Milyanz a peepl aala oava di werl don du weh wi diskos eena dehnya aatikl, ahn dat help dehn fi geh rid a di prejudis dehn feel eena dehn haat. Bot pahn wi oan, wi kyaahn geh rid a prejudis. Soh yu tink dat wi wahn kud eva geh rid a prejudis?

Soh faar, no hyooman govament geh rid a prejudis fahn owta wi haat. Bot yu tink dat meen dat no govament ku geh rid a prejudis?

Fi mek wahn govament geh rid a prejudis, ih wuda need fi:

1. 1. Help peepl fi waahn chaynj di way dehn tink ahn feel tuwaadz adaz.

2. 2. Geh rid a hert feelinz weh mek it haad fi chreet adaz eena wahn fyaa way.

3. 3. Ga gud leedaz hoo noh ga no prejudis eena fi dehn haat.

4. 4. Yoonait peepl fahn aala di difrent rays ahn kolcha dehn tugeda.

Di Baibl tel wi dat Gaad don set op wahn govament laik dis. Ih naym “di Kingdom a Gaad.”—Look 4:43.

Noatis weh da govament wahn provaid:

“Di peepl weh di liv pahn di ert [wahn] laan bowt raichosnis.”—ISAIAH 26:9.

“Di rizolt a chroo raichosnis wahn bee pees, ahn bikaaz a chroo raichosnis di peepl weh liv pahn di ert wahn ga pees ahn feel sayf fareva.”—ISAIAH 32:17.

Weh dis meen? Di Kingdom a Gaad wahn teech peepl wat da di rait tingz fi du. Wen peepl laan weh rait fahn weh rang, dehn feelinz tuwaadz wan anada wahn chaynj. Evribadi wahn si dat di rait ting fi du da fi lov eech ada, noh mata weh dehn kohn fram.

Gaad “wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis. Di tingz weh yoostu hapm noh wahn egzis nohmoh.” —REVILAYSHAN 21:4.

Weh dis meen? Gaad Kingdom wahn bring wahn en tu aala di payn weh injostis kaaz. Wen peepl fays eni kaina injostis, ih ku mek dehn hoal malis eena dehn haat. Bot Gaad Kingdom wahn geh rid a dehndeh kaina feelinz tu.

“Ih noh wahn joj bays pahn onli weh ih si, ner gi kongsl bays pahn onli weh ih hyaa. Ih wahn bee fyaa wen ih joj di wan dehn weh poa ahn di disizhanz weh ih mek wahn bee fyaa soh dat ih ku protek di hombl wan dehn a di ert.” —ISAIAH 11:3, 4.

Weh dis meen? Jeezas Krais, di King a Gaad Kingdom, wahn rool oava di ert eena wahn fyaa way an ih noh wahn shoa fayvritizm. Hihn noh wahn chreet wan groop er rays a peepl beta dan di adaz. Ahn hihn wahn mek shoar dat evribadi aal oava di werl obay fi hihn raichos laa dehn.

Di Kingdom a Gaad teech peepl fi ‘ga di saym tinkin ahn di saym lov, fi gree wid wan anada, ahn fi ga di saym main.ʼ —FILIPIYANZ 2:2.

Weh dis meen? Di peepl weh wahn liv anda Gaad Kingdom noh jos wahn priten fi bee yoonaitid; dehn wahn bee yoonaitid fi chroo. Dehn wahn “agree wid wan anada” bikaaz dehn wahn ga chroo lov fi wan anada.