haftu di rimain mi. Di moa Ah du di werk widowt dehn haftu rimain mi, di moa dehn chros mi.”—Sarah.

BAIBL PRINSIPL: “Ah ga kanfidens eena yu; Ah noa dat yu wahn du moa dan weh Ah di aks yu fi du.”—Faileeman 21.

Bee wahn payshent persn. Ih eezi fi si wen sombadi di groa eena wahn fizikal way, bot ih tek taim fi mek adaz si dat yu di groa eena wahn imoashanal ahn mental way.

“Jos bikaaz yu shoa dat yu rispansabl wan taim noh meenz dat yu payrents an adaz wahn aalwayz chros yu. Yu need fi kip aan di shoa dat yu da wahn rispansabl persn.”—Brandon.

BAIBL PRINSIPL: “Unu mos bee payshent wid wan anada.”—Koloashanz 3:12.