Yoo tink di yoonivers an evri livin ting geh kriyayt bai Gaad, er yu tink ih apyaa jos laik dat? Di werdz weh di too saiyentis weh geh menshan eena di biginin a dis aatikl ahn di werdz weh wi reed eena Genesis 1:1 shoa wi too kompleetli difrent ansa tu da kweschan. Dehn ga peepl weh bileev weh dehn saiyentis seh ahn dehn ga peepl weh bileev weh di Baibl seh. Stilyet, wahn lata peepl noh shoar weh fi bileev. Peepl aagyu bowt dis tapik eena lata buk ahn TV shoa weh papyula.

Yu skoolteecha dehn mosi mi eevn seh dat Gaad noh egzis ahn dat di yoonivers ahn laif mi apyaa jos laik dat. Bot yu teecha dehn mi shoa yu proof dat wahn Kriyayta noh egzis? Pahn di ada han, yu mosi hyaa rilijos leedaz di seh dat wahn Kriyayta doo egzis. Bot dehn shoa yu proof a dat? Er dehn jos seh yu need fi bileev eena Gaad bikaaz dehn seh soh?

Yu praabli tink bowt da kweschan ahn yu mosi feel dat nobadi ku seh fi shoar weda er nat wahn Kriyayta egzis. Ahn yu mosi di wanda if ih reeli impoatant fi noa di ansa tu da kweschan.

Dis kapi a di Awayk! wahn diskos som a di faks weh mek wahn lata peepl bileev eena wahn Kriyayta. Den, ih wahn diskos how di yoonivers mi staat ahn how laif mi staat pahn ert, ahn wai dat impoatant.