Wen wahn persn selfish, ih ku kaaz ahn fi ga prejudis eena ih haat. Wahn selfish persn tink dat ih beta dan ada peepl, an ih tink ih deh abov adaz. Enibadi ku staat tu tink dis way. Di Encyclopædia Britannica seh: “Moas kolcha feel dat fi dehn way a laif, dehn food, di way dehn jres, dehn habits, dehn bileef, di way dehn tink, ahn soh aan, beta dan ada kolcha er rays.” Weh wi ku du fi noh tink laik dis?

“Unu mos bee hombl ahn kansida ada peepl fi bee moa impoatant dan unu.” —FILIPIYANZ 2:3.

Weh dat meen? If wi noh waahn tink tu moch a wiself, wi need fi laan fi bee hombl. If wi hombl, wi wahn si dat ada peepl beta dan wee eena som way er di ada. No rays a peepl er kolcha perfek ahn ku du evriting gud.

Tink bowt di egzampl a Stefan. Ih mi groa op eena wahn Komyoonis konchri, bot hihn mi haftu laan fi aksep peepl weh kohn fahn wahn difrent konchri dan fi hihn wan. Ih seh: “Ih impoatant fi mek wi si  ada peepl az beta dan wee, kaaz dat ku help wi fi fait gens prejudis. Ah tel miself dat Ah noh noa evriting ahn dat Ah ku laan sohnting fahn eech persn.”

Bee aanis wid yuself an admit dat yoo mek mistayk tu. Memba dat ada peepl ku du sertn tingz beta dan yoo. Noh tink dat evribadi fahn wahn spesifik rays er kolcha ga di saym faalt dehn.

Insteda tink eena wahn negitiv way bowt wahn persn fahn wahn spesifik rays er kolcha, aks yuself:

• ‘Di tingz weh Ah noh laik bowt dis persn da akchwali bad tingz, er da jos dat dis persn difrent fahn mee?ʼ

• ‘Wat if dis persn fain owt wat da mai faalt dehn?ʼ

• ‘Wat da som tingz dis persn ku du beta dan mee?ʼ

If yu aanis wid yuself wen yu di ansa dehnya kweschan, ih mait help yu fi geh rid a prejudis, ahn yu mait fain tingz weh yu laik bowt da persn.