Fi mek sombadi laan fi get bak op meenz dat dehn andastan dat dehn wahn fayl sohntaim. Yu onli geh dis skil fahn ekspeeryens. Jos laik how wahn chail kyaahn laan fi waak widowt ih faal dong, sayhn way soh, ih kyaahn ga sokses eena laif if ih noh fays prablemz sohntaim.

Sohn chiljren geh diskorij wen dehn noh ga sokses eena sohnting, wen dehn di fays tof sichuwayshanz, er wen adaz fain faalt wid weh dehn du. Adaz giv op kompleetli. Bot dehn need fi andastan dehnya faks:

• Wi noh wahn aalwayz ga sokses eena evriting wi du.—Jaymz 3:2.

• Evribadi wahn goh chroo tof sichuwayshanz sohntaim.—Ecclesiastes 9:11.

• Yu ku onli improov if sombadi tel yu weh yu du rang.—Proverbs 9:9.

Wen wahn chail laan fi get bak op afta wahn tof sichuwayshan, dat wahn help ahn fi feel laik ih ku handl eni kaina prablem eena laif ahn ga sokses.

Wen yu chail fayl.

BAIBL PRINSIPL: “Di raichos wan mait faal dong sevn taimz, bot fi shoar ih wahn get op agen.”—Proverbs 24:16.

Help yu chail fi noa weda wahn prablem reeli seeryos er nat. Fi egzampl, weh ih wahn du if ih fayl wahn tes da skool? Ih mait giv op ahn seh: “Ai noh noa fi du notn, Ai aalwayz fayl!”

Fi teech yu chail fi get bak op, yu need fi help ahn fi tink bowt how ih ku du beta neks taim. Eena dis way, ih wahn chrai fi solv di prablem insteda geh sad.

At di sayhn taim, noh fiks di prablem fi yu chail. Insted, help yu chail fi fain wahn way fi solv it ihself. Yu mait aks ahn, “Weh yu ku du fi andastan di sobjek weh dehn di teech yu beta?”

Wen bad tingz hapm.

BAIBL PRINSIPL: “Yoo noh eevn noa weh wahn hapm tumaaro.”—Jaymz 4:14.

Wi kyaahn pridik di fyoocha. Wahn persn ku bee rich tudeh ahn poa tumaaro; wahn persn ku bee helti tudeh ahn sik tumaaro. Di Baibl seh: “Di persn weh ron faas noh aalwayz win di rays, ner di  schrang wan win di waar, . . . bikaa taim ahn tingz weh dehn noh ekspek afek aala dehn.”—Ecclesiastes 9:11.

Az wahn payrent, yu mait du aal weh yu kud fi protek yu chail fahn daynja. Bot fi tel di chroot, ih noh pasabl fi protek dehn fahn aala di prablemz eena laif.

Af koars, yu chail mait noh oal inof fi noa weh ih feel laik fi looz wahn jab er fi ga moni prablemz. Stil, yu ku help ahn fi deel wid ada prablemz—fi egzampl, if hihn an ih fren faal owt er if wahn famili memba ded. *

Wen sombadi tel yu chail dat ih need fi du beta.

BAIBL PRINSIPL: “Lisn tu kongsl . . . soh dat eena di fyoocha yu ku geh waiz.”—Proverbs 19:20.

Wen sombadi tel yu chail dat ih need fi du beta eena sohnting, da noh bikaaz dehn waahn hert yu chail er mek ih geh frayd, bot raada, da persn waahn help yu chail fi karek wahn akshan er atichood weh ih need fi chaynj.

Wen yu teech yu chail fi aksep karekshan, den di too a unu wahn benifit. Wahn pa weh naym Jan seh: “If chiljren noh karek dehn oan mistayk dehn, den dehn wahn neva laan. Dehn wahn jomp fahn wan prablem tu di neks, ahn yu wahn spen yu hoal laif di fala dehn, di fiks di prablemz weh dehn kaaz. Dat mek laif mizarabl fi di payrents ahn fi di chail.”

How yu ku help yu chail fi benifit wen sombadi tel ahn bowt sohnting weh ih need fi chaynj? Wen sombadi tel yu chail bowt sohnting weh ih need fi chaynj—weda ih deh da skool er eniway els—noh seh dat di persn neva fi karek ahn. Insted, yu kud aks yu chail:

• “Wai yu tink dehn mi karek yu?”

• “How yu ku du beta?”

• “Weh yu wahn du di neks taim yu deh eena dis sichuwayshan?”

Soh wen sombadi tel yu chail bowt sohnting weh ih du er wahn atichood weh ih need fi chaynj, memba, ih wahn help ahn now ahn wen ih groa op.