Yu ku pen pahn peepl weh rispansabl. Wen yu aks wahn rispansabl persn fi du sohnting, yu noa dat dehn wahn du it gud ahn pahn taim.

Wahn chail ku laan fi bee rispansabl eevn wen ih veri yong. Di buk Parenting Without Borders seh: “Wen wahn chail fifteen monts oal ih ku du weh ih payrents tel ahn fi du. Ahn wen wahn chail ayteen monts oal ih staat tu waahn du weh ih payrents du.” Ih aalso seh dat “eena wahn lata kolcha, wen wahn chail reech bitween di ayj a faiv ahn sevn yaaz, dehn payrents staat tu teech dehn how fi du tingz rong di hows. Eevn doa di chail reeli yong dehn ku du wahn lata tingz rong di hows reeli gud.”

Tudeh day, wahn lata yong adolts chrai fi liv pahn dehn oan bot dehn kyaahn handl it soh dehn goh bak hoam tu dehn payrents. Sohntaim, dis hapm bikaaz dehn payrents neva teech dehn how fi bee waiz wid dehn moni, how fi tek kyaa a wahn hoam, ahn how fi liv op tu dehn rispansabiliti.

Soh, ih gud fi teech yu chiljren how fi bee rispansabl now soh dat dehn wahn noa weh fi du wen dehn da adolts. Di buk, How to Raise an Adult seh: “Yu noh waahn du evriting fi dehn til dehn reech ayteen yaaz ahn den chroa dehn owt deh eena di reel werl.”

Gi dehn werk fi du rong di hows.

BAIBL PRINSIPL: “Gud kohn fahn evri kaina haad werk.”—Proverbs 14:23.

Wen wahn chail yong, ih eega fi help ih payrents wid wateva dehn di du. Az wahn payrent, yu ku tek advantij a dis nachral dizaiya ahn gi yu chail werk fi du rong di hows.

Sohn payrents noh waahn du dat. Dehn seh dat dehn noh waahn gi dehn chiljren moa werk fi du rong di hows bikaaz dehn aredi ga wahn lata skool werk fi du. Soh wai berdn dehn eevn moa?

Bot chiljren weh ga werk fi du at hoam du beta eena skool bikaaz dehn laan how fi staat ahn finish di werk weh dehn geh fi du. Aalso, di buk Parenting Without Borders seh: “If wi noh mek chiljren help wi wen dehn yong ahn waahn help, dehn staat tu tink dat ih noh impoatant fi help adaz . . .  Dehn aalso staat tu ekspek dat tingz wahn geh don fi dehn.”

Laik weh da buk menshan, wen chiljren du werk rong di hows dehn laan fi help adaz ahn noh tink onli bowt dehnself. Wen dehn du werk rong di hows ih help dehn fi feel laik dehn da wahn impoatant paat a di famili ahn dehn aalso andastan dat dis da sohnting dehn sopoas tu du.

Help yu chiljren fi tek rispansabiliti fi dehn mistayk dehn.

BAIBL PRINSIPL: “Lisn tu kongsl an aksep disiplin, soh dat eena di fyoocha yu ku geh waiz.”—Proverbs 19:20.

Wen yu chiljren mek wahn mistayk—fi egzampl, if yu son er daata damij sohnting weh bilangz tu sombadi els, noh kova op weh hapm. Chiljren kud aksep di bad rizolts a dehn akshanz; dehn ku seh sari er pay fi di damij weh dehn du.

Wen yu chiljren laan dat dehn rispansabl fi di mistayk dehn weh dehn mek, ih wahn help dehn fi:

• bee aanis an admit dehn faalts

• noh akyooz adaz

• noh mek ekskyoos

• seh sari wen da di rait ting fi du