Yu aidentiti da moa dan jos yu naym ahn di way yu luk. Ih ga fi du wid yu bileef, yu persnaliti, ahn di tingz weh impoatant tu yoo. Soh da evriting weh mek yoo az wahn persn.

If yu reeli noa yuself, yu wahn stan op fi weh yu bileev insteda mek adaz kanchroal yu.

“Wahn lata peepl da laik wahn manikin eena wahn kloaz shap. Di manikin noh chooz di kloaz weh ih wayr, da adaz chooz weh ih wayr.”—Adrian.

“Ah laan fi stan op fi weh rait, eevn wen ih noh eezi. Ah geh fi noa hoo da mi chroo chroo fren bai di way how dehn ak ahn bai di way how Ai ak rong dehn.”—Courtney.

BAIBL PRINSIPL: “Stap kapi di peepl a dis werl, ahn chaynj unuself. Fi du dat unu haftu chaynj di way unu tink.”—Roamanz 12:2.

Tink bowt hoo yoo rait now ahn bowt hoo yu waahn bee. Yu ku du dis wen yu tek wahn luk pahn yu schrent, yu weeknis, ahn di tingz weh yoo stan op fa. Fi du dat yu ku aks yuself dehnya kweschan:

Schrent: Ai ga eni talent er skil? Weh Ai gud pan? (Fi egzampl: Ai aalwayz deh pahn taim? Ai ga self kanchroal? Ai werk haad? Ai kain tu adaz?) Wat da sohn gud tingz weh Ah du?

SOHNTING WEH KU HELP YU: Yoo di ga wahn haad taim fi fain gud tingz bowt yuself? Aks yu ma, yu pa, er wahn fren weh yu chros fi help yu fain sohn gud tingz bowt yuself. Yu ku eevn aks dehn wai dehn tink da way bowt yu.

BAIBL PRINSIPL: “Eech persn fi chek weh ih du, kaaz den ih wahn ga reezn fi feel gud bowt ihself, an ih noh fi kompyaa ihself wid nobadi els.”—Galayshanz 6:4.

Weeknis: Dehn ga eniting weh Ai need fi werk pan fi bee wahn beta persn? Weh wuda temp mi fi du sohnting rang? Eena weh wayz Ah need fi ga moa self kanchroal?

BAIBL PRINSIPL: “If wi seh, ‘Wi noh ga no sin,ʼ den wi onli di fool op wiself.”—1 Jan 1:8.

Weh Ai Bileev: Weh kaina standadz Ai ga, ahn wai? Ai bileev eena Gaad? Wai Ai bileev dat Gaad egzis? Weh kaina tingz Ai tink noh fyaa, ahn wai? Weh Ai bileev wahn hapm eena di fyoocha?

BAIBL PRINSIPL: “Yu tinkin wahn kip yu sayf, an andastandin wahn protek yu.”—Proverbs 2:11.