5 Sofarin Wahn Eva En?
Wai di Ansa Soh Impoatant
If wi ga reezn fi bileev dat sofarin wahn en, den wi ga hoap dat laif wahn geh beta, an ih ku eevn chaynj di way wi tink bowt Gaad.
Tink Bowt Dis
Lata peepl wuda waahn geh rid a sofarin, bot dehn kyaahn du moch fi solv aala wi prablemz. Fi egzampl:
Eevn doa medikal chreetment di geh beta ahn beta . . .
-
Haat dizeez da stil di nomba wan kaaz a det.
-
Kyansa kil milyanz a peepl evri yaa.
-
Dr. David Bloom mi rait eena Frontiers in Immunology: “Di werl stil di deel wid aal kaina dizeez. Som a dehn deh rong fi yaaz, som a dehn nyoo, ahn som a dehn wi mi tink wi geh rid a bot dehn di kohn bak.”
Eevn doa sohn konchri ga lata moni . . .
-
Evri yaa, milyanz a pikni ded, ahn moas a dehn da fahn difrent ayrya weh poa peepl liv.
-
Bilyanz a peepl liv widowt akses tu wahn prapa soorij sistem.
-
Honjridz a milyanz noh ga akses tu kleen waata.
Eevn doa moa ahn moa peepl andastan hyooman raits . . .
-
Eena lata konchri, peepl mek bizniz di bai ahn sel peepl ahn chreet dehn laik slayv, ahn di peepl weh du dat noh fays jostis. Lata taim di govament “noh noa da hoo di du dehnya ting er dehn noh ga weh dehn need fi deel wid it,” akaadn tu wahn ripoat fahn di United Nations.
FAIN OWT MOA
Wach di veedyo Wat Da Gaad Kingdom? pahn jw.org.
Di Baibl Seh
Gaad kay bowt wi.
Hihn feel fi wi wen wi sofa payn ahn saro.
“[Gaad] noh hayt ner ignoar di sofarin a di wan weh di sofa; ih noh haid ih fays fan ahn. Wen ih mi krai owt tu ahn fi help, ih mi hyaa.”—PSALM 22:24.
“Chroa aala yu woriz ahn kyaa pahn Gaad, bikaaz hihn kyaa bowt yoo.”—1 PEETA 5:7.
Sofarin noh gwehn aan fareva.
Di Baibl pramis dat Gaad perpos fi wi wahn kohn chroo.
“Gaad . . . wahn waip weh aala dehn aiywaata fahn dehn aiy. Dehn noh wahn ded nohmoh ner sofa, ner krai ner feel payn nohmoh.”—REVILAYSHAN 21:3, 4.
Gaad wahn geh rid a evriting weh kaaz peepl fi sofa.
Hihn wahn yooz ih Kingdom, weh di Baibl diskraib az wahn reel govament, fi mek shoar dis hapm.
“Di Gaad a hevn wahn set op wahn kingdom weh wahn neva geh dischrai. Ahn dis kingdom wahn neva geh paas aan tu eni ada peepl. . . . Ih wahn bee di onli wan weh wahn laas fareva.”—DANIEL 2:44.
