Wen wi fergiv wi marij mayt, ih meenz dat wi lef di prablem bihain ahn wi noh hoal aan tu anga. Dis noh meen dat weh mi hapm neva mata er dat yu haftu priten laik di prablem neva hapm ataal.

BAIBL PRINSIPL: “Kantinyu fi put op wid wan anada ahn fergiv wan anada wid aala unu haat, eevn if sombadi du sohnting fi hert unu.”—Koloashanz 3:13.

“Wen yu lov sombadi, yu noh foakos pan ih mistayks. Insted, yu si how ih di chrai bee wahn beta persn.”—Aaron.

Wen yu hoal aan tu malis, ih ku afek yu eena wahn fizikal an imoashanal way, an ih ku aalso damij yu marij.

“Wahn taim, mi hozban mi seh sari fi sohnting weh mi reeli hert mi feelinz. Ih mi haad fi mek Ah fergiv ahn, bot afta wahn wail Ah stil en op di du it. Wan ting weh Ah rigret da dat Ah mi tek lang fi fergiv ahn. Sayka dat, wi rilayshanship mi sofa wahn lat.”—Julia.

AKS YUSELF

Tink bowt dis di neks taim yu marij mayt du sohnting weh hert yu feelinz:

• ‘Ai lee bit tu tin-skin?ʼ

• ‘Weh hapm soh seeryos dat Ai need fi mek ih seh sari, er Ai ku jos ferget bowt it?ʼ

DISKOS DEHNYA KWESCHAN WID EECH ADA

• How lang wi yoozhwali tek fi fergiv wan anada?

• Weh wi ku du fi fergiv wan anada faasa?

SOHN TINGZ WEH KU HELP UNU

• Wen yu hozban er waif ofen yu, noh tink dat ih du it fi spait.

• Chrai bee reeznabl wid yu mayt ahn memba dat aala wi “mek mistayk lata taim.”—Jaymz 3:2.

“Ih eezi fi fergiv wen di too a wi du rang, bot ih haada wen ih feel laik da jos wan a wi du rang. Wi need fi bee reeli hombl soh dat wi ku fergiv.”—Kimberly.

BAIBL PRINSIPL: “Hori setl mataz.”—Machyu 5:25.