Peepl wid moaral standadz noa gud-wan weh rait fahn weh rang. Fi dehn moaralz noh chaynj bays pahn how dehn di feel. Raada, ih stay di saym kaaz ih set pahn wahn salid set a prinsiplz weh gaid dehn kandok, eevn wen ada peepl noh di wach.

Chiljren hyaa aal kaina faals aidyaaz bowt weh rang ahn weh rait. Dehn hyaa dehnya ting fahn peepl weh dehn goh da skool wid, fahn di myoozik dehn lisn tu, er fahn di moovi ahn TV shoa dehn wach. Dis presha weh dehn fays ku mek dehn feel kanfyooz bowt weh dehn noa fi bee rait er rang.

Dis da wahn big prablem fi teenayjaz. Wahn buk weh naym Beyond the Big Talk, seh dat yoots “need fi andastan dat peepl wahn presha dehn fi bihayv wahn sertn kaina way soh dat adaz ku laik dehn, ahn dehn need fi laan fi mek disizhanz akaadn tu dehn oan moaral standadz, eevn if dat meenz fi goh gens dehn frenz.” Ih klyaa fi si dat payrents need fi teech ahn chrayn dehn pikni bifoa dehn ton teenayja.

Teech dehn weh rait fahn weh rang.

BAIBL PRINSIPL: “Peepl weh don groa op . . . ga ekspeeryens eena how fi tel weh da di difrens bitween gud ahn eevl.”—Heebrooz 5:14.

• Taak di chroot. Yooz evriday sichuwayshanz fi teech ahn rait ahn rang. Fi egzampl: Tel ahn playn wen sombadi aanis, laayal, er kain. If nat, tel ahn playn tu dat di persn noh aanis, ih noh laayal, ih noh kain, er wateva di kays mait bee. If yu du dis, yu chail wahn laan weh tingz gud fi du ahn weh tingz bad an ih shudn du.

• Eksplayn wai tingz rait er rang. Fi egzampl, aks kweschanz laik: Wai ih bes fi bee aanis? How wahn lai ku brok op wahn frenship? Wai ih bad fi teef? Reezn wid yu chail, ahn dat wahn help ahn fi laan fi noa weh rait fahn weh rang.

• Tel dehn how wi benifit wen wi ga gud moaralz. Yu ku seh sohnting laik: “If yoo da wahn aanis persn, ada peepl wahn chros yu” er “If yoo da wahn kain persn, adaz wahn laik deh rong yu.”

Mek shoar dat peepl noa dat yu hoal famili ga gud moaral standadz.

BAIBL PRINSIPL: “Unu fi chek unu haat gud.”—2 Korintyanz 13:5.

•   Evribadi eena di famili shuda ga gud moaralz soh dat unu ku seh widowt shaym:

  • “Fi wee famili noh lai.”

  • “Wee noh hert adaz er hala aata peepl.”

  • “Wee noh taak rof, kos, ner insolt peepl.”

Yu chail wahn si dat moaral standadz da noh jos roolz weh di payrents set, bot da standadz weh di hoal famili fala.

• Mek it wahn habit fi diskos yu famili standadz wid yu chail. Yooz sichuwayshanz weh unu fays evri day fi teech dehn. Yu ku kompyaa di moaralz weh yoo teech dehn wid weh peepl teech pahn TV er da skool. Aks yu pikni kweschanz laik: “If da mi yoo, weh yoo wuda mi du?” “How wi famili wuda mi deel wid dis?”

Mek op unu main fi du weh rait.

BAIBL PRINSIPL: “Kip wahn klyaa kanshans.”—1 Peeta 3:16, NW.

• Komen dehn wen dehn bihayv gud. Wen yu chail du sohnting gud, mek ih noa dat ih mi du gud an eksplayn tu ahn wai weh ih mi du mi rait. Fi egzampl, yu ku seh sohnting laik: “Ah prowd a yu kaaz yu mi aanis.” If yu chail tel yu dat ih mi du sohnting rang, komen ahn fi bee aanis bifoa yu karek ih akshan.

• Karek dehn wen dehn bihayv bad. Help yu chail fi laan fi oan op tu ih mistayk dehn. Chiljren fi noa weh dehn mi du rang ahn how fi dehn akshan mi difrent fahn how di famili naamali bihayv. Som payrents noh bada tel dehn chiljren weh dehn mi du rang bikaaz dehn noh waahn dehn ‘feel badʼ er ‘feel diskorijʼ, bot wen payrents eksplayn tu dehn chiljren wai weh dehn mi du mi rang, ih wahn chrayn dehn lee kanshans ahn help dehn fi avoid du sohnting rang eena di fyoocha.