Chiljren need adolts eena dehn laif hoo ku gi dehn gaidans ahn gud advais. Az wahn payrent, da yoo ga di rispansabiliti fi du dat. Bot ada adolts weh da wahn gud egzampl ku help yu chiljren ahn gi dehn advais tu.

Eena lata konchri, yong peepl spen lee bit a taim wid adolts. Kansida dis:

• Chiljren spen moas a dehn taim da skool, wehpaat dehn ga moa pikni dan adolts.

• Afta skool, sohn yong peepl deh hoam aal bai dehnself bikaaz di too a dehn payrents haftu werk.

• Wan risaach shoa dat eena di United States, chiljren bitween di ayj a 8 ahn 12 yaaz spen bowt siks owaz pahn dehn ilekchranik divais eeda di play veedyo gaym, wach TV, er lisn tu myoozik. *

Di buk weh naym Hold On to Your Kids seh dat tudeh moa ahn moa yong peepl di aks ada yong peepl fi advais insteda aks adolts.

Spen taim wid yu chiljren.

BAIBL PRINSIPL: “Chrayn wahn chail eena di way ih fi goh; eevn wen ih groa oal ih noh wahn schray fan it.”—Proverbs 22:6, futnoat.

Chiljren yoozhwali waahn dehn payrents gaid dehn ahn help dehn. Az a mata a fak, sohn eksperts seh dat wen chiljren ton teenayjaz, dehn valyu di advais a dehn payrents moa dan di advais a ada teenayjaz. Dakta Laurence Steinberg rait eena di buk You and Your Adolescent dat wahn chail wahn aalwayz kay bowt weh ih payrents tink ahn lisn tu weh dehn seh eevn if ih noh gree wid evriting.

Sins yu chiljren luk op tu yoo fi gaidans, tek advantij a da apachooniti. Spen taim wid yu chiljren ahn tel dehn how yu feel, weh yu tink, ahn weh yu bileev eena. Shayr yu ekspeeryens dehn wid dehn.

 Mek dehn spen taim wid peepl weh da gud egzampl.

BAIBL PRINSIPL: “Di persn weh di waak wid waiz peepl wahn geh waiz.”—Proverbs 13:20.

Yoo ku tink bowt wahn adolt weh da wahn gud egzampl fi yu chail? Wai yu noh mek planz fi mek yu chail spen sohn taim wid da persn? Af koars, dat noh meenz dat yu di giv op yu atariti az wahn payrent. Bot inkorijment fahn sombadi weh yu chros, ahn weh yu noa noh wahn hert yu son er daata, ku giv ahn di ekschra chraynin weh ih need. Eena di Baibl, Timoti—eevn az wahn adolt—mi benifit wahn lat fahn di frenship weh hihn ahn Paal mi gat, ahn Paal mi benifit tu.—Filipiyanz 2:20, 22.

Joorin di paas 100 yaaz, lata famili membaz laik granpayrents, onkl, an aanti mait noh liv tugeda eena di saym hoam er naybahud, an ada relitiv mait eevn liv da ada paats a di werl. If dat da fi yoo sichuwayshan, chrai fi gi yu teenayja di apachooniti fi laan kwalitiz fahn ada adolts rong yu weh da gud egzampl.