Sohn peepl noatis dat yong peepl weh spen wahn lata taim onlain naamali . . .

• geh adiktid tu dehn divais.

• buli peepl onlain er ada peepl wuda buli dehn onlain.

• si poarnografi, eevn if dehn neva mi-di luk far it.

ADIKSHAN

Sohn onlain aktiviti ahn gaymz dizain eena wahn way soh dat ih haad fi mek yu stap yooz dehn. Di buk Reclaiming Conversation seh: “Di ap dehn eena wi foan dizain eena wahn way soh dat wi noh waahn let goh wi foan.” Di bizniz dehn mek moni wen wi wach advataizments, soh di langa wi yooz dehndeh ap weh gat een advataizments, di moa moni dehn mek.

TINK BOWT DIS: Yoo si dat yu chiljren kyaahn du widowt dehn divais? How yu ku help dehn mek di bes yoos a dehn taim?—IFEEZHANZ 5:15, 16.

ONLAIN BULI

Sohn peepl bihayv rood wen dehn deh onlain. Dat da how dehn ku staat tu buli adaz.

Sohn peepl bihayv rood onlain bikaaz dehn reeli waahn bee papyula ahn dat da di onli way dehn ku geh aal di atenshan weh dehn waahn. Er wahn persn ku feel hert ahn tink dat adaz di chreet ahn bad if ih fain owt dat dehn noh invait ahn tu wahn paati.

TINK BOWT DIS: Fi yoo chiljren rood wid adaz wen dehn deh onlain? (Ifeezhanz 4:31) Dehn feel bad wen dehn si er hyaa dat adaz di du tingz ahn dehn noh invait dehn?

POARNOGRAFI

Ih veri eezi fi fain imoaral tingz pahn di Intanet. Sohn divais alow payrents fi kanchroal weh dehn chiljren si, bot sohntaim dis noh werk ahn dehn chiljren stil en op di si bad tingz.

Sekstin, weh da fi sen sekshwal mesij, picha, er veedyo fahn wahn foan, ku bee sohnting weh goh gens di laa. Eena sohn kays, sohn yong peepl weh sen er wach imoaral pichaz a ada yong peepl ku geh chaaj fi chail poarnografi; dis da wahn veri seeryos kraim.

TINK BOWT DIS: How yoo ku help yu chiljren fi noh faal eena di temtayshan fi wach er sen imoaral pichaz onlain?—IFEEZHANZ 5:3, 4.

CHRAYN YU CHILJREN

Eevn doa chiljren fain it eezi fi yooz teknalaji, dehn stil need gaidans. Di buk Indistractable seh dat wen yu gi chiljren wahn foan er eni ada divais bifoa dehn eevn noa how fi yooz it, “ih az bad az if yu di alow dehn fi jomp eena waata widowt dehn eevn noa how fi swim.”

Pik di sojeshanz weh yu wuda waahn chrai az wahn payrent, er rait dong yu oan aidyaaz.

• Taak tu mi chail bowt how fi bee kain wen ih deh onlain

• Help mi chail laan fi deel wid ih feelinz, espeshali wen ih feel lef owt

• Du wateva Ah kud fi protek mi chail fahn imoaral tingz onlain

• If mi chail ga wahn foan, chek weh ih gat eena it

• Disaid humoch taim mi chail shuda spen di yooz ih divais evri day

• Noh alow mi chail fi ga ih divais wid ahn eena ih room, espeshali da nait wen ih deh bai ihself

• Mek wahn rool dat nobadi eena di famili shuda yooz dehn divais wail wi di ga wahn meel tugeda