LAYTLI, LATA PEEPL DI DU RISAACH BOWT HOW FI DEEL WID DI PAYN WEH KOHN AFTA SOHNBADI WEH YU LOV DED. Bot laik weh wi menshan eena di aatikl bifoa dis wan, moas a di taim di bes advais weh di ekspert dehn ga goh lang wid di wizdom weh wi fain eena di Baibl. Dis help wi fi si dat eevn doa di Baibl oal, di advais weh deh een deh ku stil help wi tudeh. Bot di Baibl aalso gat een lat moa advais weh ku help wi. Ih gi wi infamayshan weh wi kyaahn fain no way els, ahn dis ku bring wahn lata komfert tu dehn wan weh looz sohnbadi eena det.

• Wi ku bee shoar dat enibadi weh wi lov weh ded noh di sofa

  Di Baibl seh da Ecclesiastes 9:5: “Di ded noh noa notn ataal.” Dehn “stap tink.” (Psalm 146:4) Di Baibl aalso seh dat wen sohnbadi ded da laik if dehn deh eena wahn deep sleep.—Jan 11:11.

• Wen wi bileev eena wahn lovin Gaad ih gi wi komfert

  Di Baibl seh da Psalm 34:15: “Kaaz Jehoava * si di raichos wan dehn, an ih hyaa dehn wen dehn pray ahn poar owt dehn haat tu ahn.” Wen wi pray tu Gaad ahn tel ahn how wi feel, wi geh moa komfert dan weh wi wuda get if wi mi-di taak tu sohnbadi. Wen wi du dis, ih help wi fi ga wahn persnal rilayshanship wid wi Kriyayta, weh yooz ih powa fi komfert wi.

• Wi ga wahn beta fyoocha fi luk faawod tu

  Imajin wahn taim eena di fyoocha, wen dehn wan weh ded wahn kohn bak tu laif fi liv ya pahn ert! Di Baibl taak bowt dis taim wahn lat. Di Baibl diskraib how tingz wahn bee laik eena di fyoocha. Ih aalso seh dat Gaad “wahn waip weh [wi] tyaaz fahn [wi] aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.”—Revilayshan 21:3, 4.

Wahn lata peepl hoo bileev eena Jehoava, di Gaad a di Baibl, laan fi bayr op bikaaz dehn ga di hoap fi si agen aal hoo dehn looz eena det. Fi egzampl, Ann mi looz ih hozban weh mi 65 yaaz oal; shee seh: “Di Baibl mek wi noa fi shoar dat di peepl weh wi lov weh ded noh di sofa ahn dat Gaad wahn rezorek aala dehn wan weh deh eena fi hihn memri. Ah aalwayz tink bowt dis weneva Ah di tink bowt di fak dat Ah looz mi hozban, ahn dat help mi bayr op ahn bee schrang espeshali wen Ah feel dong!”

Tiina, weh wi mi menshan erliya, seh: “Fahn wen Timo ded, Ah feel dat Gaad di help mi. Ah si how Jehoava mi help mi joorin mi haad taimz. Ahn di pramis weh di Baibl gi mi bowt wahn rezorekshan reel tu mee. Ih gi mee di schrent fi mek Ah kantinyu bayr op til di day wen Ah wahn si Timo agen.”

Milyanz a peepl feel dis saym way, ahn dehn noa fi shoar dat weh di Baibl pramis da chroo. Eevn if yu feel laik weh di Baibl pramis da lai er da jos wahn jreem, ih wuda help yu wahn lat if yu du yu oan risaach ahn fain proof weh shoa dat di kongsl ahn di pramis dehn da reeli chroo. Eena di Baibl, yu wahn ku fain di bes help fi dehn wan weh looz sohnbadi weh dehn lov eena det.

Wach sohn veedyo weh taak bowt dis hoap pahn wi websait, jw.org

 WAT DA DI KANDISHAN A DI DED?

YU WUDA WAAHN HYAA GUD NYOOZ?