FI YONG PEEPL
11: Werk Haad
WEH IH MEEN?
Wahn persn weh werk haad noh wahn ron weh fahn werk. Insteda dat, dehn injai du werk fi dehnself an adaz, eevn if da werk weh adaz luk dong pan.
WAI IH IMPOATANT FI WERK HAAD?
Weda yu laik it er nat, laif ful a rispansabiliti. Sins wi liv eena wahn werl weh lata peepl noh laik werk, yu wahn mek yu laif eeziya if yu laan fi werk haad.—Ecclesiastes 3:13.
“Ah laan dat wen yu werk haad, yu feel prowd a yu werk ahn yu feel satisfai wid weh yu du. Wen Ah geh fi ekspeeryens dat, Ah staat tu laik werk. Wen adaz noa dat yu da wahn haad werkin persn, dat help yu fi ga wahn gud repyutayshan.”—Reyon.
BAIBL PRINSIPL: “Gud kohn fahn evri kaina haad werk.”—Proverbs 14:23.
WEH YOO KU DU?
Steps weh ku help yu vyoo werk eena wahn pazitiv way:
Wen yu di laan fi du sohnting, du it gud. Aalwayz du yu bes eena wateva yu di du, weda da fi help du tingz rong di hows, hoamwerk, er pahn yu jab. An if yu feel laik yu noh di du sohnting gud, chrai fain wayz fi du it faasa ahn beta. Di moa yu laan fi du di werk beta, di moa yu wahn geh fi injai it.
BAIBL PRINSIPL: “Yu eva si wahn man weh du gud werk? Hihn wahn stan op fronta di king dehn; ih noh wahn stan op fronta kaman peepl.” —Proverbs 22:29.
Si di biga picha. Adaz wahn benifit fahn yu haad werk wen yu tek yu rispansabiliti seeryos. Fi egzampl, if yoo da wahn haad werka, yu wahn ku help yu famili du tingz rong di hows, ahn dis wahn mek dehn ga les tingz fi du.
BAIBL PRINSIPL: “Wi feel moa hapinis wen wi giv tu adaz dan wen wi get tingz fahn ada peepl.”—Aks 20:35.
Du moa dan weh yu sopoas tu du. Insteda du wahn lee bit a werk, du moa dan weh dehn aks yu fi du. Da way deh, yoo wahn di kanchroal yu laif ahn yu wahn du moa, noh bikaaz yu haftu, bot bikaaz yu waahn.—Machyu 5:41.
BAIBL PRINSIPL: “Du dis lee fayva fi mi, noh bikaaz yu haftu, bot bikaaz yu waahn du it.” —Faileeman 14.
Bee balans. Peepl weh werk haad noh layzi ahn dehn aalso noa wen dehn di werk tu moch. Dehn du dehn bes fi bee balans, soh dat dehn ku injai dehnself wen dehn werk ahn wen dehn res.
BAIBL PRINSIPL: “Ih beta fi get inof res dan fi werk ekschra haad ahn di chays afta loan breez.”—Ecclesiastes 4:6.
