If yu luk fi advais pahn how fi deel wid di sadnis yu feel wen yu looz sohnbadi eena det, yu wahn ku fain lata difrent aidyaaz, bot noh aala dehn werk. Maybi da bikaaz, laik weh wi menshan erliya, noh evribadi deel wid dis kaina sadnis di sayhn way. Weh ku werk fi wan persn mait noh werk fi sohnbadi els.

Bot dehn ga sohn tingz weh ku help. Sohn ekspert rekomen tingz weh geh rait dong eena di Baibl ahn weh help lata peepl fi towznz a yaaz.

• Sohn ekspert seh dat dis da bes help weh yu ku get. Da chroo, sohntaim, yu mait waahn deh bai yuself. Yu mait eevn geh taiyad a di peepl weh di chrai help yu. Ih naamal fi mek yu feel dis way.

• Dis noh meenz dat yu haftu deh rong peepl aal di taim, bot noh push dehn wan said needa. Aftaraal, yu mait need dehn help eena di fyoocha. Eena wahn kain way, mek yu famili ahn frenz noa weh yu need help wid ahn wat da sohn tingz yu noh need help wid.

• Chooz wen yu wuda waahn deh bai yuself ahn wen yu wuda waahn deh rong adaz.

BAIBL PRINSIPL: “Too beta dan wan . . . Kaaz if wan a dehn faal dong, di ada wan ku pik ahn op.”​—Ecclesiastes 4:9, 10.

• Wen yu eet food weh gud fi yu helt, ih wahn help yu fi deel wid di sadnis weh yu di feel. Ih wuda aalso help if yu eet difrent food laik froot, vejitabl, ahn food weh noh ga tu moch fat.

• Jrink inof waata ahn joos fahn froot ahn vejitabl weh gud fi yu helt.

• If yu noh feel tu hongri, eet wahn lee bit chroo owt di day. Yu ku aalso aks yu dakta fi sojeshanz. *

• Wen yu di waak er eksasaiz, ih ku help yu feel beta. Eksasaiz ku help yu tink moa klyaa bowt di tingz weh chaynj eena yu laif, er ih ku help yu fi tink bowt sohnting els fi wahn wail.

BAIBL PRINSIPL: “Nobadi neva yet hayt ih oan badi. Insted, wi feed wi badi ahn tek kayr a it.”—Ifeezhanz 5:29, NTBK.

• Ih aalwayz impoatant fi get inof sleep. Bot ih reeli impoatant fi dehn wan weh di deel wid dis kaina sadnis fi get inof sleep bikaaz dehn wahn feel moa taiyad dan naamal.

• Bee kyaaful humoch kaafeen an alkohol yu jrink bikaaz dehn ku afek yu ahn mek yu noh get inof sleep.

BAIBL PRINSIPL: “Ih beta fi get inof res dan fi werk ekschra haad ahn di chays afta loan breez.”—Ecclesiastes 4:6.

• Memba dat da noh evribadi deel wid dis kaina sadnis di sayhn way. Yu haftu fain owt weh werk bes fi yoo.

• Wahn lata peepl fain owt dat wen dehn taak bowt dehn sadnis tu adaz, ih help dehn fi deel wid it, bot sohn peepl prifaa fi noh taak bowt it. Eevn eksperts noh noa wat da di bes way fi deel wid di sadnis yu feel wen yu looz sohnbadi eena det. If yu need fi taak bowt how yu feel wid sohnbadi bot yu fain it haad fi du, chrai shayr how yu feel lee bit bai lee bit wid wahn gud fren.

• Sohn peepl feel laik if dehn krai, ih help dehn fi deel wid dis kaina sadnis, wail adaz noh krai az moch.

BAIBL PRINSIPL: “Eech haat noa ih oan payn.”—Proverbs 14:10.

• Sohn peepl chrai tek jrogz er alkohol fi feel beta. If yu du dis, ih wahn onli hert yu. Dis wahn onli mek yu feel beta fi wahn lee wail bot ih wahn mek yu sichuwayshan wers. Du tingz weh wahn reeli mek yu feel beta ahn weh noh wahn hert yu.

BAIBL PRINSIPL: “Mek wi kip wiself kleen fahn eniting weh . . . doti.”—2 Korintyanz 7:1.

• Wahn lata peepl fain dat wen dehn spen taim di du ada tingz, ih help dehn fi noh tink tu moch bowt dehn sadnis.

• If yu spen taim wid frenz, laan wahn nyoo skil, er spen taim di du fon tingz wid adaz, ih wahn help yu fi noh tink tu moch bowt yu sadnis.

• Lee bit bai lee bit, yu wahn staat tu heel, ahn yu wahn noatis dat yu noh wahn az sad az yu yoostu bee.

BAIBL PRINSIPL: “Fi evriting dehn ga wahn apointid taim, . . . wahn taim fi krai ahn wahn taim fi laaf; wahn taim fi baal ahn wahn taim fi daans.”—Ecclesiastes 3:1, 4.

• Az soon az pasabl, staat tu du di tingz weh yu yoostu du evri day.

• Wen yu ga wahn gud skejul fi sleep, fi werk, ahn fi ada aktiviti, yu wahn staat tu noatis dat yu laif di goh bak tu naamal agen.

• If yu kip di du pazitiv tingz, ih wahn help yu fi deel wid yu sadnis.

BAIBL PRINSIPL: “Ih noh wahn tink moch bowt di lee bit a dayz a ih laif, bikaaz di chroo Gaad kip ahn bizi wid di hapinis eena ih haat.”—Ecclesiastes 5:20.

• Wahn lata peepl weh mek kwik disizhanz afta dehn looz sohnbadi weh deh lov eena det en op di rigret dehndeh disizhanz.

• If ih pasabl, wayt wahn lee wail bifoa yu moov tu wahn neks plays, chaynj wahn jab, er geh rid a di persn bilanginz.

BAIBL PRINSIPL: “Wahn persn weh werk haad mek planz, an ih wahn ga sokses, bot aal hoo haysti wahn bee poa.”—Proverbs 21:5.

• Wahn lata peepl fain dat ih helpful fi du tingz weh help dehn memba di persn weh ded.

• Yu ku fain komfert wen yu kalek pichaz er tingz weh wahn help yu memba nais taimz weh unu shayr tugeda.

• Kip tingz weh wahn bring bak gud memriz ahn goh chroo dehn layta, wen yu feel laik yu redi.

BAIBL PRINSIPL: “Memba di oal dayz.”—Deuteronomy 32:7.

• Yu mait tink bowt goh pahn wahn vakayshan.

• If yu kyaahn tek wahn lang vakayshan, maybi yu ku du sohnting weh fon fi jos wan er too dayz, laik goh pahn wahn haik, goh vizit wahn myooziyom, er goh fi wahn jraiv.

• Eevn wahn lee brayk fahn yu naamal laif ku help yu deel wid yu sadnis.

BAIBL PRINSIPL: “Unu kom, mek wi goh ahn fain wahn plays fi deh bai wiself, soh dat wi ku tek wahn lee res.”—Maak 6:31.

• Memba dat wen yu help adaz, yoo wahn feel beta tu.

• Yu ku praabli help adaz hoo mait di goh chroo di sayhn payn weh yoo di goh chroo bikaaz yu kud andastan how dehn feel.

• Wen yu help ahn komfert adaz, ih ku mek yu feel hapi agen ahn mek yu feel dat yu yoosful.

BAIBL PRINSIPL: “Wi feel moa hapinis wen wi giv tu adaz dan wen wi get tingz fahn ada peepl.”—Aks 20:35.

• Wen yu looz sohnbadi weh yu lov eena det, ih ku help yu fi tink bowt weh reeli impoatant.

• Yooz di sichuwayshan fi help yu egzamin yu laif.

• Fain owt weh moa impoatant eena yu laif ahn staat tu du di tingz weh moa impoatant fers.

BAIBL PRINSIPL: “Ih beta fi goh da wahn finaral dan wahn paati; bikaaz det da di en fi evri persn, ahn dehn wan weh alaiv fi tink bowt it.”—Ecclesiastes 7:2.

 Da chroo, notn wahn irays di payn weh yu di feel. Bot, lata peepl weh looz sohnbadi weh dehn lov eena det noa fahn dehn oan ekspeeryens dat wen yu du pazitiv tingz laik di wan dehn weh geh menshan eena dis aatikl, ih ku help yu fain di komfert weh yu need. Af koars, dis da noh wahn kompleet lis a tingz weh ku help yu fain di komfert weh yoo need. Bot if yu chrai som a di sojeshanz, yu wahn si dat yu ku fain di help weh yu need fi deel wid dis kaina sadnis.