If wi avoid peepl fahn sertn rays ahn kolcha weh wi noh laik, wi wahn jos en op moa prejudis. An if wi onli mek fren wid peepl weh wi laik, wi mait staat tu tink dat fi wee way da di onli way fi tink, feel, ahn bihayv.

“Oapm op unu haat.”—2 KORINTYANZ 6:13.

Weh dat meen? Wi “haat” ku rifaa tu weh wi di feel eensaid. If wi onli lov peepl hoo da jos laik wee, da laik wi di kloaz op wi haat. If wi waahn avoid dis prablem, wi haftu mek fren wid peepl hoo difrent fahn wee.

Wen wi get fi noa ada peepl persnali, wi get fi andastan wai dehn du tingz difrent fahn wee. Ahn wen wi staat tu ga lov fi dehn, wi ferget dat dehn difrent fahn wee. Wi get fi apreeshiayt dehn eevn moa ahn ga moa kompashan fi dehn.

Tink bowt di egzampl a Nazaré. Shee mi prejudis tuwaadz peepl weh moov tu fi shee konchri. Noatis weh mi help shee. Nazaré seh: “Ah spen taim wid dehn an Ah werk wid dehn. Ah meet peepl hoo bihayv di opozit way fahn weh adaz seh bowt dehn. Wans yu get fi bee fren wid peepl fahn wahn nada kolcha, yu wahn get fi si dat aala dehn da noh di saym. Ahn yu wahn get fi lov dehn an apreeshiayt dehn az wahn persn.”

Luk fi apachooniti fi taak tu peepl hoo da fahn wahn difrent konchri, wahn difrent rays, er hoo taak wahn difrent langwij dan yoo. How if yu wuda chrai dis:

• Aks dehn fi tel yu wahn lee bit bowt dehnself.

• Invait dehn fi eet wahn meel wid yu.

• Lisn tu dehn laif stoari, ahn fain owt weh impoatant tu dehn.

If yu chrai fi andastan weh dehn gaahn chroo eena laif, yu wahn andastan wai dehn da laik dat. Dis wahn help yu fi laik dehn an ada peepl fahn da kolcha eevn moa.