FI PAYRENTS
8: Set Wahn Gud Egzampl
WEH IH MEEN?
Payrents weh set wahn gud egzampl chrai haad fi praktis weh dehn preech. Fi egzampl, yu kyaahn ekspek yu chiljren fi bee aanis if dehn hyaa yu seh: “Tel dehn Ah noh deh hoam,” wen sombadi kohn da yu doa.
“Lata peepl wuda seh ‘Du weh Ah seh, noh weh Ah du.ʼ Bot dat noh werk wid pikni. Bikaaz dehn da laik sponj weh tek een evriting weh wi seh ahn du. Ahn dehn kwik fi tel wi wen wi noh di praktis weh wi preech.”—David.
BAIBL PRINSIPL: “Yu preech, ‘Yu noh fi teef.ʼ Stilyet, yoo di teef!”—Roamanz 2:21.
WAI WAHN GUD EGZAMPL IMPOATANT?
Chiljren an eevn teenayjaz fala dehn payrents egzampl moa dan enibadi els egzampl. Payrents, unu da di mayn wanz weh ku gaid unu chiljren eena di rait dairekshan. Bot dis onli pasabl if unu praktis weh unu preech.
“Wi ku seh sohnting oava ahn oava tu wi pikni ahn wi mait wanda if dehn eevn di lisn tu wi. Bot di wan taim wen wi noh du weh wi seh, dehn wahn tel wi bowt it rait away. Chiljren wach evriting weh wi du, eevn wen wi tink dehn noh di noatis.”—Nicole.
BAIBL PRINSIPL: “Di wizdom weh kohn fahn hevn . . . aalwayz sinsyaa.”—Jaymz 3:17.
WEH YOO KU DU?
Egzamin yu oan standadz. Weh kaina entataynment yoo wach? How yoo chreet yu marij mayt ahn chiljren? Weh kaina frenz yoo gat? Yoo tink bowt adaz? Yoo da di kaina persn yu waahn yu pikni bee?
“Mee ner mi hozban ekspek wi chiljren fi rispek prinsiplz weh wee wiself noh rispek.”—Christine.
Seh sari wen yu mek wahn mistayk. Yu chiljren don noa yu noh perfek. Soh if yu seh sari tu yu marij mayt er yu chiljren wen yu du sohnting rang, yu wahn teech dehn wahn impoatant lesn bowt weh ih meen fi bee aanis ahn hombl.
“Wi need fi admit wi mistayks fronta wi chiljren ahn seh sari. If wi noh du dat, wi chiljren wahn haid dehn mistayks.”—Robin.
“Az payrents, fi wee egzampl da weh wi chiljren wahn fala. Soh, ih impoatant dat wi set wahn gud egzampl bikaaz dehn aalwayz noatis evriting weh wi seh ahn du. Wee da laik wahn buk weh dehn wahn aalwayz laan fram.” —Wendell.
