Bot, sohn koplz yooz teknalaji eena wahn way weh ku afek dehn marij. Dehn ku en op di ga prablemz laik:

• Dehn noh ga taim fi spen wid eech ada.

• Dehn bring dehn werk hoam eevn wen dehn noh haftu.

• Dehn haid tingz er dehn ku eevn cheet pahn eech ada.

SPEN TAIM TUGEDA

Michael, hoo da wahn hozban, seh: “Sohntaim mee ahn mi waif deh eena di sayhn room, bot da laik if shee noh dehdeh kaaz shee noh pay mee no main. Shee aalwayz bizi wid ih foan, an ih seh, ‘Ah neva ga taim fi chek mi foan hoal day.ʼ” Jonathan, hoo da wahn hozban tu, seh dat eena dehn taip a sichuwayshan “wahn kopl ku bee eena di sayhn plays bot stil feel laik dehn deh far fahn eech ada.”

TINK BOWT DIS: How aafn yu di kaal er teks sombadi els insteda di spen taim wid yu mayt?—IFEEZHANZ 5:33.

LEF WERK DA IH PRAPA PLAYS

Sohn peepl ga wahn jab weh dehn need fi ansa kaalz er eemayl eevn wen dehn deh hoam. Bot sohn peepl weh noh ga wahn jab laik dat stil en op di werk eevn wen dehn deh hoam. Wahn hozban weh naym Lee seh: “Ih haad noh fi chek evri foan kaal er teks mesij weh Ah geh fahn werk joorin di taim weh Ah mi set wan said fi spen wid mi waif.” Wahn waif weh naym Joy seh: “Ai werk fahn hoam, soh ih haad fi noa wen fi stap werk. Ih tek wahn lata efoat fi bee balans.”

TINK BOWT DIS: Yoo lisn gud wen yu mayt di taak tu yu?—LOOK 8:18.

BEE LAAYAL

Lata peepl seh dat dehn aagyu wid dehn mayt bikaaz dehn feel laik dehn kyaahn chros weh dehn mayt poas pahn soashal meedya. Sohn mi eevn admit dat dehn poas tingz onlain weh dehn noh waahn dehn mayt noa bowt.

Lata peepl bileev dat soashal meedya ku bee daynjaros fi wahn marid kopl an ih mek it eevn eeziya fi mek dehn cheet pahn eech ada. Ih noh sopraiz wi fi noa dat lata laaya seh dat soashal meedya di kaaz lata divoas tudeh.

TINK BOWT DIS: Yoo tel yu marij mayt hoo aal yu taak er teks wid, er yu haid sohn tingz fan ahn?—PROVERBS 4:23.

MEK TAIM FI DI MOA IMPOATANT TINGZ

Wahn persn weh noh eet food wahn fays lata helt prablemz. Sayhn way soh, wahn persn weh noh spen inof taim wid ih marij mayt wahn fays prablemz eena ih marij.—Ifeezhanz 5:28, 29.

Taak tu yu mayt bowt weh sojeshanz unu wuda waahn aplai eena unu laif, er rait dong unu oan aidyaaz weh ku help kip teknalaji eena ih plays.

• Mek planz fi ga wahn meel tugeda evri day

• Set wahn taim wen wi wahn stap yooz wi divais fi di day

• Mek planz fi du sohnting tugeda weh wi injai

• Ton aaf wi divais da nait, ahn noh lef it kloas tu weh wi sleep

• Tek at lees 15 minits evri day fi spen taim wid eech ada widowt wi divais kloas bai

• Ton aaf di Intanet fahn wi divais pahn wahn spesifik taim eech day