FI YONG PEEPL
12: Set Goalz
WEH IH MEEN?
Wahn goal da noh sohnting yu wish fa. Fi reech wahn goal yu need fi plan gud, bee redi fi adap, ahn werk haad.
Yu ku reech sohn goalz eena wahn fyoo dayz er weeks, an adaz mait tek wahn fyoo monts. Bot biga goalz ku tek op tu wahn yaa er moa fi reech. Yu ku brok dong dehnya goalz eena smaala goalz weh yu ku reech eena wahn shaat peeryad a taim.
WAI IH IMPOATANT FI SET GOALZ?
Wen yu reech yu goalz ih ku bil yu kanfidens, mek yu frenship wid adaz geh schranga, ahn mek yu feel hapiya.
Yu wahn ga moa kanfidens: Wen yu set smaal goalz ahn reech dehn, ih gi yu di kanfidens fi set biga goalz. Ih aalso help yu fi ga moa kanfidens wen yu deel wid evriday prablemz laik wen yu stan op tu pyaa presha.
Yu wahn ga schranga frenship wid adaz: Peepl laik deh rong adaz weh noa weh dehn waahn eena laif, ahn weh wilin fi werk haad fi get it. Wan a di bes way fi schrentn yu frenship wid sombadi da fi werk lang wid dehn fi reech wahn goal weh unu set tugeda.
Yu wahn hapiya: Yu feel gud wen yu reech goalz weh yu set.
“Ai laik set goalz fi miself bikaaz ih kip mi bizi an ih gi mi sohnting fi werk pan. Ahn wen yu reech wahn goal, ih feel gud fi luk bak ahn seh, ‘Man, Ah du it! Ah reech di goal weh Ah mi set.ʼ”—Christopher.
BAIBL PRINSIPL: “If yu wayt fi mek di breez ahn di weda bee perfek, yu wahn neva plaant eniting ahn yu wahn neva reep eniting.”—Ecclesiastes 11:4, Todayʼs English Version.
WEH YOO KU DU?
Fi set goalz ahn reech dehn, yu need fi du dehnya tingz.
Mek wahn lis a yu goalz. Bays pahn da lis, disaid wich wan yu wahn werk pan fers, wich wan yu wahn werk pan sekant, ahn soh aan.
Mek wahn plan. Du dis fi eech goal:
-
Set wahn dayt weh yu noa yu wahn ku reech yu goal.
-
Figa owt weh aal yu need fi du fi reech yu goal ahn rait it dong.
-
Tink bowt weh prablemz ku kom op, ahn how yu ku werk rong dehn.
Werk pan it. Noh wayt til yu gat evriting anda kanchroal fi mek yu staat werk pan it. Tink bowt di fers ting weh yu need fi du soh dat yu ku reech yu goal, ahn du it. Kip chrak a di proagres weh yu di mek.
BAIBL PRINSIPL: “Wahn persn weh werk haad mek planz, an ih wahn ga sokses.”—Proverbs 21:5.
