Ih noh fyaa wen gud peepl sofa. Dat mek som peepl feel laik ih noh mek sens fi chrai bee gud if dehn wahn sofa eniway.

Som peepl bileev dat wen wahn persn ded, dehn kom bak ahn liv eeda az wahn animal er persn ahn dis hapm oava ahn oava. If dehn mi du gud tingz, dehn wahn baan agen ahn liv wahn beta laif. If dehn mi du bad tingz, dehn wahn baan agen ahn liv wahn haad laif. Soh if da bileef chroo, den dat meen dat eevn if wahn persn gud ih ku stil sofa bikaaz ih mi du wahn lata bad tingz eena di “laif weh ih mi liv bifoa.” Bot . . .

• If wahn persn kyaahn eevn memba weh ih mi du eena di laif weh ih mi liv bifoa, yu tink ih wahn noa wai ih eevn di sofa?

• If wi noa dat weh wi mi du eena wi paas laif wahn kohn bak fi afek wi, den wai wi shuda eevn bada werk haad fi stay helti, ahn kip sayf?

  FAIN OWT MOA

  Wach di veedyo Wai Gaad Talarayt Sofarin? pahn jw.org.

Sofarin da noh ponishment fahn Gaad

Wahn lata taimz wahn persn mait geh hert bikaaz ih deh da di rang plays da di rang taim.

“Di persn weh ron faas noh aalwayz win di rays, di persn weh schrang noh aalwayz win di waar, di persn weh waiz noh aalwayz ga food, di persn weh smaat noh aalwayz geh rich, ahn di persn weh ga nalij noh aalwayz ga sokses, bikaaz taim ahn tingz weh dehn noh ekspek afek aala dehn.”—ECCLESIASTES 9:11.

Wi sinful hyooman naycha kanchribyoot tu sofarin.

Peepl naamali yooz di werd “sin” fi rifaa tu sohnting bad weh sohnbadi du. Bot di Baibl aalso seh dat da wahn kandishan weh aal hyoomanz inherit, weda dehn gud er bad.

“Ah mi baan gilti a sin, fahn di taim wen mi ma mi geh pregnant Ai da-mi don wahn sina.”—PSALM 51:5, Futnoat.

Sin afek aal hyoomanz eena wahn terabl way.

Sin noh onli damij wi rilayshanship wid wi Kriyayta bot ih aalso mek wi kyaahn bee yoonaitid wid Gaad hoali aynjel dehn. Sin da di reezn wai evribadi pahn dis ert di sofa wahn lat.

“Wen Ah waahn du rait, eevl deh wid mi.”—ROAMANZ 7:21.

“Aala weh Gaad mek di groan jos laik wahn uman weh di groan wid payn wen ih di baan wahn baybi.”—ROAMANZ 8:22.