FI MARID PEEPL
3: Rispek
WEH IH MEEN?
Wen wahn hozban ahn waif rispek eech ada, dehn lov eech ada eevn wen dehn noh gree pahn sohnting. Di buk weh naym Ten Lessons to Transform Your Marriage seh: “Dehnya kopl avoid eni sichuwayshan weh mek dehn noh waahn agree wid eech ada. Insted, dehn taak bowt dehn prablemz wid eech ada. Dehn shoa rispek ahn lisn tu eech ada, ahn den di too a dehn kohn tu wahn agreement.”
BAIBL PRINSIPL: “Lov . . . noh tink onli bowt ih oanself.”—1 Korintyanz 13:4, 5.
“Tu mee, fi rispek mi waif meenz dat Ah cherish ahn, an Ah noh waahn du eniting fi hert shee er damij wi marij.”—Micah.
WAI RISPEK IMPOATANT?
Wen wahn marid kopl noh rispek eech ada, ih shoa eena di way dehn taak tu wan anada. Fi egzampl, dehn wuda kritisaiz, mak, ahn seh tingz weh ku hert. Peepl weh stodi famili laif seh dat dehnya kaina ting ku mek wahn marij en op eena divoas.
“Wen yu mek fon a yu waif ahn kip di mak ahn, dat onli mek ih feel laik ih noh gud inof, ih stap chros yu, an dat damij yu marij.”—Brian.
WEH YOO KU DU?
AKS YUSELF
Tink bowt weh yu mi seh ahn du tu yu marij mayt oava di laas week. Den aks yuself dehnya kweschan:
-
‘Humoch taim Ah mi kritisaiz mi marij mayt, ahn humoch taim Ah mi tel ahn nais tingz?ʼ
-
‘Eena weh spesifik wayz Ah mi shoa dat Ah rispek mi marij mayt?ʼ
DISKOS DEHNYA KWESCHAN WID EECH ADA
-
Weh kaina tingz wi ku seh er du fi shoa dat wi rispek eech ada?
-
Weh kaina tingz wee need fi stap seh er du fi mek di ada persn noh feel laik wi noh rispek ahn?
SOHN TINGZ WEH KU HELP UNU
-
Rait dong chree wayz how yu wuda waahn yu marij mayt shoa dat ih rispek yu. Mek yu marij mayt du di saym. Den, ekschaynj unu lis, ahn werk haad fi shoa rispek eena di difrent wayz weh unu put pahn unu lis.
-
Mek wahn lis a di kwaliti dehn weh yu admaiya bowt yu mayt ahn tel ahn humoch yu lov dehndeh kwalitiz.
“Fi rispek mi hozban meenz dat Ah du tingz weh shoa dat Ah lov ahn, an dat Ah waahn ih bee hapi. Fi shoa rispek, yu noh aalwayz haftu du big tingz; sohntaim da di smaal tingz konk.”—Megan.
Di impoatant ting da noh fi mek yoo feel laik yu di rispek yu marij mayt, bot fi mek yu mayt reeli feel laik yu rispek ahn.
BAIBL PRINSIPL: “Unu mos shoa tenda afekshan, kompashan, ahn kainis tuwaadz wan anada. An unu mos bee hombl, an unu mos kip pees wid wan anada, an unu mos bee payshent wid wan anada.”—Koloashanz 3:12.
