Bot, peepl weh yooz teknalaji wahn lat noatis dat dehn . . .

• fain it haad fi foakos wen dehn di reed.

• eezi fi geh dischraktid.

• eezi fi feel boarin wen dehn deh bai dehnself.

HOW TEKNALAJI AFEK YU WEN YU REED?

Peepl weh aalwayz deh pahn dehn ilekchranik divais sohntaim noh ga di payshens fi reed wahn hoal aatikl er buk, soh dehn wuda jos browz chroo it fi geh di mayn aidyaa a it.

If yu browz chroo sohnting jos fi fain wahn ansa tu wahn kweschan, dat aarait. Bot, dis da noh wahn gud way fi reed, espeshali if yu reeli waahn andastan wahn sertn tapik.

TINK BOWT DIS: How yu stan wen ih kohn tu reedin, espeshali wen da lata infamayshan? Yu noh tink yu wahn laan beta if yu tek di taim fi reed an andastan di tapik beta?—PROVERBS 18:15.

TEKNALAJI MEK IT HAADA FI MEK YU FOAKOS?

Sohn peepl feel laik teknalaji help dehn fi du moa dan wan ting at di saym taim. Fi egzampl, dehn feel laik dehn ku teks dehn frenz wail dehn di stodi. Bot wen dehn di du moa dan wan ting saym taim, dehn noh reeli di foakos pahn notn weh dehn di du.

Ih noh eezi fi foakos pahn wan ting at a taim, bot wen yu doo foakos, yu ku laan. Wahn teenayja weh naym Grace seh: “Yu mek les mistayk ahn yu noh feel soh schres owt. Ah laan dat ih beta fi foakos pahn wan ting at a taim ahn noh geh dischraktid.”

TINK BOWT DIS: Yu tink teknalaji mek it haada fi mek yu foakos ahn memba weh yu mi-di stodi bowt?—PROVERBS 17:24.

HOW TEKNALAJI KU AFEK YU WEN YU DEH BAI YUSELF?

Sohn peepl noh laik deh bai dehnself, soh dehn yooz teknalaji fi kip dehn bizi. Olivia seh: “If eena 15 minits Ah noh chek mi foan er tablet er ton aan di TV, Ai feel boarin.”

Bot, fi mek yong peepl er eevn adolts laan, dehn need sohn taim fi deh bai dehnself soh dat dehn ku tink.

TINK BOWT DIS: Wen yu deh bai yuself, yoo yooz dis taim fi tink?—1 TIMOTI 4:15.

HUMOCH TAIM YU SPEN PAHN TEKNALAJI?

Eena weh wayz yu ku yooz teknalaji fi laan nyoo tingz? How teknalaji ku afek di way yu foakos ahn laan?